ខេត្តមណ្ឌលគិរី ៖ សេចក្តីរាយការណ៍ពីប្រជាពលរដ្ឋរស់នៅស្រុកកោះញ៉ែកឱ្យដឹងថា ចាប់តាំងពីថ្ងៃបុណ្យចូលឆ្នាំចិននិងវៀតណាម រហូតមកដល់ថ្ងៃទី១៣-១៤ កុម្ភៈ ២០២២ ក្រុមគ្រឿងចក្ររបស់លោក ឧកញ៉ា តាយ សេង បានចូលឈួសឆាយដីព្រៃនិងផ្តួលរំលំដើមឈើរាប់ពាន់ដើមយ៉ាងអណាធិបតេយ្យ ផ្ទៃដីរាប់រយហិកតាទីតាំងដែលគេកំពុងឈូសឆាយដីព្រៃ ស្ថិតនៅព្រំប្រទល់ខេត្តមណ្ឌលគិរី និងខេត្តរតនគិរី ក្នុងភូមិអូររវ៉ាក់ ឃុំរយ៉ ស្រុកកោះញ៉ែក ខេត្តមណ្ឌលគិរី ។
សេចក្តីរាយការណ៍បន្តថា គ្រឿងចក្រជាច្រើនរុញព្រៃ និងរំលំដើមឈើតូចធំយ៉ាងរង្គាលសកម្មភាពនេះបានផ្អាកបន្តិច ដោយគេជម្លៀសគ្រឿងចក្រចេញ បន្ទាប់ពីអ្នកយកព័ត៌មានបានចុះទៅដល់ទីតាំងខាងលើនេះ ហើយរាយការណ៍បន្តទៅនាយខណ្ឌរដ្ឋបាលព្រៃឈើខេត្តមណ្ឌលគិរី ។
ករណីនេះប្រជាពលរដ្ឋថា កន្លងមក មានក្រុមឈ្មួញបានទម្លាក់លុយឲ្យមេខ្យល់ចំនួន២នាក់ ដែលគេស្គាល់ថា ១.ឈ្មោះ លោកថៃ ២.ឈ្មោះ លោក ម៉ៅ នៅក្នុងមូលដ្ឋានដើរប្រមូលទិញដីស្រែរបស់ប្រជាពលរដ្ឋនៅផ្នែកខាងក្រោម រួចហើយគេបានប្រើរូបមន្តកន្ទេលធំបន្លំដេក ឃុបឃិត និងអាជ្ញាធរមូលដ្ឋានភូមិ ឃុំ ស្រុក និងក្រុមជំនាញមួយចំនួនតូច នៅក្នុងស្រុកកោះញ៉ែក ដោយរៀបចំជាប្រព័ន្ធ និងលាក់បាំងឲ្យក្រុមឈ្មួញមានឱកាសវ៉ៃដីព្រៃបន្ថែមទៀត ក្នុងមួយចំណុចៗដីព្រៃរាប់រយ រាប់ពាន់ហិកតាបន្ថែមថ្មីទៀត ដើម្បីលក់ទៅឲ្យឈ្មួញ ដែលកំពុងប្រមូលទិញដីស្រែរបស់ប្រជាពលរដ្ឋដោយចោះៗសម្រាប់របាំងក្នុងការ ការពារបិទបាំងនៅអំពើមិនស្របច្បាប់របស់ខ្លួន។
ជាក់ស្តែង នៅថ្ងៃទី១៥ ខែកុម្ភៈ ឆ្នាំ២០២២ ប្រជាពលរដ្ឋបានរាយការណ៍មកអ្នកយកព័ត៌មានថា ក្រុមឈ្មួញបានបន្ថែមយកគ្រឿងចក្រចូលទៅវ៉ៃដីព្រៃចំនួន០៣គ្រឿងបន្តទៀតហើយ ដោយមានការវ៉ៃព្រៃទាំងយប់ទាំងថ្ងៃមិនមានការបង្ក្រាបនោះទេ ។ ក្រោយទទួលព័ត៌មានអ្នកកាសែតបានទំនាក់ទំនងអភិបាលស្រុកកោះញ៉ែក លោក ឌឹម នី មានប្រសាសន៍ថា កំពុងរវល់ប្រជុំ ។ ខណៈលោកនាយផ្នែករដ្ឋបាលព្រៃឈើស្រុកកោះញ៉ែក លោកក៏បានបញ្ជាក់ប្រាប់មកវិញដែរថា លោកឈឺជាងកន្លះខែមកហើយ ក្នុងរឿងនេះ លោកមិនបានដឹងនោះទេ ។
ចំណែកលោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី ឆ្លើយថា លោកមិនដឹងទេដោយលោកមិនទាន់ទទួលរបាយការណ៍ពីអាជ្ញាធរមូលដ្ឋាន។ លោកថា ចាំឲ្យកម្លាំងជំនាញចុះទៅជាមួយអាជ្ញាធរដល់ទីតាំងឈូសឆាយព្រៃ ដើម្បីសុំគោលការណ៏ពីថ្នាក់ដឹកនាំ ។ ករណីខាងលើនេះ ក្រោយពេលក្រុមអ្នកព័ត៌មាន រាយការណ៍ដល់នាយខណ្ឌរដ្ឋបាលព្រៃឈើខេត្តមណ្ឌលគិរី រយៈពេលប្រហែល០៣ម៉ោងស្រាប់តែ ក្រុមអ្នកបញ្ជាគ្រឿងចក្របើកចល័ត អាប៊ុល នឹងអាអ៊ិចចំនួនបីគ្រឿងនោះ គេចពីកន្លែងទីតាំងឈួសឆាយរុញព្រៃផ្តួលរំលំឈើដោយសុវត្តិភាព ។
ករណីនេះសង្ស័យតែបែកការ ពីក្រុមមន្ត្រីគ្រាប់ល្ពៅ។ដោយឡែកមេការមើលខុសត្រូវគ្រឿងចក្រឈួសឆាយដីព្រៃ បានបញ្ជាក់ប្រាប់ក្រុមអ្នកយកព័ត៌មានថា ពាក់ព័ន្ធនឹងច្បាប់ឈួសឆាយគឺមាន នៅនិងលោក ចាន់ រតនា នាយករងរដ្ឋបាលសាលាខេត្តមណ្ឌលគិរី ។ នាយករងរដ្ឋបាលសាលាខេត្តមណ្ឌលគិរី លោក ចាន់ រតនា ឱ្យដឹងថា ករណីនេះរដ្ឋបាលអនុញ្ញាតឲ្យសំអាតដីស្រែចាស់ៗដែលមានកូនឈើនិងព្រៃតិចតួច ប៉ុន្តែដល់អ្នកពត៌មាន សុំមើលឯកសារផ្លូវច្បាប់ លោកថា ចាំសុំគោលការណ៍ពីមេខេត្ត ។
លោក តាយ សេង ដែលគេស្គាល់ថា ជានាយកក្រុមហ៊ុន តាយ សេង អ្នកយកព័ត៌មានយើងមិនអាចសុំការបំភ្លឺបានឡើយ ដោយទូរស័ព្ទចូលគ្មានអ្នកលើកទទួល ។ ចំណែក ឯកឧត្តម ថង សាវុន អភិបាលខេត្តមណ្ឌលគិរី និងជាប្រធានគណៈកម្មាធិការគ្រប់គ្រងដីរដ្ឋថ្នាក់ខេត្តអ្នកយកព័ត៌មានយើងមិនទាន់អាចសុំការពន្យល់បានទេ ព្រោះព្រឹកថ្ងៃទី១៦ ខែកុម្ភៈ ឆ្នាំ២០២២ នេះឯកឧត្តមទៅចូលរួមក្នុងកម្មវិធីសម្ពោធផ្លូវស្ពាននៅខេត្តក្រចេះ៕
ចែករំលែកព័តមាននេះ