ចាប់បានហើយ មុខសញ្ញាយ៉ាងសកម្ម ក្រោយស្រាវជ្រាវអស់ជាច្រើនខែ
- កណ្តាល
ចោលួចម៉ូតូយ៉ាងសកម្មម្នាក់ ត្រូវបាននគរបាលក្រុងតាខ្មៅ ធ្វើការស្រាវជ្រាវអស់ជាច្រើនខែ ទម្រាំធ្វើការឃាត់ខ្លួនបានហើយ ។ ហេតុការណ៍នេះបានកើតឡើងតាំងពី
ខេត្តកណ្តាល ៖ ចោលួចម៉ូតូយ៉ាងសកម្មម្នាក់ ត្រូវបាននគរបាលក្រុងតាខ្មៅ ធ្វើការស្រាវជ្រាវអស់ជាច្រើនខែ ទម្រាំធ្វើការឃាត់ខ្លួនបានហើយ ។ ហេតុការណ៍នេះបានកើតឡើងតាំងពីថ្ងៃទី១២ ខែតុលា ឆ្នាំ២០២១ វេលាម៉ោង១៣និង៣០នាទីរសៀល នៅចំណុចមុខបន្ទប់ផ្ទះជួល ស្ថិតក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល និងធ្វើការឃាត់ខ្លួនបាននៅថ្ងៃទី១៦ ខែកុម្ភៈ ឆ្នាំ២០២២ នេះ នៅក្រុងតាខ្មៅ ។
បើតាមនគរបាលក្រុងតាខ្មៅ បានអោយដឹងថា ជនរងគ្រោះមានឈ្មោះសួន ចន្ធី ភេទប្រុស អាយុ៤១ឆ្នាំ ជាជនជាតិខ្មែរ មានទីលំនៅផ្ទះជួលក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរអង្គរក្ស។ ចំណែកជនសង្ស័យមានឈ្មោះកៀក ប៊ិន ភេទប្រុស អាយុ៣៨ឆ្នាំ ជាជនជាតិវៀតណាម ស្នាក់នៅផ្ទះជួលក្នុងភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរមិនពិតប្រាកដ ។
បើតាមរាយការណ៍របស់សមត្ថកិច្ចបានបញ្ជាក់ថា នៅមុនពេលកើតហេតុ ជនរងគ្រោះបានចតម៉ូតូទុកនៅមុខបន្ទប់ជួលរបស់ខ្លួន ដោយមិនបានដកសោចេញពីម៉ូតូនោះទេ រួចហើយជនរងគ្រោះក៏បានដើរចូលទៅក្នុងបន្ទប់ហូបបាយ និងដេកលេង ។ លុះដល់វេលាកើតហេតុខាងលើ ស្រាប់តែលេចមុខជនសង្ស័យបានធ្វើសកម្មភាពលួចបញ្ឆេះម៉ូតូ រួចជិះចេញ ទើបជនរងគ្រោះចេញមកមើល ក៏ស្រាប់តែឃើញជនសង្ស័យកំពុងតែជិះម៉ូតូរបស់ខ្លួន ភ្លាមៗនោះជនរងគ្រោះជិះម៉ូតូដេញតាមដែរ ប៉ុន្តែតាមមិនទាន់ឡើយ។
ប្រភពដដែលបន្តថា បន្ទាប់មកជនរងគ្រោះបានទៅដាក់ពាក្យបណ្តឹងនៅប៉ុស្តិ៍តាខ្មៅ ដើម្បីជួយធ្វើការស្រាវជ្រាវតាមកាមេរ៉ាសុវត្ថិភាព ហើយក៏បានកំណត់មុខសញ្ញា រហូតដល់ថ្ងៃទី១៦ ខែកុម្ភ: ឆ្នាំ២០២២ ទើបឃាត់ខ្លួនជនសង្ស័យបាននាំយកទៅសាកសួរនៅប៉ុស្តិ៍ ។ ហើយនៅចំពោះមុខសមត្ថកិច្ច ជនសង្ស័យបានឆ្លើយសារភាពថា «ខ្លួនពិតជាបានលួចយកម៉ូតូរបស់ជនរងគ្រោះពិតមែន ហើយបានយកទៅបញ្ចាំនៅម្តុំផ្សារឃ្លាំងរំសេវ បានលុយចំនួន២០០ដុល្លារ និងចាយអស់បាត់ទៅហើយ»។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលក្រុងតាខ្មៅ ដើម្បីបន្តនីតិវិធីហើយ។
ចែករំលែកព័តមាននេះ