រាជធានីភ្នំពេញ ៖ ក្រុមហ៊ុន Angkor Dairy Product Co.,Ltd ដែលជាក្រុមហ៊ុនផលិតទឹកដោះគោអង្គរ ដែលទើបសាងសង់រោងចក្រតម្លៃជាង២០លានដុល្លារនៅតំបន់សេដ្ឋកិច្ចពិសេសភ្នំពេញ បានបរិច្ចាគទឹកដោះគោចំនួន៥០០កេស
រាជធានីភ្នំពេញ ៖ ក្រុមហ៊ុន Angkor Dairy Product Co.,Ltd ដែលជាក្រុមហ៊ុនផលិតទឹកដោះគោអង្គរ ដែលទើបសាងសង់រោងចក្រតម្លៃជាង២០លានដុល្លារនៅតំបន់សេដ្ឋកិច្ចពិសេសភ្នំពេញ បានបរិច្ចាគទឹកដោះគោចំនួន៥០០កេស ជូនកាកបាទក្រហមកម្ពុជា បើគិតជាទឹកប្រាក់ស្មើប្រមាណ១ម៉ឺនដុល្លារអាមេរិក ។ ពិធីប្រគល់ និងទទួលទឹកដោះគោ សម្រាប់អំពើមនុស្សធម៌របស់កាកបាទក្រហមកម្ពុជា ធ្វើឡើងកាលពីរសៀលថ្ងៃទី១៧ មិថុនា ២០១៦ នៅសាខាកាកបាទក្រហមកម្ពុជា រាជធានីភ្នំពេញ ។
លោក Doan Quoc Khanh នាយកប្រតិបត្តិក្រុមហ៊ុន Angkor Dairy Product Co.,Ltd បានមានប្រសាសន៍ថាការបរិច្ចាគទឹកដោះគោជូនកាកបាទក្រហមកម្ពុជា រាជធានីនៅពេលនេះ ដើម្បីចូលរួមចំណែកទ្រទ្រង់សកម្មភាពមនុស្សធម៌របស់កាកបាទក្រហមកម្ពុជា ក្នុងការកាត់បន្ថយ និងសម្រាលទុក្ខលំបាករបស់ប្រជាពលរដ្ឋរងគ្រោះនៅទូទាំងប្រទេសកម្ពុជា ព្រោះមើលឃើញថា សកម្មភាពកាកបាទក្រហមកម្ពុជា ដែលកំពុងធ្វើរាល់ថ្ងៃនេះ ពិតជាល្អណាស់ ក្នុងការជួយសម្រាលទុក្ខប្រជាពលរដ្ឋដោយមិនប្រកាន់បក្សពួក ។
លោកបន្តថា ក្រុមហ៊ុនមកវិនិយោគនៅក្នុងប្រទេសកម្ពុជា មិនមែនមកស្វែងរកតែប្រាក់ចំណេញប៉ុណ្ណោះទេ តែទន្ទឹមនឹងវិនិយោគរកប្រាក់ចំណេញ ក្រុមហ៊ុនក៏បានគិតគូរខ្ពស់ផងដែរ ពីសកម្មភាពមនុស្សធម៌ ដូចជាក់ស្ដែងពេលនេះជាដើម ដោយក្រុមហ៊ុនបានបរិច្ចាគទឹកដោះគោសម្រាប់ការចាត់ចែងនានារបស់កាកបាទក្រហមកម្ពុជា ក្នុងការជួយសម្រាលទុក្ខប្រជាពលរដ្ឋ ជាពិសេសប្រជាពលរដ្ឋក្រីក្រដែលនៅដាច់ស្រយាល ។
លោកជំទាវ ឡោក ខេង សមាជិការដ្ឋសភា និងជាអនុប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ បានពាំនាំប្រសាសន៍សួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ដែលជានិច្ចកាលតែងតែគិតគូរពីផលលំបាករបស់ប្រជាពលរដ្ឋគ្រប់ពេលវេលា និងថ្លែងអំណរគុណចំពោះទឹកចិត្តសប្បុរសធម៌របស់ក្រុមហ៊ុនទឹកដោះគោអង្គរ ដែលផ្តល់លទ្ធភាពឱ្យកាកបាទក្រហមមានលទ្ធភាពចែកជូនអ្នកជំងឺ កុមារកង្វះអាហារូបត្ថម្ភ ។
លោកជំទាវ បានថ្លែងអំណរគុណដល់ក្រុមហ៊ុន Angkor Dairy Product ដែលបានមកវិនិយោគនៅក្នុងប្រទេសកម្ពុជា ហើយថែមទាំងបានគិតគូរជាមួយអង្គការមនុស្សធម៌ដ៏ធំនៅក្នុងប្រទេសកម្ពុជា ក្នុងការចូលរួមដោះស្រាយបញ្ហាខ្វះខាតដល់ប្រជាពលរដ្ឋទូទាំងប្រទេស ។ ហើយអំណោយរបស់ទឹកដោះគោអង្គរ ជាការរួមចំណែកជាមួយកាកបាទក្រហមកម្ពុជា ក្នុងការគាំទ្រ និងគាំពាដល់សុខុមាលភាពរបស់កុមារកម្ពុជា និងជួយដល់ជនរងគ្រោះ អ្នកជំងឺជាដើម ។
គួរបញ្ជាក់ថា ក្រុមហ៊ុនផលិតទឹកដោះគោរបស់វៀតណាម VINAMILK និង ក្រុមហ៊ុនBPC Trading របស់កម្ពុជាបានចាប់ដៃគូវិនិយោគរួមគ្នាបង្កើតរោងចក្រផលិតទឹកដោះគោមួយនៅក្នុងតំបន់សេដ្ឋកិច្ចពិសេសភ្នំពេញដោយបានចំណាយទុនវិនិយោគប្រមាណ២៣លានដុល្លារអាមេរិក ដោយភាគហ៊ុនរបស់ BPC ៤៩ភាគរយនិង VINAMILK ចំនួន៥១ភាគរយ ៕
ចែករំលែកព័តមាននេះ