អនិច្ចាអ្វីម្ល៉េះ! ពីរនាក់គូដណ្តឹងជិតដល់ថ្ងៃចូលរោងការទៅហើយ បាននាំគ្នាជិះម៉ូតូទៅលេងឪពុកម្តាយខាងប្រុសនាថ្ងៃសែនចូលឆ្នាំចិន-វៀតណាម ស្រាប់តែជួប
ខេត្តបន្ទាយមានជ័យ ៖ អនិច្ចាអ្វីម្ល៉េះ! ពីរនាក់គូដណ្តឹងជិតដល់ថ្ងៃចូលរោងការទៅហើយ បាននាំគ្នាជិះម៉ូតូទៅលេងឪពុកម្តាយខាងប្រុសនាថ្ងៃសែនចូលឆ្នាំចិន-វៀតណាម ស្រាប់តែជួបឧប្បត្តិហេតុគ្រោះថ្នាក់ចរាចរណ៍រវាងរថយន្តបុកជាមួយម៉ូតូ បណ្តាលឱ្យខាងប្រុសស្លា.ប់ភ្លាមៗនៅនឹងកន្លែងកើតហេតុ ចំណែកឯខាងស្រីវិញរងរបួសធ្ងន់ ។ ហេតុការណ៍នេះបានកើតឡើងកាលពីវេលាម៉ោង០៧និង៣០នាទីយប់ ថ្ងៃទី៣១ ខែមករា ឆ្នាំ២០២២ នៅចំណុចផ្លូវជាតិលេខ៥ ត្រង់ចំណុចមុខវត្តសិរីមង្គល ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
បើតាមនគរបាលចរាចរណ៍ផ្លូវគោកខេត្ត បានឲ្យដឹងថា ៖ មុនពេលកើតហេតុ មានរថយន្ត០១គ្រឿងម៉ាកLEXUS RX300 ពណ៌ស ពាក់ផ្លាកលេខ ភ្នំពេញ2AQ-3250 បើកបរក្នុងទិសដៅពីជើងទៅត្បូងក្នុងល្បឿនលឿន លុះដល់ចំណុចកើតហេតុផ្លូវកោងក៏បានបុកប៉ះជាមួយនឹងម៉ូតូ០១គ្រឿង ធុនC125 ពណ៌ខ្មៅ ពាក់ផ្លាកលេខ 1BG-1154 ភ្នំពេញ ដែលជិះគ្នា០២នាក់ ក្នុងទិសដៅផ្ទុយគ្នាពីត្បូងទៅជើង បណ្តាលឲ្យអ្នកបើកបរម៉ូតូ (ប្រុស) ស្លា.ប់ភ្លាមៗនៅនឹងន្លែង ចំណែកអ្នករួមដំណើរ (ស្រី) រងរបួសធ្ងន់បាក់ឆ្អឹងត្រគាកទាំងសងខាង ហើយត្រូវបញ្ជូនទៅព្យាបាលសង្គ្រោះនៅមន្ទីរពេទ្យពោ២ ខេត្តបាត់ដំបង ។
ប្រភពដដែលបន្តថា ចំណែកអ្នកបើកបររថយន្តវិញ ក្រោយពេលកើតហេតុក៏បានរត់គេចខ្លួនបាត់បាត់ស្រមោល បន្សល់ទុកតែវត្ថុតាងរថយន្តនិងម៉ូតូរងការខូចខាតធ្ងន់ ហើយត្រូវបានសមត្ថកិច្ចយកមករក្សាទុកនៅការិយាល័យនគរបាលចរាចរណ៍ផ្លូវគោក ដើម្បីរង់ចាំធ្វើការដោះស្រាយនៅពេលក្រោយ ។
តាមការឲ្យដឹងពីឪពុកខាងស្រី បានប្រាប់ថា៖ ជនរងគ្រោះទាំង០២នាក់គឺជាគូដណ្តឹងនឹងគ្នា ដោយខាងប្រុសជាកូនប្រសារមានឈ្មោះ សាមឿង អាយុ៣៥ឆ្នាំ រស់នៅភូមិឈ្នួរមានជ័យ ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ ។ ចំណែកកូនស្រីគាត់បង្កើតមានឈ្មោះ ឈន សូនេតសត្យា អាយុ២២ឆ្នាំ រស់នៅភូមិអូរអណ្តូង ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ។ ពួកគេទាំង០២នាក់ គឺជាគូដណ្តឹងនឹងគ្នា ហើយក៏ជិតដល់ថ្ងៃរៀបការដែរ គឺនៅថ្ងៃទី១២ ខែកុម្ភៈនេះ នឹងបានដើរចែកសំបុត្រអញ្ជើញភ្ញៀវបានមួយចំនួនផងដែរ ។
ប្រភពដដែលបន្តថា នៅមុនពេលកើតហេតុ ពួកគេទាំង០២នាក់បានចេញពីផ្ទះនៅភូមិអូរអណ្តូង ដើម្បីទៅលេងផ្ទះឪពុកម្តាយខាងប្រុស នៅភូមិឈ្នួរមានជ័យ ឃុំឈ្នួរមានជ័យ ស្រុកព្រះនេត្រព្រះ ក៏បានជួបគ្រោះអកុសលនេះតែម្តង ៕
ចែករំលែកព័តមាននេះ