រាជធានីភ្នំពេញ ៖ មនុស្សចំនួន៦៧នាក់ ត្រូវសមត្ថកិច្ចនគរបាលធ្វើការព្រមាន និងបញ្ជូនឈ្មោះទៅតុលាការ ប្រសិនបើមិនទៅបង់ការផាកពិន័យអន្តរកាលលើបទល្មើសបើកបរ ក្រោមឥទ្ធិពលគ្រឿងស្រវឹង ទៅតាមការកំណត់នោះ ។
រាជធានីភ្នំពេញ ៖ មនុស្សចំនួន៦៧នាក់ ត្រូវសមត្ថកិច្ចនគរបាលធ្វើការព្រមាន និងបញ្ជូនឈ្មោះទៅតុលាការ ប្រសិនបើមិនទៅបង់ការផាកពិន័យអន្តរកាលលើបទល្មើសបើកបរ ក្រោមឥទ្ធិពលគ្រឿងស្រវឹង ទៅតាមការកំណត់នោះ ។
លោកឧត្តមសេនីយ៍ឯកបណ្ឌិត រុន រត្ន័វាសនា ទីប្រឹក្សាសម្តេចក្រឡាហោម ស ខេង និងជាប្រធាននាយកដ្ឋាន នគរបាលចរាចរ និងសណ្តាប់ធ្នាប់សាធារណៈក្រសួងមហាផ្ទៃបានឱ្យដឹងថា គិតពីថ្ងៃចាប់ផ្តើមរហូត មកដល់ពេលនេះ នាយកដ្ឋាននគរបាលចរាចរ និងសណ្តាប់ធ្នាប់សាធារណៈ និងសមត្ថកិច្ចជុំនាញពាក់ព័ន្ធបានចុះល្បាតចល័តត្រួតពិនិត្យច្បាប់ស្តីពីចរាចរណ៍ផ្លូវគោកយ៉ាងសកម្ម តាមបណ្តារាជធានី-ខេត្ត ដើម្បីទប់ស្កាត់គ្រោះថ្នាក់ចរាចរណ៍ ។
លោកបន្តថា សម្រាប់លទ្ធផលនៃការត្រួតពិនិត្យជាតិស្រវឹងរហូតមកដល់ថ្ងៃទី២២ មិថុនា ២០១៦នេះ សមត្ថកិច្ចនគរបាលបានធ្វើការត្រួតពិនិត្យនៅរាជធានីភ្នំពេញ បានចំនួន១០៦លើក ឃាត់អ្នកបើកបរយានយន្តចំនួន៤៣៧នាក់ ដែលត្រូវបញ្ជូនទៅតុលាការ ក្នុងនោះ អ្នកបើកបររថយន្តចំនួន១០២នាក់ ស្រី៣នាក់ និងអ្នកបើកបរម៉ូតូចំនួន៣៣៥នាក់ ។
លោកឧត្តមសេនីយ៍ឯកបណ្ឌិត រុន រត្ន័វាសនា បានឱ្យដឹងទៀតថា ពេលនេះ នាយកដ្ឋាននគរបាលចរាចរ និងសណ្តាប់ធ្នាប់សាធារណៈក្រសួងមហាផ្ទៃ បានផ្សព្វផ្សាយបញ្ជីឈ្មោះមនុស្សចំនួន៦៧នាក់ ដែលមិនទាន់បង់ផាកពិន័យអន្តរកាល លើបទល្មើសបើកបរក្រោមឥទ្ធិពលគ្រឿងស្រវឹង ។ ម្ចាស់យានយន្តគ្រប់ប្រភេទ ត្រូវចូលខ្លួនទៅបង់ពិន័យអន្តរកាលនេះ ឱ្យបានមុនរយៈពេល១៥ថ្ងៃ គិតចាប់ពីថ្ងៃជូនដំណឹង ថ្ងៃទី២២ មិថុនា តទៅ ។
ក្នុងករណីមិនចូលបង់ពិន័យតាមកាលកំណត់ សមត្ថកិច្ចនឹងបញ្ជូនសំណុំរឿងទៅអយ្យការអមសាលាដំបូងតែម្តង ហើយសមត្ថកិច្ចនឹងមានការផ្សព្វផ្សាយបញ្ជីឈ្មោះអ្នកដែលត្រូវផាកពិន័យអន្តរកាល បទល្មើសបើកបរក្រោមឥទ្ធិពលគ្រឿងស្រវឹងផ្សេងៗ ជាបន្តបន្ទាប់ទៀត ។
ចែករំលែកព័តមាននេះ