ប្រទេសចិន ៖ យោងតាមការអង្កេតផ្លូវការមួយបង្ហាញកាលពីថ្ងៃចន្ទកន្លងមកថា វិស័យអចលនទ្រព្យចិនបានបន្តរើបឡើងវិញ ប៉ុន្តែស្ថិតក្នុងល្បឿនយឺតនៅអំឡុងខែមិថុនា ។ ដោយឡែក មានទីក្រុងមួយចំនួនបានរាយការណ៍ពី
ប្រទេសចិន ៖ យោងតាមការអង្កេតផ្លូវការមួយបង្ហាញកាលពីថ្ងៃចន្ទកន្លងមកថា វិស័យអចលនទ្រព្យចិនបានបន្តរើបឡើងវិញ ប៉ុន្តែស្ថិតក្នុងល្បឿនយឺតនៅអំឡុងខែមិថុនា ។ ដោយឡែក មានទីក្រុងមួយចំនួនបានរាយការណ៍ពីការកើនឡើងពីមួយខែទៅមួយខែចំពោះតម្លៃផ្ទះថ្មី ។
ការិយាល័យស្ថិតិជាតិ (NBS) បាននិយាយថា ទីក្រុងទាំងទំហំមធ្យម និងតូចចំនួន៧០ ដែលបានអង្កេតរួចមក ក្នុងនោះតម្លៃផ្ទះថ្មីក្នុង៥៥ទីក្រុង បានកើនឡើងពីមួយខែទៅមួយខែ ។
ទន្ទឹមគ្នានេះដែរ ទីក្រុងចំនួន១០បានរាយការណ៍ថា ពីមួយខែទៅមួយខែ តម្លៃបានធ្លាក់ចុះ ។ នេះបើយោងតាមទិន្នន័យរបស់ NBS ។
ជារៀងរាល់ឆ្នាំ ៥៧ទីក្រុងបានប្រកាសពីកំណើនតម្លៃផ្ទះថ្មី និង១២ទីក្រុងទៀតបានរាយការណ៍ពីការធ្លាក់ចុះក្នុងខែមិថុនា ។
តម្លៃផ្ទះថ្មីបានកើនឡើង៤៧,៤%ពីមួយឆ្នាំទៅមួយឆ្នាំ នៅភាគខាងត្បូងនៃទីក្រុង Shenzhen ដែលវាជាកំណើនខ្លាំងបំផុតក្នុងអំឡុងខែមិថុនា ក្នុងចំណោមបណ្តាទីក្រុងធំៗក្នុងប្រទេស។ ប៉ុន្តែកំណើននេះ គឺតិចជាងការកើនឡើងនៅខែឧសភា ដែលកើនដល់៥៤% ។
កំណើនតម្លៃពីមួយឆ្នាំទៅមួយឆ្នាំនៅក្នុងទីក្រុង Shanghai បានកើនឡើង៣៣,៧%, នៅទីក្រុង Beijing ២២,៣% និងទីក្រុង Guangzhou ១៩,៤% ។
គួររំលឹកថា នៅភាគឦសាននៃទីក្រុង Jinzhou បានធ្លាក់ចុះតម្លៃយ៉ាងខ្លាំង ពោលគឺ៣,៥% ក្នុងរយៈពេលជាងមួយឆ្នាំមុន ។
ទីផ្សារលំនៅឋានបានចាប់ផ្តើមរើបឡើងវិញក្នុងឆមាសទី២ ឆ្នាំ២០១៥ បន្ទាប់ពីរាំងស្ទះអស់ជាងមួយឆ្នាំរួចមក ដែលនេះជាកិច្ចខិតខំប្រឹងប្រែងពីរដ្ឋាភិបាល ក្នុងនោះរួមមានការកាត់បន្ថយអត្រាការប្រាក់ និងតម្រូវការប្រាក់បញ្ញើទាប ។
យ៉ាងណាមិញ ការរើបឡើងវិញនេះ មិនកើនឡើងគ្រប់ទីក្រុងនោះទេ ដោយតំបន់សេដ្ឋកិច្ចខ្ពស់រាយការណ៍ថា តម្លៃបានកើនឡើងយ៉ាងខ្លាំង ខណៈនៅតាមតំបន់អភិវឌ្ឍន៍តិចតួចរាយការណ៍មកថា មានលំនៅឋានជាច្រើនមិនទាន់លក់អស់នៅឡើយ ។
ភាពមិនស្មើគ្នានៃការរីកលូតលាស់នេះ បានជំរុញឱ្យអាជ្ញាធរក្នុងតំបន់ចាត់វិធានការខុសៗគ្នា ដូចជា ក្នុងទីក្រុង Shenzhen និង Shanghai បានរឹតបន្តឹងគោលនយោបាយមួយចំនួនដើម្បីទប់ស្កាត់ការទិញទាំងប្រថុយប្រថាន និងហានិភ័យផ្សេងៗ ខណៈបណ្តាទីក្រុងទី៣ ទី៤ កំពុងរកមធ្យោបាយថ្មីៗដើម្បីជំរុញការលក់របស់ខ្លួន ៕
ចែករំលែកព័តមាននេះ