ខេត្តសៀមរាប ៖ រឿងក្រុមហ៊ុនជីកដីចំនួនពីរដណ្តើមកំណប់គ្នានៅបឹងពារាំង ឈានដល់ផ្ទុះហិ.ង្សា.បង្ករបួសស្នាមរហូតអាជ្ញាធរចុះបិទអាជីវកម្ម ពេលនេះ បានបើកឱ្យដំណើរការវិញហើយ ខណៈបានចរចាត្រូវរ៉ូវ និង សម្របសម្រួលតាមសន្តិវិធី ។
សូមបញ្ជាក់ថា ការដែលផ្ទុះរឿងហិ.ង្សា.និងប៉ុនប៉ងមនុស្សឃា.ត.ផ្អើលមនុស្សម្នាស្ទើរទូទាំងខេត្តសៀមរាប ហើយត្រូវបានអាជ្ញាធរចុះបិទអាជីវកម្មជីកដីទាំង២ក្រុមហ៊ុន មិនទាន់បានមួយដង្ហើមចង្រិតផងក៏បើកឱ្យដំណើរការវិញបែបនេះគេសង្ស័យថា អាចចរចាពីផលប្រយោជន៍ត្រូវគ្នាវិញតាមប្រព័ន្ធ ។
បើលោក ហាយ យង់ មន្ត្រីតំណាងសាលាក្រុងសៀមរាប ដែលដឹកនាំកម្លាំងសមត្ថកិច្ចចុះបិទ និងបើកដំណើរ ការជីកដីក្នុងបឹងពារាំងនាថ្ងៃទី១២ កុម្ភៈ ២០២២ នេះបានប្រាប់ថា រឿងបង្ករបួសស្នាមដែលជាបទល្មើសព្រហ្មទណ្ឌកំពុងស្ថិតក្នុងដៃសមត្ថកិច្ច ។ ឯរឿងជីកស្តារបឹងពារាំង គឺបើកឱ្យដំណើរការវិញហើយ កាលពីថ្ងៃទី៦ ខែកុម្ភៈ កន្លងទៅថ្មីៗនេះ ។
លោកបន្តថា ក្នុងការបើកវិញនេះ អាជ្ញាធរតម្រូវឱ្យអនុវត្តតាមលក្ខខណ្ឌចំនួន៣៖ ទី១-ក្រុមហ៊ុនជីកដីទាំង ពីរត្រូវសហការជាមួយសហ គមន៍ទាំងពីរ (សហគមន៍ទេស ចរណ៍ បឹងពារាំង.សហគមន៍នេសាទចុងឃ្នៀស)។ ទី២- ស្រោច ទឹកនិងជួសជុលផ្លូវរួមគ្នាជាប្រចាំនិង ទី៣-អនុវត្តត្រឹមតែតាមគម្រោង ប្លង់ប៉ុណ្ណោះ ក្នុងករណីបំពាននឹងត្រូវដក ហូតអាជ្ញាបណ្ណ័បណ្តោះអាសន្ន ។
ក្រៅពី៣-ចំណុចខាងលើ នោះ លោក ហាយ យង់ បានបន្ថែមថា ក្នុងគម្រោងគឺមានចាក់ដីរៀបចំសម្អាត មាត់ បឹង និង ចាក់ដីបង្កើតជាកោះនៅក្នុងបឹងពារាំងទៀតផង។ ចំណែកអាចម៍ដីដែលត្រូវដឹកចេញ ទៅចាក់លើទីតាំងផ្សេង គឺគ្រាន់តែមួយចំណែកក្នុងការដោះដូរជាមួយប្រេងសម្រាប់ប្រើប្រាស់គ្រឿងចក្រប៉ុណ្ណោះ ។
ទោះជាមានការអះអាងបែបនេះ ប៉ុន្តែមន្ត្រីសហគមន៍មួយរូប ដែលប្រចាំការនៅតំបន់បឹងពារាំង និយាយថា ក្រុមហ៊ុនជីកដីទាំងពីរខាងលើ មិនទាន់បានអនុវត្តតាមលក្ខខណ្ឌរបស់អាជ្ញាធរនៅឡើយទេ។ សោភណ្ឌភាពមាត់បឹង មិនទាន់មានចាក់ដីសូម្បី១ឡាន ។ ឯកោះក្នុងបឹងដែលត្រូវបង្កើតនោះ ក៏មិនទាន់ឃើញមានចាក់ដី ១ ឡានផង។ ផ្ទុយទៅវិញ ក្រុមហ៊ុនទាំងពីខាងលើ ដណ្តើមគ្នាសម្រុកដឹកដីចេញយកទៅលក់តាមទីផ្សារសាធារណ: បង្កការខូចផ្លូវ បង្កការហុយបោកបក់ ប៉ះ ពាល់សុខមាលភាពរបស់ប្រជាពលរដ្ខជាប្រចាំ ។
ព្រោះតែផលប្រយោជន៍ទាំងនេះ តំបន់ទេសចរណ៍ បឹងពារាំង ក៏បានក្លាយជាទីលានប្រយុទ្ធគ្នាដ៏សាហាវ ដោយថៅកែរណ្តៅដីឈ្មោះ សាន្ត រដ្ឋស៊ីង វាយទៅលើប្រធានសហគមន៍នេសាទចុងឃ្នៀស ឈ្មោះហាប់ ដា ចំនួន២ដៃ បណ្តាលឱ្យរងរបួស រហូតមានការប្តឹងប្តល់ក្នុងបទប៉ុនប៉ងមនុស្សឃា.ត.ទៀតផង។
គួរបញ្ជាក់ថា បឹងពារាំងជាបឹងធម្មជាតិដ៍ធំមួយស្ថិតនៅផ្នែកខាង ត្បូងនៃសង្កាត់ជ្រាវ មានផ្ទៃទឹកជាប់បឹងទន្លេសាបនារដូវវស្សា ។ បឹងធម្មជាតិមួយនេះ ជាតំបន់អភិរក្សត្រីមេពូជ ដ៌សំខាន់ក្នុងខេត្តសៀមរាប។ បឹងនេះត្រូវបានអនុញ្ញាតឱ្យមានការជីកស្តារ ដើម្បីរក្សាទឹកសម្រាប់សង្គ្រោះ ត្រីនិងសត្វស្លាបនារដូវប្រាំង ។ ប៉ុន្តែដោយការដណ្តើមប្រយោជន៍គ្នា ក្រុមហ៊ុនជីកដីទាំងពីរខាងលើមិនគោរពកិច្ចសន្យា ហើយឈានដល់បង្ករបួសស្នាម ទើបអាជ្ញាធរសម្រេចបិទអាជីវកម្មជីកដី កាលពីថ្ងៃទី៣ខែ កុម្ភៈ ឆ្នាំ២០២២ ។ តែទំនងជាមានការចរចាបែងចែកអំពីផលប្រយោជន៍ត្រូវគ្នាវិញ ទើបនៅថ្ងៃទី០៦ កុម្ភ ២០២២ មានការបើកឱ្យជីកនិងដឹកដីយកទៅលក់ជាធម្មតាវិញ ។
ព័ត៌មានបន្ថែមនឹងមានផ្សាយជូនលើកាសែតកោះសន្តិភាព ។
ចែករំលែកព័តមាននេះ