ទីក្រុងហាណូយ ៖ មន្ត្រីប៉ូលីសបាននិយាយនៅរសៀលថ្ងៃព្រហស្បតិ៍ ទី២០ មករា ២០២២នេះថា កម្លាំងគរបាលព្រហ្មទណ្ឌវៀតណាម បានឃាត់ខ្លួនបុរសម្នាក់ ជនជាតិវៀតណាម ហាណូយ អាយុ៣០ឆ្នាំ ដែលបានយកដែកគោលទៅដំក្បាលកូនស្រីរបស់ប្រពន្ធក្រោយរបស់គាត់ នេះបើយោងតាមសារព័ត៌មាន Vnexpress ។
ឪពុកចុងរូបនេះ បានសារភាពថា គាត់បានធ្វើទារុណកម្មកូនចុង ដោយសារតែគាត់មិនចង់ចិញ្ចឹមនាង ។
កុមារីរងគ្រោះ ស្ថិតក្នុងស្ថានភាពធ្ងន់ធ្ងរ កំពុងសង្គ្រោះបន្ទាន់នៅមន្ទីរពេទ្យ សេតប៉ូល នៅស្រុកបាឌិញ ភាគកណ្តាលទីក្រុងហាណូយ នៃប្រទេសវៀតណាម ។
ប៉ូលិសនាយកដ្ឋាននគរបាលព្រហ្មទណ្ឌ នៃសន្តិសុខសាធារណៈ ទីក្រុងហាណូយ បាននិយាយថា ឪពុកចុងរូបនេះឈ្មោះ ង្វៀន ទ្រុងហ្វ៊ៀន (Nguyen Trung Huyen) អាយុ៣០ឆ្នាំ ត្រូវបានចាប់ខ្លួន ហើយនឹងត្រូវស៊ើបអង្កេតពីបទឃា.តកម្ម ។
ឪពុកចុង រស់នៅជាមួយប្រពន្ធក្រោយរបស់គាត់ឈ្មោះ ង្វៀន ធីលូយិន (Nguyen Thi Luyen) អាយុ២៧ឆ្នាំ ត្រូវជាម្តាយបង្កើតរបស់ក្មេងស្រីអាយុ០៣ឆ្នាំ គ្រួសារនេះរស់នៅក្នុងអគារផ្ទះជួល នៅសង្កាត់ថាច់ដេត ក្នុងទីក្រុងហាណូយ ។
ជនជាប់ចោទជាឪពុកចុង បាននិយាយសារភាពទៀតថា វត្តមានរបស់កូនស្រីចុង “វាបានប៉ះពាល់ដល់ជីវភាពរបស់គាត់” ដូច្នេះគាត់ត្រូវតែធ្វើបាប និងធ្វើទារុណកម្មនាង ធ្វើដូច្នេះគាត់ “មិនចាំបាច់ចិញ្ចឹមនាងទេ” ។
ការស៊ើបអង្កេត បានរកឃើញថា ឪពុកចុង បានធ្វើទារុណកម្មក្មេងស្រី ចំនួន០៤ដង មកហើយ ចាប់តាំងពីខែកញ្ញា ឆ្នាំ ២០២១ ដោយជាឲ្យផឹកថ្នាំសម្លាប់សត្វល្អិត ឲ្យលេបដែកគោល និងវាយបំបែកដៃរបស់នាង ជាដើម ។
ករណីប្រព្រឹត្តិចុងក្រោយនេះ បានកើតឡើងនៅថ្ងៃទី១៧ ខែមករា ។ ឪពុកចុង បានទះកំផ្លៀងក្មេងស្រីតូចជាច្រើនដៃ ដោយសារតែនាងមិនឆ្លើយតបនឹងសំណួររបស់គាត់ ហើយបានសម្រេចចិត្ត “ធ្វើទារុណកម្ម” លើក្បាលនាងតូចដោយដែកគោល ។
ក្រោយមក ស្ត្រីជាម្តាយបង្កើត បានបញ្ជូនកូនស្រីទៅមន្ទីរពេទ្យបង្អែកស្រុកថាច់ដេត ។ បច្ចុប្បន្ន នាងតូចកំពុងសន្លប់ និងកុមារីមានអាការប្រកាច់ ក្រុមគ្រូពេទ្យជំនាញ បានធ្វើរោគវិនិច្ឆ័យ ពិនិត្យឃើញមានរលាកស្រោមខួរ ហើយធ្វើការស្កែនកាំរស្មីអ៊ិច បានបង្ហាញឲ្យឃើញនូវ ដែកគោលចំនួន ៩ ដើម ដែលបង្កប់ក្នុងលលាដ៍ក្បាលរបស់នាងតូច ។
ក្រោយពីស្កែនឃើញបែបនោះភ្លាមៗ ក្រុមគ្រូពេទ្យបានបញ្ជូនកុមារី ផ្ទេរទៅមន្ទីរពេទ្យ សេតប៉ូល ដែលជាមន្ទីរពេទ្យកុមារ ត្រូវការសង្គ្រោះក្នុងកម្រិតស្ថានភាពធ្ងន់ធ្ងរ ។
ស្ត្រីម្ចាស់ផ្ទះជួល ក៏បាននិយាយដែរថា អស់មួយឆ្នាំហើយ គាត់ថ្លង់នឹងឪពុកចុងដែលធ្វើការជាជាងឈើ (ដែកគោល) ហើយស្ត្រីដដែលបាននិយាយបន្តថា ក្មេងស្រីអាយុបីឆ្នាំ មានការភ័យខ្លាចយ៉ាងខ្លាំងចំពោះ ឪពុកចុង ចិត្តតិរច្ឆា.ន ៕
ចែករំលែកព័តមាននេះ