ខេត្តកំពង់ស្ពឺ ៖ ដោយអស់ជំនឿលើមន្ត្រីសុរិយោដីខេត្តកំពង់ស្ពឺមួយរូប ម្ចាស់លុយក្នុងរឿងរត់ការប្លង់ដីមិនបានសម្រេច ក៏សម្រេចចិត្តដាក់ពាក្យប្តឹងសុំអន្តរាគមន៍ទៅលោកប្រធានមន្ទីរដើម្បីឲ្យជួយដោះស្រាយករណីកូនចៅក្រោមឱវាទមិនព្រមប្រគល់លុយអោយវិញ ក្រោយពីរត់ការមិនបានសម្រេច ហើយចង់ស៊ីដាច់លុយរបស់គេ។
លោក តេង សំអុល អាយុ៥៣ឆ្នាំ មានទីលំនៅភូមិព្រៃស្លឹក សង្កាត់ច្បារមន ក្រុងច្បារមន ខេត្តកំពង់ស្ពឺ ដែលជាម្ចាស់បណ្តឹងសុំអន្តរាគមន៍បានប្រាប់ថា រូបលោកបានដាក់ពាក្យបណ្ដឹងចូលទៅមន្ទីរដែនដីនគរូបនីយកម្មសំណង់ និងភូមិបាលខេត្តកំពង់ស្ពឺ កាលពីថ្ងៃទី១១ ខែមករា ឆ្នាំ២០២២ ដើម្បីសុំឲ្យលោកប្រធានមន្ទីរមានចំណាត់ការ និងជួយដោះស្រាយទៅលើបុគ្គលមួយរូបមានឈ្មោះ ងួន ភារម្យ ភេទស្រី មានតួនាទីអនុប្រធានការិយាល័យរៀបចំដែនដីសំណង់ និងភូមិបាលស្រុកភ្នំស្រួច ដែលបានយកប្រាក់ចំនួន៥ពាន់ដុល្លារពីលោក តែរត់ការប្លង់មិនបានសម្រេច។
លោក តេង សំអុល បានបញ្ជាក់ថា កាលពីថ្ងៃទី៤ ខែកញ្ញា ឆ្នាំ២០២១ រូបលោកបានទំនាក់ទំនងជាមួយឈ្មោះ ងួន ភារម្យ ឱ្យជួយរត់ការប្លង់ដីមួយកន្លែងនៅភូមិបែកឃ្លោក ឃុំក្សេមក្សាន្ត ស្រុកឧត្តុង្គ ខេត្តកំពង់ស្ពឺ នាពេលនោះឈ្មោះ ងួន ភារម្យ បានទារថ្លៃរត់ការចំនួន ៥០០០ដុល្លារ ដោយតម្រូវឲ្យផ្ទេរលុយតាមរយៈប្រតិបត្តិការធនាគារ ABA (អេប៊ីអេ) ទៅកាន់គណនីលេខ 000879686 ដែលម្ចាស់គណនីមានឈ្មោះ En Povthika ជាកូនរបស់គាត់ (ងួន ភារម្យ) ។
លោក តេង សំអុល បន្តថា ឈ្មោះ ងួន ភារម្យ បានសន្យាថារយៈពេល១ខែ គឺនឹងរត់ការអោយបានសម្រេច តែបើមិនបានសម្រេចទេ លោកស្រី ងួន ភារម្យ នឹងប្រគល់លុយត្រឡប់មកលោកវិញអោយគ្រប់ចំនួន។ ពេលវេលាចេះតែកន្លងទៅ លោកបានទាក់ទងទៅឈ្មោះ ងួន ភារម្យ តាមរយៈទូរស័ព្ទជាច្រើនដងក៏គាត់មិនលើក តែបើលើកវិញសុំពន្យារពេលថា ថ្ងៃនេះ ថ្ងៃនោះ ខែនេះ ខែនោះ ដែលរហូតមកដល់ពេលនេះ គឺមានរយៈពេលជាច្រើនខែមកហើយ ជាពិសេសនៅអំឡុងចុងខែវិច្ឆិកា ឆ្នាំ២០២១នេះ រូបលោកក៏បានទាក់ទងទៅគាត់ម្ដងទៀត គាត់ក៏សុំពន្យារពេលដល់ចុងខែធ្នូ ដោយប្រាប់ថា ឯកសារដល់ដៃលោកប្រធានមន្ទីរហើយ តែលោកប្រធានមិនទាន់ចុះហត្តលេខានៅឡើយ។
លោក តេង សំអុល បន្តទៀតថា ក្រោយមកទៀត ដោយអស់ជំនឿនឹងការនិយាយភូតកុហករបស់ឈ្មោះ ងួន ភារម្យ រូបលោកក៏បានសុំឲ្យលោកស្រី ងួន ភារម្យ មន្ទីរបង្វិលលុយមកវិញ តែឈ្មោះ ងួន ភារម្យ មានចេតនាគេចវេសមិនចង់បង្វិលលុយឲ្យរូបលោកនោះទេ។ និយាយរួមឈ្មោះ ងួន ភារម្យនេះ តែងតែនិយាយទម្លាក់ទៅលើលោកប្រធានមន្ទីរគ្រប់ពេល ដែលរូបលោកទាក់ទងសួរនាំពីរឿងប្លង់ដីនេះ លោកយល់ថា ទង្វើនេះវាជះឥទ្ធិពលអាក្រក់ដល់អង្គភាពសាមី ក៏ដូចជាប្រធានមន្ទីរ ដែលជាអ្នកគ្រប់គ្រងយ៉ាងខ្លាំង បើមិនមានចំណាត់ការរដ្ឋបាលលើឈ្មោះនោះទេ ទៅថ្ងៃមុខម្ល៉េះសមនឹងមានជនរងគ្រោះជាច្រើននាក់ទៀតដែលរងនូវការភូតភរនេះជាក់ជាំជាមិនខាន។
លោក តេង សំអុល បញ្ជាក់បន្ថែមថា ជាក់ស្ដែងថ្ងៃទី១៤ ខែមករា ឆ្នាំ២០២២ ក្រោយពីលោកដាក់ពាក្យសុំអន្តរាគមន៍ ឈ្មោះ ងួន ភារម្យ ដែលជាមន្ត្រីនៅមន្ទីរសុរិយោដីខេត្តកំពង់ស្ពឺ បានធ្វើលិខិតមួយច្បាប់ ដោយសូមសន្យាថានឹងប្រគល់ប្រាក់ចំនួន៥ពាន់ដុល្លារមករូបលោកវិញ នៅថ្ងៃទី១៥ ខែមករា ដោយផ្ទាល់ដៃរបស់គាត់តែម្ដង តែរហូតមកដល់រសៀលថ្ងៃទី១៦ ខែមករានេះ លោកស្រី ងួន ភារម្យ នៅមិនទាន់បានផ្ទេរប្រាក់សងមកលោកវិញនៅឡើយទេ។ ក្នុងនាមលោកជាជនរងគ្រោះស្នើសុំលោកប្រធានមន្ទីរ ជួយអន្តរាគមន៍ប្រគល់លុយត្រឡប់មកឲ្យលោកវិញដោយក្តីអនុគ្រោះ ជាពិសេសស្នើសុំលោកប្រធានមន្ទីរ ក៏ដូចជាលោកអភិបាលស្រុកភ្នំស្រួច ចាត់វិធានការរដ្ឋបាលទៅលើឈ្មោះ ងួន ភារម្យ តាមលខន្តិកៈរបស់មន្ត្រីរាជការ ចៀសវាងកុំឱ្យមានរឿងអាស្រូវបែបនេះតទៅទៀត។
លោក តេង សំអុល បញ្ជាក់បន្តទៀតថា នៅថ្ងៃទី១៧ ខែមករា ឆ្នាំ២០២២នេះដែរ បើឈ្មោះ ងួន ភារម្យ នៅតែមិនទាន់បង្វិលលុយមកលោកវិញនោះទេ លោកនឹងរៀបចំពាក្យបណ្ដឹងមួយច្បាប់ទៀតដាក់ចូលទៅតំណាងអយ្យការ ដើម្បីចាត់វិធានការផ្លូវច្បាប់តែម្ដង។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ