ការសិក្សារបស់អាមេរិកចំនួន ៣បានបង្ហាញថាដូសទី ៣នៃវ៉ាក់សាំង mRNA គឺជាគន្លឹះដ៏សំខាន់ក្នុងការប្រយុទ្ធប្រឆាំងនឹងវីរុសបំលែងថ្មី Omicron ដោយវ៉ាក់សាំងនេះផ្តល់ការការពារ ៩០ភាគរយពីការចូលពេទ្យដោយសារកូវីដ ១៩។ នេះបើយោងតាមបជ្ឍមណ្ឌលគ្រប់គ្រង និងបង្ហារជំងឺអាមេរិកកាលពីថ្ងៃសុក្រម្សិលមិញនេះ។
វាគឺជាការសិក្សាមួយក្នុងចំណោមការសិក្សាដំបូងនៅអាមេរិកដែលពិនិត្យមើលផលប៉ះពាល់របស់ដូសជំរុញប្រឆាំងនឹងវីរុស Omicron ដែលរាតត្បាតលឿនជុំវិញពិភពលោក។
សរុបមក ការសិក្សាបានណែនាំថា ដូសជំរុញជួយការពារប្រឆាំងនឹងការឆ្លង និងរោគសញ្ញា។ មនុស្សពេញវ័យអាយុ ៥០ឆ្នាំ ឬចាស់ជាងនេះទទួលបានប្រសិទ្ធភាពខ្លាំងពីដូសជំរុញនៃវ៉ាក់សាំង Pfizer ឬ Moderna។
“ការប្រឆាំងនឹងការឆ្លង និងការចូលពេទ្យដោយសារវីរុស Omicron មានប្រសិទ្ធភាពខ្ពស់សម្រាប់អ្នកដែលធ្វើបច្ចុប្បន្នភាពជាមួយនឹងវ៉ាក់សាំង មានន័យថា ពួកគេចាក់វ៉ាក់សាំងដូសជំរុញនៅពេលមានសិទ្ធិចាក់”។ នេះជាការបញ្ជាក់របស់វេជ្ជបណ្ឌិត Rochelle Walensky នាយកមជ្ឍមណ្ឌលបង្ការ និងគ្រប់គ្រងជំងឺ។
ការសិក្សាមួយក្នុងចំណោម ៣នោះ ដែលចុះផ្សាយក្នុងរបាយការណ៍ប្រចាំសប្តាហ៍របស់មជ្ឍមណ្ឌលបង្ការ និងគ្រប់គ្រងជំងឺ បានពិនិត្យមើលលើការសម្រាកនៅមន្ទីរពេទ្យ កន្លែងសង្គ្រោះបន្ទាន់ និងកន្លែងថែទាំង ក្នុងរដ្ឋចំនួន ១០ ចន្លោះថ្ងៃទី ២៦ ខែសីហា ឆ្នាំ ២០២១ និងថ្ងៃទី ៥ ខែមករា ឆ្នាំ ២០២២។
ការសិក្សានោះរកឃើញថា ប្រសិទ្ធភាពពីការចាក់វ៉ាក់សាំង ២ដូស បានធ្លាក់ចុះមកត្រឹម ៥៧ភាគរយក្នុងចំណោមប្រជាជនដែលចាក់វ៉ាក់សាំងដូសទី ២។ ក្នុងចំណោមអ្នកដែលចាក់វ៉ាក់សាំងដូសជំរុញ ប្រសិទ្ធភាពការពារពីការចូលពេទ្យ និងសង្គ្រោះបន្ទាន់មាន ៩០ភាគរយ។
ក្នុងការសិក្សាមួយទៀតដែលចុះផ្សាយនៅទស្សនាវដ្តីវេជ្ជសាស្ត្រ JAMA អ្នកស្រាវជ្រាវបានពិនិត្យមើលទិន្នន័យលើករណីកូវីដ ២៣.៣៩១ ដែលបង្កឡើងដោយវីរុស Delta ឬ Omicron ដែលអ្នកទាំងនោះស្វែងរកការធ្វើតេស្តនៅចន្លោះថ្ងៃទី ១០ ខែធ្នូ ឆ្នាំ ២០២១ និងថ្ងៃទី ១ ខែមករា ឆ្នាំ ២០២២។
អ្នកស្រាវជ្រាវរកឃើញថា ក្នុងចំណោមប្រជាជនដែលស្វែងរកការធ្វើតេស្ត អ្នកដែលចាក់វ៉ាក់សាំង mRNA ដូសទី ៣រួច ទទួលបានការការពារខ្ពស់បំផុតពីការឆ្លង បើធៀបទៅនឹងអ្នកដែលទើបចាក់បាន ២ដូស ឬអ្នកមិនទាន់បានចាក់សោះ។
សូមបញ្ជាក់ថា បច្ចុប្បន្ន អាមេរិកកំពុងរងការវា.យប្រហារពីកូវីដ ១៩ខ្លាំងជាងគេបំផុត ដោយគិតត្រឹមថ្ងៃទី ២១ ខែមករា មានការឆ្លងសរុបជាង ៧០,១លានករណី និងស្លាប់ជាង ៨៦៤.០០០នាក់។
បើតាមស្ថាប័នបង្ការ និងគ្រប់គ្រងជំងឺរបស់អាមេរិក ប្រជាជនអាមេរិកត្រឹម ៨២,៥លាននាក់ប៉ុណ្ណោះ ឬស្មើនឹង ៣៩,៣ភាគរយទទួលបានការចាក់វ៉ាក់សាំងដូសជំរុញ។ អាមេរិកមានប្រជាជនសរុបជាង ៣៣២លាននាក់៕ (យោងតាមប្រភព៖ Reuters)
ចែករំលែកព័តមាននេះ