សាលាដំបូងខេត្តសៀមរាប បង្គាប់ឱ្យចៅសង្កាត់និងចៅសង្កាត់រងទី១ រួមគ្នាសងប្រាក់ជាង១១ម៉ឺនដុល្លារ
- សៀមរាប
ខេត្តសៀមរាប ៖ ចៅក្រមសាលាដំបូងខេត្តសៀមរាបបានចេញសាលក្រមមួយ ដោយបង្គាប់ឲ្យលោក គង់ ប៊ឹប ចៅសង្កាត់រងទី១ និងលោក ក្អោប រ៉ន…
ខេត្តសៀមរាប ៖ ចៅក្រមសាលាដំបូងខេត្តសៀមរាបបានចេញសាលក្រមមួយ ដោយបង្គាប់ឲ្យលោក គង់ ប៊ឹប ចៅសង្កាត់រងទី១ និងលោក ក្អោប រ៉ន ចៅសង្កាត់ជ្រាវ ក្រុងសៀមរាប រួមគ្នាសងប្រាក់ប្រមាណជាង១១ម៉ឺនដុល្លារទៅឲ្យម្ចាស់គ្រឿង កាយដីក្នុងគម្រោងបារាយណ៍សិប្បនិមិត្តសម្តេចមហាសង្ឃរាជ ទេព វង្ស វិញ នៅ ថ្ងៃទី៧ខែកុម្ភ:ឆ្នាំ២០២២ ។
យោងតាមសាលក្រមលេខ៣៣ ចុះថ្ងៃទី២៣ ខែធ្នូ ឆ្នាំ២០២១ បានឲ្យដឹងថា នៅក្នុងអំឡុងខែកុម្ភៈ ឆ្នាំ២០១៩ ឈ្មោះ ជា គីមឆែ ដែលជាម្ចាស់គ្រឿងចក្រ បានចុះកិច្ចសន្យាជាមួយសហចុងចម្លើយ ដើម្បីជីកស្រះ និងដឹកដី ចាក់ដី បង្វិលក្នុងចំណុចទីតាំងភូមិសាស្ត្រ សង្កាត់ជ្រាវ ក្រុងសៀមរាប ខេត្តសៀមរាប ដែលមានចំនួន៦ហិតានិងជម្រៅ៦ម៉ែត្រ ដែលជារបស់សហចុងចម្លើយ ហើយមានតម្លៃពលកម្មក្នុងការជីក១ម៉ែត្រគូប មានតម្លៃ១ដុល្លារបីកាក់ ឬប្រហាក់ប្រហែលតម្លៃសរុបចំនួន៤៦៨ពាន់ដុល្លាអាមេរិកក្នុងមួយរណ្តៅដី ។
លុះក្រោយមក នៅពេលដើមចោទ ជា គីមឆែ ហៅស៊ីង ធ្វើដីបានចំនួន១៨៣,១៤៩ម៉ែត្រគូប ដែលមាន តម្លៃសរុបចំនួនប្រមាណ២៣៨ ពាន់ដុល្លាអាមេរិក បើគិតជាភាគរយស្មើនឹង៥០%នោះ ចុងចម្លើយបានទូរទាត់លុយជាក់ស្ដែងបានទទួលតែចំនួន១០៣,៤៨០ដុល្លារប៉ុណ្ណោះ ។
យោងតាមសាលក្រមដដែលបានឲ្យដឹងថា ក្នុងអំឡុងខែមេសា ឆ្នាំ២០១៩ សហចុងចម្លើយបានផ្អាកការងាររបស់ដើមចោទ ដោយមិនទាន់បានទូទាត់ថ្លៃពលកម្មដែលនៅសេសសល់ចំនួនជាង១៣ម៉ឺនដុល្លារនោះទេ ដោយសហចុងចម្លើយទទួលស្គាល់ និងគ្រាន់តែថាខ្លួននឹងទូទាត់ឲ្យនៅពេលក្រោយ ។ ទោះយ៉ាងណា ដើមចោទក៏បានធ្វើការទាក់ទងទៅរកសហចុងចម្លើយជាច្រើន លើកច្រើនសារ តែសហចុងចម្លើយបានត្រឹមតែសន្យាថា នឹងទូរទាត់ថ្លៃពលកម្មនៅថ្ងៃនេះថ្ងៃនោះជាច្រើនលើកច្រើនសារប៉ុណ្ណោះ។
បើយោងតាមប្រសាសន៍របស់ លោក ជា គីមឆែ បានរៀបរាប់ថា ដោយសារតែលោក ក្តោប រ៉ន ចៅសង្កាត់ជ្រាវ និង លោក គង់ ប៊ិប ចៅសង្កាត់រងទី១ មានការគេចវេស មិនព្រមសង ដូច្នេះ ទើបលោក តាមរយៈមេធាវី បានដាក់ពាក្យបណ្តឹងចូលតុលាការសាលាដំបូងខេត្តសៀមរាប ដើម្បីឲ្យស្ថាប័នច្បាប់មួយនេះជួយរកយុត្តិធម៌ ឲ្យគាត់។
ជុំវិញករណីខាងលើនេះដែរ កោះសន្តិភាពមិនអាចទាក់ទងលោក គង់ ប៊ឹប បាន ទេនៅព្រឹកថ្ងៃទី០៨ ខែកុម្ភៈ ឆ្នាំ២០២២ នេះទេ ដោយសារទូរស័ព្ទហៅចូលគ្មានអ្នកទទួល។ប៉ុន្តែកាលពីពេលកន្លងទៅថ្មីៗ នេះដែរ លោក គង់ប៊ឹប បានឲ្យដឹងថា រឿងនេះកំពុងតវ៉ាគ្នាតាមផ្លូវតុលាការសាលាឧទ្ធរណ៍ ដូច្នេះ ទុក្ខឲ្យតុលាការជាអ្នកសម្រេច៕
ចែករំលែកព័តមាននេះ