អ្នកទស្សនវិជ្ជាបែបសង្គមបានលើកឡើងថា នៅសម័យទំនើបនេះ យុវវ័យមួយចំនួនបានភ្លើតភ្លើនទៅតាមបច្ចេកវិទ្យាដ៏ទំនើប ធ្វើអ្វីទៅតាមចិត្តរបស់ខ្លួន មិនលុះក្នុងដំបូន្មានឪពុកម្តាយឡើយ គឺប្រដៅមិនបានទេ តែបើម៉ែឪទាំងឡាយណាដែលមានកូនចេះស្គាល់ប្រមាណខ្លួន ចេះដឹងចំពោះឋានៈក្នុងគ្រួសាររបស់ខ្លួន គោរពចាស់ទុំ ជាកូនបន្ទន់កាយចិត្តទៅតាមដំបូន្មានឪពុកម្តាយ ម៉ែឪទាំងឡាយនោះដូចបានទទួលពរជ័យអំពីព្រះឥន្ទដូច្នោះដែរ ។
ឯគ្រួសារខ្លះមិនដូច្នោះទេ នៅក្នុងសម័យទំនើបនេះ យុវវ័យប្រុសស្រីខ្លះរៀបចំតុបតែងខ្លួនឆើតឆាយ តាក់តែងកាយដោយសម្លៀកបំពាក់ដែលមានតម្លៃខ្ពស់ ប្រើប្រាស់របស់ប្រេនៗ ទ្រង់ដោយគ្រឿងអលង្ការដ៏មានតម្លៃ ប៉ុន្តែពួកគេទាំងនោះមិនចេះរៀបចំខ្លួនគួរឱ្យជាទីស្រឡាញ់ចូលចិត្តអំពីអ្នកផងទេ ប្រព្រឹត្តប្រាសចាកក្រមសីលធម៌ មិនមានចរិតថ្លៃថ្នូរសោះ ។ ប្រុសស្រីរបៀបនេះ មិនអាចប្រៀបបាននឹងអ្នកដែលគេចេះតែងខ្លួនគ្រាន់តែឲ្យបានសមរម្យប៉ុណ្ណោះ ប៉ុន្តែរៀបរយត្រឹមត្រូវ ចរិយាសុភាពរាបសា ច្រើនទៅដោយមេត្តាករុណានោះឡើយ ។
កែវភ្នែកស្រទន់ កិរិយាសុភាព វាចាពីរោះស្មោះត្រង់ត្រឹមត្រូវ និងចិត្តពេញទៅដោយព្រហ្មវិហារធម៌ នោះគឺជាមន្តស្នេហ៍ទាញស្រូបមនុស្សទាំងឡាយឲ្យស្រឡាញ់ ឲ្យគោរពកោតក្រែង បីដូចជាជ្រោះជើងភ្នំដែលជាទីហូរធ្លាក់ចុះមកនៃទឹកដូច្នោះឯង តម្លៃមនុស្សគឺស្ថិតនៅត្រង់ហ្នឹងហើយ សូមកូនចូរជាអ្នកប្រដៅងាយចុះ ៕ សាន សារិន
ចែករំលែកព័តមាននេះ