រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា អាហាររូបករណ៍នៅអូស្ត្រាលីជាតម្លៃមួយ សម្រាប់កូនខ្មែររបស់យើង ដែលទទួលបានឱកាសបានទៅសិក្សា ពិសេសនោះ យុវជនជាសសរទ្រូង…
រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា អាហាររូបករណ៍នៅអូស្ត្រាលីជាតម្លៃមួយ សម្រាប់កូនខ្មែររបស់យើង ដែលទទួលបានឱកាសបានទៅសិក្សា ពិសេសនោះ យុវជនជាសសរទ្រូង ជាអ្នកបន្តវេនដ៏មានថាមពល រួមគ្នាលើការអភិវឌ្ឍជាតិ ។
ការលើកឡើងរបស់ឯកឧត្តម ខណៈអនុញ្ញាតឲ្យបេក្ខភាពជ័យលាភីអាហារូបករណ៍របស់រដ្ឋាភិបាលអូស្ត្រាលី ឆ្នាំ២០២១-២០២២ ចំនួន ១៨នាក់ (ស្រីចំនួន៨នាក់) មានសមាសភាពជាមន្ត្រីរាជការ បុគ្គលិកក្រុមហ៊ុនឯកជន និងមន្ត្រីអង្គការក្រៅរដ្ឋាភិបាលចូលជួបសម្តែង ការគួរសម និងផ្តល់នូវព័ត៌មានមួយចំនួនពាក់ព័ន្ធជាមួយស្ថានភាពបច្ចុប្បន្នភាពថ្មីៗទាំងក្នុង និងក្រៅប្រទេស ជាពិសេសពាក់ព័ន្ធនឹងវឌ្ឍនភាពនៃវិស័យការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី១៨ មករា នៅទីស្តីការក្រសួង ។
ឯកឧត្តម អ៊ិត សំហេង រដ្ឋមន្ត្រីក្រសួងការងារ បានសម្តែងនូវការអបអរសាទរចំពោះបេក្ខភាពអាហារូបករណ៍ដែលទទួលបានការសិក្សានៅប្រទេសអូស្ត្រាលី ដែលអាចចាត់ទុកបានថា ជាឱកាសដ៏មានតម្លៃមួយសម្រាប់កូនខ្មែររបស់យើង ដែលទទួលបានឱកាសបានទៅសិក្សានៅប្រទេសដែលមានភាពរីកចម្រើន លើផ្នែកបណ្តុះបណ្តាលធនធានមនុស្សមួយនេះ ។
ឯកឧត្តមបញ្ជាក់ថា៖ « នេះជាបរិបទថ្មីប្រចាំជីវិតរបស់ក្មួយៗ គ្រួសារក្មួយៗផ្ទាល់ពិតជារីករាយ និងសប្បាយចិត្តណាស់ចំពោះក្មួយៗ ។ រាជរដ្ឋាភិបាលដែលមានក្រសួងការងារ និងបណ្ដុះបណ្ដាលវិជ្ជាជីវៈ ក្រសួងអប់រំ យុវជន និងកីឡា ពិតជាមានមោទកភាពដែលបានបង្កើតឱកាសនេះ ជូនដល់ក្មួយៗជាយុវជន ។ ពូជឿជាក់ថា ការសិក្សារបស់ក្មួយនឹងទទួលបានជោគជ័យ ក្លាយជាមនុស្សថ្មីដែលមានសមត្ថភាពខ្ពស់ជាងពេលនេះ ។
នេះជាការតបស្នងដែលល្អបំផុតសម្រាប់ខ្លួនឯងផ្ទាល់ ក្រុមគ្រួសារ អាណាព្យាបាល និងអ្នកជាទីស្រលាញ់ចំពោះសាមីស្ថាប័ន ចំពោះរាជរដ្ឋាភិបាលកម្ពុជា និងប្រទេសដែលផ្តល់អាហារូបករណ៍» ។
ឯកឧត្តម អ៊ិត សំហេង បានរំលេចពីរបបប្រល័យពូជសាសន៍ ប៉ុល ពត ដែលបានបំផ្លិចបំផ្លាញហេដ្ឋារចនាសម្ព័ន្ធទាំងស្រុង គ្រប់វិស័យ ក្នុងនោះផ្នែកធនធានមនុស្សត្រូវបានកាប់សម្លា.ប់យ៉ាងរង្គាល លុះថ្ងៃរំដោះ ៧ មករា ១៩៧៩ ប្រទេសយើងត្រូវបានងើបជាបណ្តើរៗលើកា រកសាងជាតិឡើងវិញ ។ គោលនយោបាយអាទិភាពលើវិស័យធនធានមនុស្ស បានបង្កើនបន្តិចម្តងៗលើការអប់រំ និងការបណ្តុះបណ្តាលជំនាញដែលធ្វើឲ្យមានការរីកចម្រើនទាំងបរិមាណ និងគុណភាព ។
ទន្ទឹមនឹងនេះការបង្កើតកិច្ចសហប្រតិបត្តិការជាមួយប្រទេសជាមិត្ត ការស្វែងរកអាហារូបករណ៍ក៏ដូចជា ការបង្កលក្ខណៈងាយស្រួលដល់យុវវ័យអាចទៅសិក្សារៀនសូត្រ ។ តាំងពីទស្សវត្សរ៍៨០ បានជម្រុញការបណ្ដុះបណ្ដាលធនធានមនុស្សក្នុងសហគមន៍សង្គមនិយម ។ កម្ពុជាយើងមានធនធានមនុស្ស មានសមត្ថភាពខ្ពស់កាន់តែច្រើនគ្រប់កម្រិតជាធនធានមនុស្សប្រកបដោយគុណភាពខ្ពស់បានកំពុងចូលរួមក្នុងការងារលើគ្រប់វិស័យទាំងសាធារណៈ និងឯកជន ។
ឯកឧត្តមរដ្ឋមន្ត្រី មានប្រសាសន៍បន្ថែមថា រាជរដ្ឋាភិបាលកំពុងអនុវត្តគោលនយោបាយយុវជន ដោយយុវជនជាសសរទ្រូង ជាអ្នកបន្តវេនរបស់ជាតិ ផ្តល់ជូននូវឱកាសមាស គឺសន្តិភាព, ទទួលបានការអប់រំ ការបណ្ដុះបណ្ដាលជំនាញ, ទទួលបានការងារ មុខរបរ, ចូលរួមក្នុងសកម្មភាពសង្គម, ទទួលបានការតែងតាំងតាមសមត្ថភាព និងស្នាដៃជាមួយរូបមន្តរក្សាចាស់បន្ថែមថ្មី ។
ចលនាយុវជន ដែលដឹកនាំដោយឯកឧត្តមបណ្ឌិត ហ៊ុន ម៉ាណែត ជាប្រធាន និងជាបេក្ខភាពអនាគតនាយករដ្ឋមន្ត្រី កំពុងធ្វើសកម្មភាពយ៉ាងសកម្ម ដើម្បីអនាគតភ្លឺស្វាងមួយរបស់យុវជន ។
សូមចាំថា ឱកាសល្អមិនមានគ្រប់ពេលវេលានោះទេ កត្តាសុខសន្តិភាពជាគន្លឹះ គ្មានសន្តិភាព គ្មានការអភិវឌ្ឍ ។ នេះជាអ្វីដែលយុវជនជាអ្នកបន្តវេនត្រូវរៀនសូត្រ ។
ឯកឧត្តម បានលើកឡើងពីវឌ្ឍនភាពនៃវិស័យការងារ និងបណ្ដុះបណ្ដាលវិជ្ជាជីវៈជាវិស័យមួយដែលរាជរដ្ឋាភិបាលផ្តល់អាទិភាពខ្ពស់មួយដែលអនុវត្តដោយជោគជ័យ ។
គួរបញ្ជាក់ជូនថា អាហារូបករណ៍ Australia Awards គឺជាអាហារូបករណ៍អន្តរជាតិដ៏មាន កិត្យានុភាពមួយដែលត្រូវបានឧបត្ថម្ភដោយរដ្ឋាភិបាលអូស្ត្រាលី ក្នុងគោលបំណងរួមចំណែកដល់តម្រូវការអភិវឌ្ឍរយៈពេលវែងរបស់ប្រទេសជាដៃគូ ដោយស្របតាមកិច្ចព្រមព្រៀងសកល ទ្វេភាគី និងតំបន់ ៕
ចែករំលែកព័តមាននេះ