ខេត្តកណ្តាល ៖ ចោរស្រីប្រើល្បិចខ្លាំងយកលុយទៅសងគេ បន្លំចូលក្នុងផ្ទះលួចយកគ្រឿងអលង្ការតម្លៃសរុបខ្ទង់ម៉ឺនដុល្លារ និងប្រើល្បិចបោកសមត្ថកិច្ច ទីបំផុតត្រូវសមត្ថកិច្ចក្របួចជាប់វៃខ្នោះ ដែល ហេតុការណ៌នេះបានកើតឡើង នៅវេលាម៉ោង១០និង៣០នាទី ថ្ងៃទី០៩ ខែកុម្ភៈ ឆ្នាំ២០២២ នៅចំណុចលើផ្ទះជនរងគ្រោះភូមិបឹងគ្រំលើ ឃុំបឹងគ្រំ ស្រុកល្វាឯម ខេត្តកណ្ដាល ។
នគរបាលស្រុកល្វាឯមបានប្រាប់អោយដឹងថា ជនរងគ្រោះឈ្មោះ ស៊ុំ សាវ៉ន ភេទស្រី អាយុ៤៥ ឆ្នាំ ជនជាតិខ្មែរ មុខរបរកសិករ មានទីលំនៅ ភូមិបឹងគ្រំលើ ឃុំបឹងគ្រំ ស្រុកល្វាឯម ខេត្តកណ្តាល ។ ចំណែកជនសង្ស័យឈ្មោះ រាជ យាទ ភេទស្រី អាយុ៤៣ឆ្នាំ ជនជាតិខ្មែរ មុខរបរកសិករ មានទីលំនៅទីលំនៅ ភូមិបឹងគ្រំលើ ឃុំបឹងគ្រំ ស្រុកល្វាឯម ខេត្តកណ្តាល ។
បើតាមរបាយការណ៌របស់សមត្ថកិច្ចបានបញ្ជាក់ថា ជនរងគ្រោះឈ្មោះ ស៊ុំ សាវ៉ន បានត្រឡប់មកពីចូលបុណ្យខួប៧ថ្ងៃ នៅផ្ទះរបស់ឈ្មោះ ខេន ហើយបានឡើងទៅលើផ្ទះស្រាប់តែឃើញជនសង្ស័យឈ្មោះ រាជ យាទ ពួនសម្ងំក្នុងកន្ទេលក្រហម ដែលដាក់ហាលលើបង្កាន់ដៃរៀនហាលលើផ្ទះ ពេលនោះជនរងគ្រោះមានអារម្មណ៍ភាន់ភាំងនិយាយមិនកើតដោយមិនបានសួរនាំទៅ ជនសង្ស័យឈ្មោះរាជ យាទ ទេហើយជនរងគ្រោះក៏បានចូលទៅក្នុងផ្ទះហៅកូនស្រីឈ្មោះយិន ចន្ថា ឲ្យឡើងទៅលើផ្ទះ ស្រាប់តែជនសង្ស័យបានបើកទ្វារផ្ទះហើយស្រែកប្រាប់ជនរងគ្រោះថា ចាំល្ងាចចាំយកលុយមកសងលុយដែលជំពាក់ ជនរងគ្រោះចំនួន៥ម៉ឺនរៀលកន្លងមកនោះ រួចចុះពីលើផ្ទះជនរងគ្រោះដើរយ៉ាងលឿនទៅបាត់ទៅ ។
បន្ទាប់ភ្លាមនោះ ជនរងគ្រោះក៏ចូលទៅមើលក្នុងបន្ទប់របស់កូនស្រីឈ្មោះយិន ចន្ថា ឃើញទូរដែលដាក់លុយ និងមាសមានសភាពមិនប្រក្រតី ហើយក៏ពិនិត្យមើលទើបដឹងថា បាត់លុយ និងមាសដែលដាក់ទុកនៅក្នុងទូរនោះអស់ ភ្លាមនោះជនរងគ្រោះបានទៅប្ដឹងសមត្ថកិច្ចប៉ុស្តិ៍នគរបាលរដ្ឋបាលបឹងគ្រំ ។
សមត្ថកិច្ចបានតាមរកហៅជនសង្ស័យមកសាកសួរនៅចំពោះមុខសមត្ថកិច្ចដែលបានសាកសួរ នៅថ្ងៃទី០៩ម្តង និងថ្ងៃទី១០ ខែកុម្ភៈ ឆ្នាំ២០២២ ជនសង្ស័យពុំសារភាពឡើយដោយបញ្ជាក់ហេតុផលថា គេ(ជនសង្ស័យ)ឡើងទៅលើផ្ទះជនរងគ្រោះនោះ គឺទៅប្រាប់ជនរងគ្រោះថា លុយដែលជំពាក់៥ម៉ឺនរៀល រង់ចាំល្ងាចទើបយកទៅសង ប្រាប់រួចក៏ចុះត្រឡប់មកផ្ទះវិញហើយយកម៉ូតូកូនដែលទើបចេញពីរៀនទៅដូរប្រាក់ចំនួន៥០០ដុល្លារ ដូរជាប្រាក់រៀល នៅកន្លែងវីងវេលុយ ស្ថិតក្នុងឃុំល្វាសរ បញ្ជាក់ប្រាប់សមត្ថកិច្ចថា ជាប្រាក់ដន្លងនៅខេត្តស្វាយរៀងផ្ញើមកឲ្យ និងបានយកវិកយបត្រដកប្រាក់មកឲ្យសមត្ថកិច្ច ។
នៅថ្ងៃទី១២ ខែកុម្ភៈ ឆ្នាំ២០២២ សមត្ថកិច្ចបានហៅជនសង្ស័យមកសាកសួរម្ដងទៀតទើបជនសង្ស័យបានសារភាពថា គេ(ជនសង្ស័យ)ពិតជាបានឡើងទៅលើផ្ទះជនរងគ្រោះហើយឃើញកញ្ចប់លុយ និងមាសច្រកថង់ពណ៌ខ្មៅ នៅជ្រុះក្បែរបង្កាន់ដៃលើផ្ទះជនរងគ្រោះឃើញមានលុយគេ (ជនសង្ស័យ) ក៏រើសយកកញ្ចប់ថង់ពណ៌ខ្មៅនោះមកផ្ទះតែម្ដង ហើយយកទៅលាក់ទុកក្នុងការ៉ុងច្រកកញ្ចប់ថង់ច្រកផ្លែស្វាយលាក់ទុកនៅក្នុងរោងក្រោយផ្ទះហើយបានដកយកតែលុយចំនួន 700 ដុល្លារយកទៅដូរចាយនឹងសងគេ ។
ចំពោះវិក្កយបត្រដកប្រាក់ចំនួន 500 ដុល្លារដែលយកមកបង្ហាញឱ្យសមត្ថកិច្ចនោះ គឺនៅថ្ងៃទី១០ ខែកុម្ភៈ ឆ្នាំ២០២២ ក្រោយពីសមត្ថកិច្ចហៅមកសាកសួរហើយបានឲ្យត្រឡប់ទៅផ្ទះវិញគេ (ជនសង្ស័យ) បានទៅធ្វើជាល្បិចផ្ទេរប្រាក់ចំនួន 500 ដុល្លារនឹងដកនៅកន្លែងនោះភ្លាមវិញចំនួន 500 ដុល្លារ ដើម្បីបានវិក្កយបត្រដកប្រាក់យកមកបង្ហាញសមត្ថកិច្ច ដើម្បីបំភ័ន្តថា ប្រាក់ចំនួន 500 ដុល្លារនោះ គឺជាប្រាក់ដែលដន្លងផ្ញើមកឱ្យមែន ។ បច្ចុប្បន្នជនសង្ស័យបាននាំមកអធិការដ្ឋាននគរបាលស្រុកល្វាឯម ដើម្បីបន្តចាត់ការតាមនីតិវិធី ៕
ចែករំលែកព័តមាននេះ