រាជធានីភ្នំពេញ ៖ ជាការពិតរឿងរ៉ាវចោរភ្ជង់ប្លន់យកម៉ូតូ និងកាច់សោ.កម៉ូតូរបស់កីឡាករល្បីឈ្មោះពេជ្រ សីហា បានកើតមានជាយូរមកហើយ ប៉ុន្តែអ្វីដែលធ្វើឱ្យកីឡាកររូបនេះចងចាំនោះ គឺរូបភាពទាំងនោះស្ថិតនៅក្នុងកែវភ្នែករបស់លោកនៅឡើយ ។ លោកថា ជារឿងមិនអាចបំភ្លេចបានទេ ដោយសារតែម៉ូតូមួយគ្រឿងៗទទួលបានពីការតស៊ូ និងពិបាកស្ទើរស្លាប់ស្ទើររស់នៅលើសង្វៀន ប៉ុន្តែនៅពេលបាត់បង់វិញ គឺតែមួយប៉ប្រិចភ្នែកប៉ុណ្ណោះ ។
ពេជ្រ សីហា បានអះអាងថា កាលពីឆ្នាំ២០០៩ នៅពេលលោកធ្វើដំណើរទៅផ្ទះសំណាក់មួយកន្លែងរបស់មិត្តភក្ដិនៅពាក់កណ្ដាលអធ្រាត្រក៏ត្រូវចោរប្រដាប់ដោយកាំភ្លើងដែលពួននៅកន្លែងស្ងាត់នោះចេញមកភ្ជង់ប្លន់យកម៉ូតូតែម្ដង។ ក្នុងពេលនោះលោកមិនបានតដៃទេ ដោយសារតែយល់ឃើញថា លុយកាក់រកបាន ប៉ុន្តែបើប្រថុយតស៊ូ គឺនឹងអាចបាត់បង់ជីវិត ។ យ៉ាងណាក៏ដោយ អ្វីដែលធ្វើឱ្យលោកភ្ញាក់ផ្អើលបំផុតនោះ គឺក្រោយពេលភ្ជង់ប្លន់យកម៉ូតូហើយ លោកចោរក៏បានហុចលុយឱ្យលោកចំនួន៥ម៉ឺនរៀល ដោយនិយាយថា យកទៅគ្រាន់ជិះម៉ូតូឌុបទៅផ្ទះវិញ ។ លោកនៅតែចងចាំថា រូបភាពថ្ងៃនោះ មិនខុសពីការយល់សប្ដិនោះទេ ដោយសារតែការប្លន់នោះកើតឡើងដោយស្ងប់ស្ងាត់ និងសន្តិវិធី ។ លោកថា ម៉ូតូដែលចោរប្លន់ទៅនោះ ម៉ាក Click ស៊េរីឆ្នាំ២០០៩ មានតម្លៃជិត២ពាន់ដុល្លារ ដែលលុយទិញម៉ូតូនោះលោកបានពីការប្រកួតនៅក្នុងប្រទេសអូស្ត្រាលីមុននោះទាំងស្រុង ។ លោកថា លោកក្លាយជាកីឡាករធ្លាក់ខ្លួនអត់មានអ្វីជិះអស់មួយរយៈធំ បន្ទាប់ពីម៉ូតូដែលទិញជិះបានតែមួយខែត្រូវចោរភ្ជង់យក ។
រំលឹកដល់ហេតុការណ៍នោះ ពេជ្រ សីហា បានបន្ទោសខ្លួនឯងដែលដើរលេងយប់ និងបានចាត់ទុកជាបទពិសោធន៍អាក្រក់មួយសម្រាប់ខ្លួនឯងផងដែរ ។ ពេជ្រ សីហា និយាយថា៖ «ឥឡូវនេះឱ្យតែខ្ញុំចង់ទៅណាមកណារាងយប់បន្តិច ខ្ញុំនឹកឃើញដល់រូបភាពនោះភ្លាម ព្រោះបើម៉ូតូហ្នឹងខ្ញុំបានលុយទិញដោយស្រួលខ្ញុំអត់សូវស្ដាយទេ ប៉ុន្តែនេះទម្រាំបានវាខ្ញុំតស៊ូចង់ងាប់ ប៉ុន្តែចុងក្រោយទិញជិះមិនទាន់បានមួយខែស្រួលបួលផង ក៏ត្រូវចោរប្លន់យកទៅបាត់ធ្វើឱ្យខ្ញុំដាច់ជើងទៅហាត់រាល់ថ្ងៃក៏អត់បាន ចង់ទៅទាក់ទងការងារឯណាក៏ពិបាក» ។ យ៉ាងណាក៏ដោយ ការបង្ហាញមុខលើរេញប្រដាល់នាពេលបន្តបន្ទាប់បានជួយឱ្យលោកមានលទ្ធភាពទិញបានម៉ូតូជិះជាថ្មីម្ដងទៀត បើទោះជាម៉ូតូដែលបានទិញជិះបន្ទាប់មិនសូវទាន់សម័យ និងឡើងកាលីបដូចម៉ូតូដែលចោរភ្ជង់យក ។ ប៉ុន្តែជាអកុសលម៉ូតូនោះក៏ត្រូវចោរកាច់កយកក្នុងពេលដែលលោកចូលប្រកួតដណ្ដើមជើងឯកនៅក្នុងព្រឹត្តិការណ៍ថ្នាក់ជាតិក្នុងឆ្នាំ២០១២ នោះទៅទៀត ។ លោកថា ដោយសារយល់ថា អាសង់ពណ៌ព្រីងទុំរបស់ខ្លួនជាប្រភេទម៉ូតូស៊េរី៩៧ មិនសូវពេញនិយមនៅក្នុងជំនាន់នោះ ទើបចេះតែប្រហែស និងមិនដែលកើតមានបញ្ហានៅពេលដាក់ចោលនោះទេ ។ អ៊ីចឹងហើយទើបការប្រហែសមួយលើកចុងក្រោយដោយការទុកចោលដូចគេដូចឯង ក្នុងពេលចូលប្រកួតដណ្ដើមជើងឯកនៅស្ដាតអូឡាំពិក ដល់ពេលចេញមកវិញគឺបាត់តែម្ដង ។
លោកថា បើធៀបនឹងរឿងស៊យលើកទី១ និងលើកទី២ លោកថា ការបាត់ម៉ូតូកាលពីឆ្នាំ២០១២ បានធ្វើឱ្យលោកស្រក់ទឹកភ្នែកខុសប្លែកពីលើកមុន បើទោះជាម៉ូតូដែលបាត់ក្រោយ មានតម្លៃមិនដល់ម៉ូតូដែលចោរភ្ជង់យកកាលពីឆ្នាំ២០០៩ ។ នោះគឺដោយសារតែម៉ូតូដែលបានបាត់ត្រូវចំពេលដែលលោកត្រូវការមធ្យោបាយធ្វើដំណើរយ៉ាងសកម្មក្នុងកិច្ចការហ្វឹកហាត់ និងការងារផ្សេងៗ ។ លោកត្រូវបន្តជីវិតសុំម៉ូតូគេជិះ ដើរទៅហ្វឹកហាត់ បំពេញកិច្ចការផ្សេងៗ និងជិះម៉ូតូឌុបអស់រយៈពេលច្រើនឆ្នាំ ដោយសារតែការឡើងប្រកួតលើកក្រោយ គឺបានតែមួយរស់ៗ មិនអាចទិញម៉ូតូថ្មីជិះតាមការចង់បាន ។ លោកថា ខ្លួនទើបតែមានសំណាងទទួលបានប្រាក់ប្រកួតកាលពីសប្ដាហ៍មុននេះប៉ុណ្ណោះ ទើបមានលទ្ធភាពទិញម៉ូតូថ្មីម៉ាក Zoomer ទុកគ្រាន់ជិះវិញ ។ លោកថា ម៉ូតូដែលមានតម្លៃជិត២ពាន់ដុល្លារនេះ គឺជាលុយដែលបានពីការប្រកួតដណ្ដើមខ្សែក្រវាត់លើកចុងក្រោយ បើទោះជាចាញ់គូប្រកួតក៏ដោយ ។ បើកុំតែដូច្នោះលោកថា ប្រហែលជាត្រូវបន្តជីវិតអត់អីជិះមិនដឹងដល់ពេលណានោះទេ ដោយសារតែឡើងប្រកួតញឹកមែន ប៉ុន្តែប្រាក់ដែលទទួលបាននោះក៏ត្រូវចាត់ចែងច្រើនមុខសម្រាប់ជីវិត និងគ្រួសាររាប់មិនអស់ ។ អ៊ីចឹងហើយទើបពេជ្រ សីហា ដែលមានដើមកំណើតមកពីខេត្តតាកែវរូបនេះ នៅតែអះអាងថា ខ្លួនចាំមិនភ្លេចចំពោះទិដ្ឋភាពចោរភ្ជង់ប្លន់យកម៉ូតូ និងទិដ្ឋភាពធ្លាក់ខ្លួនក្រោយពេលម៉ូតូមួយគ្រឿងទៀតត្រូវចោរកាច់កយកក្នុងឆ្នាំ២០១២ មិនដែលភ្លេចឡើយ ។
ចែករំលែកព័តមាននេះ