ខេត្តសៀមរាប ៖ បុស្បា ប៉ាន់ ដែលធំពេញវ័យនៅសហរដ្ឋអាមេរិក បានបង្ហើរសំនៀងចំនួន៥បទ ទាំងភាសាខ្មែរ និងភាសាបរទេសតាមរយៈបទចម្រៀងអូប៉េរ៉ា និងលេងហ្គីតា ដោយខ្លួននាងផ្ទាល់ ។ បុស្បា ប៉ាន់លេងហ្គីតា
ខេត្តសៀមរាប ៖ បុស្បា ប៉ាន់ ដែលធំពេញវ័យនៅសហរដ្ឋអាមេរិក បានបង្ហើរសំនៀងចំនួន៥បទ ទាំងភាសាខ្មែរ និងភាសាបរទេសតាមរយៈបទចម្រៀងអូប៉េរ៉ា និងលេងហ្គីតា ដោយខ្លួននាងផ្ទាល់ ។ បុស្បា ប៉ាន់លេងហ្គីតា ដោយប្រើប្រាស់ទេពកោសល្យពិសេសមួយ គឺប្រើប្រាស់ម្រាមដៃរបស់នាងជំនួសឧបករណ៍សម្រាប់កេះ ដែលតន្ត្រីករនានាតែងតែប្រើប្រាស់ ។
បទ «ម៉ូណាលីសា» ជាចម្រៀងបែបអូប៉េរ៉ា និងបទ «ជីវិតកូនស្រីអ្នកនេសាទ» ជាបទចម្រៀងដែលបុស្បា ប៉ាន់ ពេញចិត្តជាងគេ ហើយតែងតែលើកយកមកច្រៀងជាបន្តបន្ទាប់ មុនពេលនាងចាកចេញទៅសិក្សានៅសាលា Vanut school of Art ។ បច្ចុប្បន្នបុស្បា ប៉ាន់កំពុងសិក្សា នៅសាលា New England Conservatory ក្នុងរដ្ឋបូស្តុនសហរដ្ឋអាមេរិក ។
នៅភោជនីយដ្ឋានម្លិះនាក្រុងសៀមរាប កាលពីរាត្រីថ្ងៃទី២៧ កក្កដា ២០១៦ បុស្បា ប៉ាន់ បានចូលរួមច្រៀងក្នុងកម្មវិធី «តន្ត្រីសប្បុរសធម៌ » ដើម្បីស្វែងរកប្រាក់ជួយមន្ទីរពេទ្យកុមារអង្គរខេត្តសៀមរាប ។
តារាចម្រៀងអូប៉េរ៉ាល្បីឈ្មោះលោកឃួន សិទ្ធីស័ក្តិ ដែលធ្លាប់បានបង្ហាត់បង្រៀនដល់កញ្ញាបុស្បា ប៉ាន់ មុនពេលនាងចាកចេញទៅសិក្សានៅសហរដ្ឋអាមេរិកបានថ្លែងបន្ទាប់ពីការប្រគំតន្ត្រីថា សំឡេងរបស់បុស្បា ប៉ាន់ មានភាពប្រសើរឡើង ដោយនាងរកឃើញចំណុចពិសេសនៃការប្រើប្រាស់សំឡេងបានល្អជាងមុន និងធ្វើឲ្យសំឡេងរបស់នាងពីរោះជាងមុន ។ អ្វីជាចំណុចពិសេសនៃសំឡេងរបស់នាងគឺមានភាព«ស្រទន់» ។ ឥឡូវនេះនាងកំពុងផ្តោតលើការនិពន្ធតន្ត្រី ចម្រៀង និងការច្រៀង ជាអ្វីដែលសិល្បករគួរតែមានទាំងពីរព្រមគ្នា ជាអ្វីដែលតន្ត្រីវិទូបានផ្តល់ការណែនាំ ។
«បុស្បា ប៉ាន់ មាននិស្ស័យ និងទេពកោសល្យខ្ពស់ ខ្ញុំពិតជាចូលចិត្តនាង ព្រោះនាងអាចនិយាយបានបីភាសា និងអាចច្រៀងជាច្រើនភាសា ដែលនេះជាទុនដ៏សំខាន់សម្រាប់អភិវឌ្ឍទេពកោសល្យរបស់នាង ។ ខ្ញុំចូលចិត្តសំឡេងរបស់នាង ដែលវាមិនត្រឹមតែលើកកម្ពស់វិស័យតូរ្យតន្ត្រីទេ តែជាមោទនភាពជាតិ ហើយសិល្បករនានាគួរយកនាងជាគំរូ» ។ លោក សិទ្ធិស័ក្តិ និយាយបែបនេះ ។
ការសម្តែង ច្រៀង និងលេងឧបករណ៍តន្ត្រីដោយប្រើប្រាស់ម្រាមដៃទាំង៥របស់បុស្បា ប៉ាន់ ជាអ្វីដែលអ្នកជំនាញតូរ្យតន្ត្រីចាត់ទុកថា «ជាទេពកោសល្យមួយ» ដែលតន្ត្រីករដទៃទៀតពិបាកធ្វើ ។
ការរៀបចំប្រគំតន្ត្រីជាលើកដំបូង បន្ទាប់ពីបុស្បា ប៉ាន់ ចាកចេញទៅសិក្សានៅសហរដ្ឋអាមេរិកនេះ មិនមែនជាលើកទី១របស់បុស្បា ប៉ាន់ទេ ប៉ុន្តែការប្រគំលើកនេះ គឺដើម្បីស្វែងរកប្រាក់ជួយឧបត្ថម្ភមន្ទីរពេទ្យកុមារអង្គរ ស្ថិតនៅកណ្តាលក្រុងសៀមរាប ។
លោកសាស្ត្រាចារ្យអ៊ុង ជិនណារី សាស្ត្រាចារ្យកិត្តិយសក្នុងសាកលវិទ្យាល័យមួយនៅសហរដ្ឋអាមេរិក និងជានាយក Nirmita Composer Institute បានថ្លែងថា ទេពកោសល្យរបស់បុស្បា ប៉ាន់ឈានដល់កម្រិតមួយ ដែលមិនងាយមានអ្នកធ្វើបានសម្រាប់កម្ពុជា ព្រោះជំនាញ និងទេពកោសល្យតន្ត្រី និងចម្រៀងរបស់នាងកាន់តែមានភាពល្អប្រសើរឡើង ។
លោកសាស្ត្រាចារ្យបន្តថា «វានៅមានពេលវេលាច្រើនថែមទៀតដើម្បីអភិវឌ្ឍន៍សមត្ថភាពជំនាញរបស់នាង ដើម្បីឈានទៅដល់កម្រិតកំពូល ប៉ុន្តែវិថីដែលនាងដើរ ជាវិថីមួយដ៏ត្រឹមត្រូវក្នុងវិស័យតូរ្យតន្ត្រី» ។
លោកវង្ស សាវុធ អ្នកក្រុងសៀមរាប ដែលបានចូលរួមទស្សនាការប្រគំតន្ត្រីរបស់បុស្បា ប៉ាន់ជាលើកដំបូង និងជាអ្នកនិយមស្តាប់តូរ្យ តន្ត្រីបែបបស្ចិមប្រទេសបានថ្លែងថា បុស្បា ប៉ាន់ ច្រៀងបទអូប៉េរ៉ាបានល្អណាស់ និងពិតជាពីរោះដោយសារនាងអាចស្រែកបានខ្ពស់ និងថ្នមសំឡេងបានល្អ សម្រាប់បទចម្រៀងពិសេសនេះ។ បទចម្រៀងបែបអូប៉េរ៉ាជាបទពិបាកច្រៀងបំផុត ប៉ុន្តែនាងអាចធ្វើបាន ប្រហែលវាជាទេពកោសល្យពីកំណើត និងការទទួលបានការបង្ហាត់បង្ហាញពីសាស្ត្រាចារ្យនៅសហរដ្ឋអាមេរិក ។
លោកវង្ស សាវុធថ្លែងថា «តាមរយៈការស្តាប់សំឡេងសិល្បករបរទេសកន្លងមក ខ្ញុំគិតថា បុស្បា ប៉ាន់ ពិតជាមានទេពកោសល្យមិនចាញ់តារាចម្រៀងលំដាប់អន្តរជាតិនោះទេ» ៕
ចែករំលែកព័តមាននេះ