ខេត្តកំពង់ចាម៖ ស្ត្រីចំណាស់ម្នាក់ រួមនឹងកូន​ បានស្លា.ប់ ខណៈពេលកំពុងជិះម៉ូតូ ហើយត្រូវ​រថយន្តមួយគ្រឿង ដែលបើកបរ​ដោយបុរស ស្រវឹងដាប បើកបុកពេញទំហឹង ក្នុងទិសដៅបញ្ច្រាស​ទិសគ្នា​។ ហេតុការណ៍​ដ៏រន្ធ.ត់​នោះ បានកើតឡើង កាលពីថ្ងៃទី២ ខែកុម្ភ: ឆ្នាំ២០២២ វេលាម៉ោង ១៩ និង៥០នាទីយប់ លើផ្លូវខេត្ត លេខ៦០ នៅចំណុច​មុខផ្ទះ ឈ្មោះ ហាក់ ស្ថិតក្នុងភូមិដូនដី ឃុំជ្រៃវៀន ស្រុកព្រៃឈរ។ អ្នកបើកបររថយន្តស្រវឹងដាបនោះ ត្រូវបានកម្លាំងសមត្ថកិច្ច ឃាត់ខ្លួនផង​ដែរ។

លោកវរសេនីយ៍ឯក កែវ ស៊ាងហ៊ន់ អធិការនគរបាលស្រុកព្រៃឈរ ប្រាប់ឲ្យដឹងថា​ រថយន្ត ដែលបុរស​ស្រវឹង​ដាប បើកបរនោះ ម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2T-6754 បើកបរដោយឈ្មោះ ហុង ម៉ាង ភេទប្រុស អាយុ ៤១ឆ្នាំ នៅភូមិដូនធី ឃុំបុសខ្នុរ ស្រុកចំការលើ ខេត្តកំពង់ចាម។ បុរសនោះ បានបើកឡាន​បុកម៉ូតូយ៉ាងពេញទំហឹង ជាហេតុបណ្ដាលឲ្យអ្នកជិះម៉ូតូម្ដាយ និងកូន ស្លា.ប់ភ្លាមៗ​នៅនឹងកន្លែងកើតហេតុ។

អធិការនគរបាលស្រុកព្រៃឈរ ប្រាប់បន្តថា ​មុនកើតហេតុ រថយន្តនោះ បើកក្នុងទិសដៅ ពីជើងទៅត្បូង ហើយបុកម៉ូតូ ម៉ាក ណេវ ប្រភេទឆ្អឹង បើកបរដោយឈ្មោះ មៀច ស្រីម៉ៅ ភេទស្រី អាយុ ៥០ឆ្នាំ ឌុបកូនបង្កើត ឈ្មោះ សុង សុខឃៀម ភេទប្រុស ១៩ឆ្នាំ។ អ្នកទាំងពីរ នៅភូមិទួលចំបក់ ឃុំបារាយណ៍ ស្រុកព្រៃឈរ  ខេត្តកំពង់ចាម។ ទាំងពីរនាក់ មិនពាក់មួកសុវត្ថិភាពទេ។ ម៉ូតូ មានទិសដៅពីត្បូងទៅជើង។

លោកអធិការបន្ថែមថា អ្នកបើកបររថយន្ត មិនប្រកាន់ស្ដាំ និងស្ថិតក្នុងស្ថានភាពស្រវឹងស្រា អត្រាជាតិអាល់កុល ០,៧៩មីលីក្រាម ក្នុងមួយលីត្រខ្យល់។  

បន្ទាប់ពីកើតហេតុ​ភ្លាម ប្រជាពលរដ្ឋ បានរាយការណ៍ ទៅ​កម្លាំងនគរបាលចរាចរណ៍ស្រុក ហើយកងកម្លាំង បានចេញទៅដល់កន្លែងកើតហេតុភ្លាមៗ។ ប៉ូលិស បានឃាត់ខ្លួនអ្នកបើកបររថយន្ត បញ្ជូនមកអធិការដ្ឋាន​នគរបាលស្រុក ដើម្បីសួរនាំ។

លោកវរសេនីយ៍ឯក កែវ ស៊ាងហ៊ន់ បញ្ជាក់​ថា ពេលដែលបញ្ជូនអ្នកបើកបរ មកដល់អធិការដ្ឋាន កម្លាំងមន្ត្រី​ជំនាញ​ចរាចរណ៍ បានសួរនាំ។ បុរសនោះ បានឆ្លើយដោយមិនដឹងទិសតំបន់ក្នុងអាការៈស្រវឹងស្រា។ រហូត​ដល់ព្រឹកថ្ងៃទី៣កុម្ភៈ ជំនាញបានសួរនាំម្ដងទៀត ត្រូវបានបុរសអ្នកបើកបររថយន្តឆ្លើយថា មុនកើតហេតុ រូបគេ​បានផឹកទឹកត្នោតជូរអស់ ២ដប នៅខាងកើតផ្សារព្រៃទទឹង បន្ទាប់មក បានបើករថយន្ដរបស់ខ្លួន ទៅផឹកជាមួយ​មិត្តភ័ក្រ​បន្តទៀត នៅឃុំបារាយណ៍ ក្នុងស្រុកព្រៃឈរ រហូតដល់ស្រវឹង ហើយបើករថយន្ត ចេញមកវិញ ក៏ជួប​នឹង​ហេតុការណ៍គ្រោះថ្នាក់នេះ តែម្ដង៕ ចាន់ ថេត