Australian Open៖ Djokovic បាត់បង់សិទ្ធិប្រកួត ក្រោយទិដ្ឋាការចូលអូស្ត្រាលីត្រូវលុបចោល
អូស្ត្រាលី ៖ កីឡាករវាយកូនបាល់លំដាប់លេខ១ពិភពលោក Novak Djokovic ប្រហែលជាមិនអាចចូលរួមការប្រកួតពានរង្វាន់
អូស្ត្រាលី ៖ កីឡាករវាយកូនបាល់លំដាប់លេខ១ពិភពលោក Novak Djokovic ប្រហែលជាមិនអាចចូលរួមការប្រកួតពានរង្វាន់ Australian Open 2022 បានទេ បន្ទាប់ពីទិដ្ឋាការចូលប្រទេសអូស្ត្រាលីរបស់គេ ត្រូវអាជ្ញាធរលុបចោល។ នេះបើយោងតាមការបញ្ជាក់ពីលោក Greg Hunt រដ្ឋមន្ត្រីក្រសួងសុខាភិបាលអូស្ត្រាលីថ្លែងក្នុងបទសម្ភាសន៍នៅថ្ងៃទី៦ ខែមករា ឆ្នាំ២០២២ នេះ។ គួររំលឹកថា Australian Open៖ Djokovic បានសិទ្ធិប្រកួត ក្រោយការលើកលែងវេជ្ជសាស្ត្រលើបញ្ហាវ៉ាក់សាំង
លោក Greg Hunt បាននិយាយថា «Djokovic បានបរាជ័យក្នុងការផ្តល់ភស្តុតាងសមស្រប ដើម្បីបំពេញតម្រូវការចូលប្រទេសអូស្ត្រាលី ហើយក្រោយមកទិដ្ឋាការរបស់គេក៏ត្រូវបានលុបចោលតែម្តង»។
ម្ចាស់ជើងឯក Grand Slam ២០សម័យកាល សញ្ជាតិស៊ែបវ័យ៣៤ឆ្នាំ ដែលមិនបានបង្ហាញស្ថានភាពការចាក់វ៉ាក់សាំងបង្ការកូវីដ-១៩ របស់ខ្លួនជាសាធារណៈនោះ បានធ្វើដំណើរទៅកាន់ទីក្រុងមែលប៊ន កាលពីថ្ងៃទី៥ ខែមករា បន្ទាប់ពីអ្នករៀបចំអះអាងថា រូបគេទទួលបានការលើកលែងផ្នែកវេជ្ជសាស្ត្រ (ករណីមិនអាចចាក់វ៉ាក់សាំងបាន) ដើម្បីមានសិទ្ធិចូលរួមប្រកួតរដូវកាលនេះ។ ប៉ុន្តែអ្វីៗបានត្រឹមខកចិត្តប៉ុណ្ណោះ ក្រោយអាជ្ញាធរសម្រេចលុបទិដ្ឋាការរបស់គេ។
ប្រព័ន្ធផ្សព្វផ្សាយអូស្ត្រាលីរាយការណ៍ថា Djokovic ត្រូវបានឃុំខ្លួនបណ្តោះអាសន្ននៅអាកាសយានដ្ឋាន ក្រោយអាជ្ញាធរបដិសេធលិខិតលើកលែងផ្នែកវេជ្ជសាស្ត្រ។ មុនពេលបន្តស្នាក់នៅសណ្ឋាគារមួយកន្លែងរៀបចំដោយរដ្ឋាភិបាលអូស្ត្រាលី ដើម្បីរង់ចាំជើងហោះហើរត្រឡប់ទៅប្រទេសកំណើតរបស់គេវិញ។
នាយករដ្ឋមន្ត្រីអូស្ត្រាលី លោក Scott Morrison បានអះអាងថា «ទិដ្ឋាការរបស់ Djokovic ត្រូវបានលុបចោល។ ច្បាប់គឺជាច្បាប់ ជាពិសេសនៅពេលអ្នកមកដល់ព្រំដែនរបស់យើង។ គ្មាននរណាម្នាក់នៅលើច្បាប់បានទេ។ គោលនយោបាយព្រំដែនដ៏រឹងមាំរបស់យើងមានសារៈសំខាន់ណាស់ ដែលនាំឱ្យអត្រាមរណភាពដោយកូវីដ-១៩ ទាបបំផុតមួយនៅលើពិភពលោក»។
គួរបញ្ជាក់ថា ការប្រកួតព្រឹត្តិការណ៍ Australian Open 2022 នឹងចាប់ផ្តើមការប្រកួតនៅថ្ងៃទី១៧ រហូតដល់ថ្ងៃទី៣០ ខែមករា ឆ្នាំ ២០២២៕ (ប្រភពពី CNN)
ចែករំលែកព័តមាននេះ