ផ្ទះជាន់ទី២បិទទ្វារទុកចោល មិនមានមនុស្សស្នាក់នៅនោះទេ ហើយក៏ត្រូវឆ្លងចរន្តអគ្គិសនី បណ្តាលឱ្យក្លាយជាអណ្តាតភ្លើងឆាបឆេះ បង្កឱ្យការភ្ញាក់ផ្អើលដល់
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ផ្ទះជាន់ទី២បិទទ្វារទុកចោល មិនមានមនុស្សស្នាក់នៅនោះទេ ហើយក៏ត្រូវឆ្លងចរន្តអគ្គិសនី បណ្តាលឱ្យក្លាយជាអណ្តាតភ្លើងឆាបឆេះ បង្កឱ្យការភ្ញាក់ផ្អើលដល់ប្រជាពលរដ្ឋនៅក្បែរគ្នាភ័យស្លន់ស្លោ រួចរាយការណ៍ប្រាប់សមត្ថកិច្ចមូលដ្ឋាន ដើម្បីហៅរថយន្ដពន្លត់អគ្គិភ័យចេញអន្តរាគមន៍បាញ់ទឹកពន្លត់ភ្លាមៗឱ្យទាន់ពេលវេលា ។
សេចក្តីរាយការណ៍បានឱ្យដឹងថា ហេតុការណ៍ភ្ញាក់ផ្អើលនេះដែរ បានកើតកាលពីវេលាម៉ោង២និង៣០នាទីរំលងអធ្រាត្រ ឈានចូលថ្ងៃទី២៥ ខែធ្នូ ឆ្នាំ២០២១ នៅចំណុចផ្ទះលេខ 744E2 តាមបណ្ដោយមហាវិថីកម្ពុជាក្រោម ជិតស្តុបសាលាសន្ធរម៉ុក ស្ថិតក្នុងសង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ ។
បើតាមប្រភពពីប្រជាពលរដ្ឋដែលរស់នៅជិតកន្លែងកើតហេតុ បានប្រាប់អោយដឹងថា ផ្ទះកើតហេតុខាងលើ គឺម្ចាស់ផ្ទះបិទទ្វារទុកចោលមិនសូវមកស្នាក់នៅទេ ហើយនៅមុនពេលកើតហេតុ គេបានឃើញមានផ្សែងហុយលាយឡំជាមួយនឹងអណ្ដាតភ្លើងចេញពីផ្ទះកើតហេតុខាងលើនោះ ក៏រាយការណ៍ប្រាប់សមត្ថកិច្ចមូលដ្ឋាន ដើម្បីទាក់ទងហៅរថយន្ដបង្ការ និងពន្លត់អគ្គិភ័យចេញអន្តរាគមន៍ភ្លាមៗផងដែរ។
ប្រភពដដែលបន្តថា ខណៈពេលដែលសមត្ថកិច្ចជំនាញមកដល់ ក៏បានទាក់ទងរកម្ចាស់ផ្ទះមិនឃើញក៏សម្រេចចិត្តកាត់ទម្លុះទ្វារចូលធ្វើការបាញ់ទឹកពន្លត់ភ្លាមៗឱ្យបានទាន់ពេលវេលា ដោយមិនមានការឆ្លងរាលដាលដល់ផ្ទះអ្នកជិតខាងឡើយ និងបានប្រើប្រាស់រថយន្តពន្លត់អគ្គិភ័យអស់ចំនួ០១គ្រឿង គ្រាន់តែបណ្តាលឱ្យខូចខាតសម្ភារៈក្នុងផ្ទះកើតហេតុអស់មួយចំនួនតូចតែប៉ុណ្ណោះ។
បន្ទាប់ពីពន្លត់ចប់ សមត្ថកិច្ចជំនាញបានធ្វើការត្រួតពិនិត្យតាមជំនាញ ហើយរកឃើញថា មូលហេតុដែលបង្កឱ្យមានអគ្គិភ័យកើតឡើងខាងលើនេះ គឺដោយសារតែឆ្លងចរន្តអគ្គិសនីនៅក្នុងបន្ទប់បាំងកុងប្លាកេ ។
ចែករំលែកព័តមាននេះ