ខេត្តកណ្តាល ៖ បើតាមសេចក្តីរាយការណ៍បានឱ្យដឹងថា យុវជនទំនើង២នាក់ ក្នុងចំណោមប១០នាក់ បានត្រូវលោក ស៊ូ បញ្ញា ចៅក្រមស៊ើបសួរសាលាដំបូងខេត្តកណ្តាល បានសម្រេចចេញដីកាឃុំខ្លួន ដាក់ពន្ធនាគារបណ្តោះអាសន្ន ពីបទ «ធ្វើឱ្យខូចខាតដោយចេតនា» តាមមាត្រា៤១០ នៃក្រមព្រហ្មទណ្ឌ ។ ដែលប្រព្រឹត្តនៅថ្ងៃទី៣០ ខែមករា ឆ្នាំ២០២២ នាវេលាម៉ោង០៣និង១៥នាទី នៅចំណុចហាងមីហិរ ស្ថិតនៅក្នុងភូមិឬស្សីស្រុក២ ឃុំឈើទាល ស្រុកកៀនស្វាយ ខេត្តកណ្តាល។
សេចក្តីរាយការណ៍បន្តថា ជនរងគ្រោះមានឈ្មោះ ផន ស្រីនាង ភេទស្រី អាយុ២៧ឆ្នាំ ជនជាតិខ្មែរ មានទីលំនៅភូមិឬស្សីស្រុក២ ឃុំឈើទាល ស្រុកកៀនស្វាយ ខេត្តកណ្តាល មុខរបរអាជីវករ។ ចំណែកជនត្រូវចោទ ទី១-ឈ្មោះ ស៊ុន តៃលី ភេទប្រុស អាយុ១៨ឆ្នាំ ជនជាតិខ្មែរ មានទីលំនៅភូមិព្រែកជ័រ ឃុំស្វាយប្រទាល ស្រុកស្អាងខេត្តកណ្តាល មុខរបរកម្មករសំណង់ និងទី២- ឈ្មោះ វី លីហ៊ ហៅ ចិន ភេទប្រុស អាយុ១៧ឆ្នាំ ជនជាតិខ្មែរ មានទីលំនៅភូមិព្រែកជ័រ ឃុំស្វាយប្រទាល ស្រុកស្អាង ខេត្តកណ្តាល មុខរបរ កម្មករសិស្ស។
បើតាមសមត្ថកិច្ចមូលដ្ឋានបានឲ្យដឹងថា មុនពេលកើតហេតុ ជនសង្ស័យខាងលើបានជិះម៉ូតូដើរលេងមកខាងម្តុំសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ដោយមានបក្សពួកទាំងអស់ចំនួន១២នាក់ ដោយមានម៉ូតូចំនួន៤គ្រឿង។ លុះដល់ម៉ោង០២និង៣០នាទីរំលងអធ្រាត្រ ឆ្លងចូលថ្ងៃទី៣០ ខែមករា ឆ្នាំ២០២២ ជនសង្ស័យខាងលើ រួមទាំងបក្សពួក បាននាំគ្នាជិះម៉ូតូមកផ្ទះវិញនៅខាងស្រុកស្អាង ប៉ុន្តែពេលជិះមកដល់ម្តុំឃុំឈើទាល ជនសង្ស័យក៏បានឈប់ម៉ូតូ រួចរើសដុំថ្មមួយដុំកាន់ជាប់នឹងដៃ ហើយក៏ជិះម៉ូតូរហូតមកដល់មុខហាងមីហិរ ស្ថិតនៅភូមិឬស្សីស្រុក២ ឃុំឈើទាល ស្រុកកៀនស្វាយ ខេត្តកណ្តាល បន្ទាប់មកជនសង្ស័យឈ្មោះ ស៊ុន តៃលី ក៏បានយកដុំថ្មគប់សំដៅទៅលើហាងមីហិរ ចំនួន០១ដុំ ដោយមានជនសង្ស័យឈ្មោះ ខួច ជាអ្នកបើកម៉ូតូ ចំណែកជនសង្ស័យម្នាក់ទៀតឈ្មោះ វី លីហ៊ ហៅចិន ជាអ្នកអង្គុយកណ្តាល បន្ទាប់ពីពេលគប់រួច ជនសង្ស័យ រួមនឹងបក្សពួកបានជិះម៉ូតូទៅផ្ទះរៀងៗខ្លួនទៅ។
ក្រោយពេលកើតហេតុ ភ្លាមៗនោះជនរងគ្រោះបានលឺសូរសម្លេងមានគេគប់ហាង ក៏ចេញមកមើល រួចឆែកមើលកាមេរ៉ាសុវត្ថិភាពក៏ឃើញជនសង្ស័យខាងលើ រួមនឹងបក្សពួកធ្វើសកម្មភាពគប់ហាងរបស់ខ្លួន។ លុះដល់ថ្ងៃទី៣០ ខែមករា ឆ្នាំ២០២២ វេលាម៉ោង១៧និង១០នាទីល្ងាច ទើបជនរងគ្រោះមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលឈើទាលតែម្តង។
ក្រោយពីទទួលពាក្យបណ្តឹងរួច កម្លាំងប៉ុស្តិ៍នគរបាលរដ្ឋបាលឈើទាល សហការជាមួយកម្លាំងផ្នែកនគរបាលយុត្តិធម៌ស្រុកកៀនស្វាយ ចុះស្រាវជ្រាវមុខសញ្ញា រហូតកំណត់មុខសញ្ញារួច កម្លាំងសមត្ថកិច្ចក៏បាននាំជនសង្ស័យខាងលើយកមកសាកសួរនៅប៉ុស្តិ៍នគរបាលរដ្ឋបាលឈើទាលតែម្តង។
នៅចំពោះមុខសមត្ថកិច្ច ជនសង្ស័យឈ្មោះ ស៊ុន តៃលី បានសារភាពថា ខ្លួនពិតជាបានយកដុំថ្ម គប់ហាងមីហិរនោះពិតប្រាកដមែន។ ក្រោយពីសាកសួររួច ជនសង្ស័យរួមទាំងវត្ថុតាង ត្រូវបានបញ្ជូនមកកាន់អធិការដ្ឋាននគរបាលស្រុកកៀនស្វាយ ដើម្បីចាត់ការបន្តរតាមនីតិវិធីច្បាប់ ។
ចែករំលែកព័តមាននេះ