ក្តៅ! Djokovic ឈ្នះបណ្តឹងឧទ្ធរណ៍ប្រឆាំងនឹងការនិរទេសចេញពីអូស្ត្រាលី
អូស្ត្រាលី ៖ កីឡាករវាយកូនបាល់លំដាប់លេខ១ពិភពលោក Novak Djokovic បានឈ្នះបណ្តឹងឧទ្ធរណ៍ប្រឆាំងនឹងការនិរទេសចេញ
អូស្ត្រាលី ៖ កីឡាករវាយកូនបាល់លំដាប់លេខ១ពិភពលោក Novak Djokovic បានឈ្នះបណ្តឹងឧទ្ធរណ៍ប្រឆាំងនឹងការនិរទេសចេញពីប្រទេសអូស្ត្រាលី បន្ទាប់ពីចៅក្រមបានបញ្ជាឱ្យដោះលែងរូបគេចេញពីការឃុំឃាំងអន្តោប្រវេសន៍នៅក្នុងសណ្ឋាគារ។ នេះបើតាមប្រភពពី Sky News ចេញផ្សាយនៅថ្ងៃនេះ។ គួររំលឹកថា Australian Open៖ Djokovic បាត់បង់សិទ្ធិប្រកួត ក្រោយទិដ្ឋាការចូលអូស្ត្រាលីត្រូវលុបចោល
គួររំលឹកថា កាលពីថ្ងៃទី៦ ខែមករា ឆ្នាំ២០២២ មន្ត្រីព្រំដែនអូស្ត្រាលីបានសម្រេចលុបចោលទិដ្ឋាការកីឡាករសញ្ជាតិស៊ែប ក្រោយរកឃើញថា រូបគេមិនបំពេញតាមលក្ខណៈវិនិច្ឆ័យត្រឹមត្រូវសម្រាប់ការលើកលែងវេជ្ជសាស្ត្រពាក់ព័ន្ធរឿងមិនចាក់វ៉ាក់សាំងបង្ការកូវីដ-១៩។ Djokovic បានចំណាយពេល៤យប់ស្នាក់នៅសណ្ឋាគារឃុំឃាំងអន្តោប្រវេសន៍ក្នុងទីក្រុងមែលប៊ន មុនពេលសវនាការចាប់ផ្តើមនៅម៉ោងប្រហែល១០ព្រឹកថ្ងៃទី១០ ខែមករា (ម៉ោងនៅអូស្ត្រាលី)។
តុលាការបានច្រានចោលការសម្រេចចិត្តរបស់មន្ត្រីអាកាសយានដ្ឋានដែលអះអាងថា Djokovic មិនបំពេញតាមលក្ខណៈវិនិច្ឆ័យ ដែលជនបរទេសទាំងអស់ត្រូវតែចាក់វ៉ាក់សាំងពេញលេញ ទើបអាចចូលក្នុងប្រទេសអូស្ត្រាលីបាន។
ចៅក្រម Anthony Kelly បានកត់សម្គាល់ថា Djokovic ត្រូវបានផ្តល់ការលើកលែងផ្នែកវេជ្ជសាស្ត្រត្រឹមត្រូវពីស្ថាប័នវាយកូនបាល់អូស្ត្រាលី និងក្រុមអ្នកជំនាញវេជ្ជសាស្ត្រឯករាជ្យចំនួន២ដាច់ដោយឡែក។
ទោះយ៉ាងណា បញ្ហានេះមិនទាន់បញ្ចប់នៅឡើយទេ។ ដោយយោងតាមអ្នកយកព័ត៌មាន Sky News បាននិយាយថា ករណីនេះនឹងត្រូវត្រឡប់ទៅកាន់រដ្ឋមន្ត្រីក្រសួងអន្តោប្រវេសន៍ និងនាយកដ្ឋានកិច្ចការផ្ទៃក្នុង ដើម្បីសម្រេចថា តើត្រូវផ្តល់ទិដ្ឋាការឡើងវិញ ឬយ៉ាងណា? ដើម្បីអាចឱ្យ Djokovic មានសិទ្ធិចូលរួមប្រកួតពានរង្វាន់ Australian Open 2022។
សូមជម្រាបជូនថា ករណី Djokovic បានបង្កឱ្យមានជម្លោះនយោបាយ បន្ទាប់ពីនាយករដ្ឋមន្ត្រីអូស្ត្រាលី Scott Morrison បាននិយាយថា «ច្បាប់គឺជាច្បាប់» ហើយអ្នកដំណើរដែលចូលមកគឺទទួលខុសត្រូវចំពោះបទប្បញ្ញត្តិព្រំដែន។ ប៉ុន្តែក្រោយមកលោករងការរិះគន់យ៉ាងចាស់ដៃ ដោយត្រូវបានគេចោទថា យករឿងនេះ ដើម្បីទាញប្រយោជន៍បង្កើនប្រជាប្រិយភាពមុនការបោះឆ្នោតនាពេលខាងមុខ។
មេធាវី Djokovic បានអះអាងថា Djokovic គួរតែត្រូវបានអនុញ្ញាតឱ្យចូលអូស្ត្រាលី ដោយសារគេទើបតែបានឆ្លងកូវីដកាលពីខែធ្នូ ឆ្នាំ ២០២១ ហើយផ្អែកលើមូលដ្ឋាននេះ គេមានសិទ្ធិទទួលការលើកលែងវេជ្ជសាស្ត្រស្របច្បាប់ និងការណែនាំរបស់រដ្ឋាភិបាលអូស្ត្រាលី។ ខណៈពួកគេក៏បានដាក់ឯកសារបង្ហាញថា Djokovic បានតេស្តវិជ្ជមានកូវីដកាលពីខែមុន ហើយបានជាសះស្បើយពេញលេញ៕
ចែករំលែកព័តមាននេះ