បន្ទាយមានជ័យ៖ ជនសង្ស័យ ៤នាក់ ក្នុងនោះ មានស្ត្រីម្នាក់ ជិះម៉ូតូ ឆក់ទូរសព្ទដៃយ៉ាងសកម្ម ត្រូវបានកម្លាំងនគរបាលក្រុងប៉ោយប៉ែត ស្រាវជ្រាវ ចាប់ឃាត់ខ្លួន…
បន្ទាយមានជ័យ៖ ជនសង្ស័យ ៤នាក់ ក្នុងនោះ មានស្ត្រីម្នាក់ ជិះម៉ូតូ ឆក់ទូរសព្ទដៃយ៉ាងសកម្ម ត្រូវបានកម្លាំងនគរបាលក្រុងប៉ោយប៉ែត ស្រាវជ្រាវ ចាប់ឃាត់ខ្លួន បានជាបន្តបន្ទាប់ កាលពីម៉ោង ៨ និង ៤០នាទី យប់ថ្ងៃទី៣ ខែកុម្ភៈ ឆ្នាំ២០២២ នៅចំនុចកែងផ្សារអគ្គៈ នៅជិតកន្លែងលក់ជ្រូកខ្វៃ ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា មុខសញ្ញាជនសង្ស័យទាំង ៤នាក់ តែងធ្វើសកម្មភាពឆក់ទូរសព្ទដៃ និងប្រើអំពើហឹង្សា ត្រូវបានបង្រ្កាប រួមមាន៖ ១/- ឈ្មោះ នី ផានិត ភេទប្រុស អាយុ ១៨ ឆ្នាំ ២/-ធន់ ពិសិដ្ឋ ភេទប្រុស អាយុ ១៧ឆ្នាំ ៣/- ប៉ែន សុលាភ ភេទ ប្រុស អាយុ ១៧ឆ្នាំ ៤/- លឹម ទីយ៉ា ភេទស្រី អាយុ ១៨ឆ្នាំ ជាប្រពន្ធរបស់ឈ្មោះ នី ផានិត។ ក្នុងប្រតិបត្តិការនេះ កម្លាំងនគរបាលយើង បានដកហូតម៉ូតូចំនួន ០២គ្រឿង ជាមធ្យោបាយប្រព្រឹត្តបទល្មើស។
លោកអធិការ បានបញ្ជាក់ថា នៅចំពោះមុខសមត្ថកិច្ច ជនសង្ស័យ ១/ឈ្មោះ នី ផានិត ២/ឈ្មោះ ធន់ ពិសិដ្ឋ ៣/ ប៉ែន សុខលាភ បានសារភាពថា ពួកគេពិតជាបានធ្វើសកម្មភាពឆក់ទូរសព្ទដៃ ជាច្រើនលើក នៅក្នុងក្រុងប៉ោយប៉ែតនោះមែន។ ចំណែកឈ្មោះ លឹម ទីយ៉ា ជាប្រពន្ធ របស់ នី ផានិត បានសារភាពថានាងដឹងថា ប្តីនាងជាចោរឆក់ទូរសព្ទដៃដែរ ហើយពេលឆក់ និងបានលុយ ប្តីតែងឲ្យនាងជាអ្នកទុក។ ចំណែកថ្លៃផ្ទះសំណាក់ ប្តីនាង នី ផានិត ជាចេញ។
លោកអធិការ បានបញ្ជាក់ថា ជនសង្ស័យ ប្រុសស្រីទាំង ០៤នាក់ ត្រូវបានកម្លាំងនគរបាល ជំនាញផ្នែកព្រហ្មទណ្ឌ បានរៀបចំសំណុំរឿង បញ្ជូនទៅស្នងការដ្ឋាននគរបាល ខេត្តបន្ទាយមានជ័យ នៅរសៀលថ្ងៃទី០៤ ខែកុម្ភៈ ឆ្នាំ២០២២ ដើម្បីចាត់ការតាមនីតិវិធី៕ ណុប រក្សា
ចែករំលែកព័តមាននេះ