ខេត្តកំពង់ស្ពឺ ៖ ទាហានភូមិភាគ៣ម្នាក់ ជាឈ្មួញឈើដុះស្លែប្រចាំខេត្តកំពង់ស្ពឺម្នាក់ ត្រូវបានដោះលែងឱ្យមានសេរីភាពវិញហើយ បន្ទាប់ពីជននេះយល់ព្រមសងសំណង ក្នុងការជួសជុលស្ពាន និងបង់ពិន័យចំពោះឈើខុសច្បាប់ដល់ស្ថាប័នពាក់ព័ន្ធរួចមក ។ ការដោះលែងឈ្មួញឈើឈ្មោះជឿង ថេង នេះ ធ្វើឡើងកាលពីល្ងាចថ្ងៃទី១៥ កក្កដា ២០១៦ ដោយអយ្យការអមសាលាដំបូងខេត្តកំពត។
តាមប្រភពពីមន្ត្រីសាលាដំបូងខេត្តកំពត បានបង្ហើបប្រាប់នៅព្រឹកថ្ងៃទី១៨ កក្កដា ២០១៦ ថា ការដោះលែងនេះធ្វើឡើង បន្ទាប់ពីជននេះបានយល់ព្រមសងសំណង ក្នុងការជួសជុលស្ពានដែលបាក់ឡើងវិញ ក្នុងនោះក៏មានការបង់ពិន័យខាងរដ្ឋបាលព្រៃឈើផងដែរ ។
ប្រភពបន្តថា ឈ្មោះជឿង ថេង នេះ បានសងសំណងដល់ការធ្វើស្ពានអស់ចំនួន (ពីររយម្ភៃពីរលានពីរសែនរៀល) និងបង់ពិន័យឈើចំនួន (មួយរយសាមសិបលានរៀល) នោះ បានឱ្យរថយន្តទៅវិញ ចំណែកឈើមិនឱ្យទេ ។
ដោយឡែក ការចំណាយផ្សេងៗទៀត ពាក់ព័ន្ធនឹងការដោះលែងនេះ មិនត្រូវបានដឹងនោះទេ ទំនងរត់ការអស់ច្រើនណាស់ ។
ប្រភពព័ត៌មាននៅខេត្តកំពង់ស្ពឺនិយាយថា ឈ្មួញឈើជឿង ថេង កាប់ឈើនៅភ្នំឱរ៉ាល់១០ឆ្នាំមកហើយ អស់រលើងពីភ្នំឱរ៉ាល់ ។ ពេលនេះ ចំណាយមិនដល់១០ម៉ឺនដុល្លារផង សេរីភាពស្តារដើមបានវិញមិនខានឡើយ ។
ចែករំលែកព័តមាននេះ