ខេត្តរតនគិរី ៖ បើតាមសេចក្តីរាយការណ៍បានឱ្យដឹងថា បុរសម្នាក់កំពុងតែស្ថិតក្នុងស្ថានភាពស្រវឹងផង ក៏បានជិះម៉ូតូបញ្ច្រាសទិស ហើយក៏ត្រូវនគរបាលអនុវត្តច្បាប់ចរាចរណ៍ ចាប់ផាកពិន័យច្រើនពេក ដោយមិនមានលុយបង់ បុរសរូបនេះក៏បង្ហូរសាំងរួចចាក់ដុតកម្ទេចម៉ូតូចោលបញ្ឈឺសមត្ថកិច្ចតែម្តង។ ហេតុការណ៍នេះបានបង្កឱ្យមានការភ្ញាក់ផ្អើលកាលរសៀលថ្ងៃទី១៧ ខែកុម្ភៈ ឆ្នាំ២០២២ នៅត្រង់ចំណុចមុខពហុកីឡដ្ឋានខេត្ត ស្ថិតក្នុងភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី។
សេចក្តីរាយការណ៍បន្តថា បុរសដែលដុតម៉ូតូខ្លួនឯងចោលខាងលើនេះមានឈ្មោះ ម៉ូវ សុភា ភេទប្រុស អាយុ២៨ឆ្នាំ ជាជនជាតិខ្មែរ មុខរបរកម្មករ រស់នៅភូមិធួយអំពិល ឃុំចាអ៊ុង ស្រុកអូរជុំ ខេត្តរតនគីរី។
បើតាមប្រភពនៅកន្លែងកើតហេតុ បានឱ្យដឹងថា មុនពេលកើតហេតុ បុរសម្នាក់បានបើកម៉ូតូម៉ាកវ៉េវ ពណ៌ខ្មៅ អត់ស្លាកលេខ ហើយអត់ពាក់មួកសុវត្ថិភាព និងអត់កញ្ចក់ទៀត ដោយជិះតែម្នាក់ឯងនោះទេក្នុងស្ថានភាពស្រវឹងផង លុះមកដល់ចំណុចគោលដៅត្រួតពិនិត្យ សមត្ថកិច្ចក៏បានហៅឱ្យឈប់ ដើម្បីធ្វើការផាកពិន័យ ព្រមទាំងធ្វើការណែនាំផងដែរ។
ប្រភពដដែលបន្តថា ពេលហៅឱ្យឈប់នោះ ដោយឃើញស្ថានភាពស្រវឹង សមត្ថកិច្ចក៏បានឱ្យបុរសរូបនេះអង្គុយសិន។ ហើយនៅពេលសមត្ថកិច្ចកំពុងតែដោះស្រាយជាមួយអ្នកផ្សេង បុរសរូបនេះចាំយូពេកខឹង ក៏ដកទុយោសាំង រួចដុតម៉ូតូខ្លួនឱ្យឆេះខ្ទេចអស់តែម្តង។
ក្រោយពេលដុតកម្ទេចម៉ូតូចោលនោះ កម្លាំងការិយាល័យជំនាញក៏បាននាំខ្លួនបុរសរូបនោះទៅធ្វើតេស្តជាតិស្រវឹង និងធ្វើតេស្តគ្រឿងញៀ.នរកឃើញថា មានជាតិអាកុលកំរិត០,៩៣៨mg/L និងមិនមានគ្រឿងញឿ.ននោះទេ ហើយក៏ធ្វើកិច្ចសន្យាលិខិតធានាឱ្យត្រឡប់ទៅផ្ទះវិញ។
បើតាមលោក មឿង សារិទ្ធ បានឱ្យដឹងថា បើដុតម៉ូតូនៅទីសាធារណៈ ត្រូវមានទោសបើកបរទាំងមានជាតិអាកុល អាចផាកពិន័យចាប់ពី៨០ម៉ឺនរហូតដល់៤លានរៀលផងដែរ។
ក្រោយពេលកើតហេតុ បុរសរូបនេះក៏បានសារភាពថា ខ្លួនពិតជាមានកំហុស ហើយជាជនទីទ័លក្រធ្វើសំណង់ មានប្រពន្ធកូនខ្ចីទៀត ទើបលោកស្នងការ ស្នងការរង អនុញ្ញាតឱ្យបុរសរូបនេះវិលត្រឡប់ទៅផ្ទះវិញ ដោយគ្រាន់តែឱ្យធ្វើកិច្ចសន្យា និងឱ្យសារភាពទោសកំហុសជាសាធារណៈតែប៉ុណ្ណោះ។
ពាក់ព័ន្ធនឹងករណីខាងលើនេះ មហាជនជាច្រើនក៏បានលើកឡើងដែរថា ដោយសារម៉ូតូនោះកញ្ចាស់ ហើយត្រូវប៉ូលិសអនុវត្តច្បាប់ផាកពិន័យច្រើនពេក ណាមួយបុរសរូបនេះមិនមានលុយបង់ ទើបបានជាដុតម៉ូតូខ្លួនឯងចោលតែម្តងទៅ។
គួរបញ្ជាក់ថា កម្លាំងការិយាល័យនគរបាលចរាចរណ៍ផ្លូវគោក នៃស្នងការរដ្ឋានខេត្ត ចុះអនុវត្តន៍ច្បាប់ចរាចរណ៍ខាងលើនោះ គឺដឹកនាំដោយលោកវរសេនីយ៍ត្រី ជួ ប៊ុនថៃ នាយរងការិយាល័យ។
ចែករំលែកព័តមាននេះ