ក្នុងអារម្មណ៍នឹកឃើញអតីតកាលដែលជាសិស្សហាត់របាំ បានភ្ញោចអារម្មណ៍អ្នកនាង សួស វិហ្សាបំផុត ចង់យំបន្តិច រលីងរលោងទឹកភ្នែកនឹកស្រណោះ ហើយពេលនេះ បានកែប្រែវាសនាអ្នកនាងក្លាយជា
រាជធានីភ្នំពេញ ៖ ក្នុងអារម្មណ៍នឹកឃើញអតីតកាលដែលជាសិស្សហាត់របាំ បានភ្ញោចអារម្មណ៍អ្នកនាង សួស វិហ្សាបំផុត ចង់យំបន្តិច រលីងរលោងទឹកភ្នែកនឹកស្រណោះ ហើយពេលនេះ បានកែប្រែវាសនាអ្នកនាងក្លាយជាតារាចម្រៀងល្បីល្បាញលំដាប់ប្រទេសម្នាក់ ដែលមានមហាជនទទួលស្គាល់។
ឱកាសរស់នៅមានបាន ព្រោះសិល្បៈ បានជម្រុញអោយ សួស វីហ្សា មិនមើលរំលង និងសម្រេចធ្វើគុណតបទៅប្រភពដើមដែលបានបណ្តុះត្រួយអោយនាងលូតលាស់ មានរស្មីពន្លឺក្នុងជីវិត។
ពិធីសំពះគោរព រំលឹកដឹងគុណគ្រូ ដែលបានរៀបចំឡើងដោយ សួស វីហ្សា ជាអតីតសិស្សរបាំ និងអតីតសិស្សគ្រប់ជំនាន់ទាំងអស់ ដែលប្រារព្ធឡើង នាថ្ងៃទី២៣ ខែធ្នូ ឆ្នាំ២០២១ ស្ថិតនៅទីតាំងសមាគមអប្សរា លើផ្លូវទំនប់ត្រឡោកបែក រាជធានីភ្នំពេញ។ ហើយក៏មានសិស្សជាច្រើនជំនាន់បានមកជួបជុំគ្នា ដើម្បីក្រាបសំពះដឹងគុណគ្រូ ហើយម្នាក់ៗបានជូនពរលោកគ្រូ អ្នកគ្រូ និងសុំខមាទោស ដែលសិស្សខុសឆ្គងកន្លងទៅ សូមមានការអធ្យាស្រ័យផងចុះ។
សួស វីហ្សា ដែលបានចូលរួមផ្តើមគំនិត និងបានទាំងរាំបង្ហាញនូវក្បាច់បុរាណខ្មែរផងនោះ បានបញ្ជាក់ថា នាងបានមករៀនរបាំនៅសមាគមអប្សរានេះ តាំងពីបានវ័យ៧ឆ្នាំ រហូតដល់១៧ឆ្នាំ។ នាងមិនភ្លេចទីនេះទេ នៅតែចងចាំ ហើយតែងតែស្រម៉ៃថា បើថ្ងៃក្រោយនាងមានបាន មានការងារធ្វើនោះ នាងនឹងត្រឡប់មកដឹងគុណគ្រូអោយបាន ព្រោះជាកំណើតយើង។
សួស វីហ្សា ថា សាលានេះហើយ ធ្វើអោយនាងយល់ដឹងសិល្បៈចេះរាំរបាំបុរាណ ចេះច្រៀងលើកដាក់ និងចេះវិជ្ជាសិល្បៈផ្សេងៗទៀតដែលលោកគ្រូ អ្នកគ្រូផ្តល់អោយ។ យើងគ្មានអ្វីច្រើនទេ មានតែការអរគុណ ដែលលោកអ្នកមានគុណ ជាគ្រូ ជួយបណ្តុះពួកយើងខ្ញុំគ្រប់ជំនាន់អោយមានថ្ងៃនេះឡើង ។ សូមប្អូនរលកក្រោយជាទំពាំង កុំភ្លេចឬស្សី ហើយអាចយកគម្រូមួយនេះធ្វើតាម និងចេះអោយតម្លៃសិល្បៈ ចេះការពារ ចេះលើកស្ទួយ មុនអោយតម្លៃបរទេស។
សួស វីហ្សា ក៏បានក្រាបសំពះអរគុណ និងជូនជាកញ្ចប់ថវិកាមួយចំនួនទាំងគ្រូ និងសិស្សរៀននៅទីនោះ ហើយនឹងពិសារអាហាសាមគ្គីរួមគ្នា។ ចង់ដឹងថា តើសួស វីហ្សា នៅចងចាំក្បាច់របាំបានកម្រិតណា តោះសូមទស្សនាវីដេអូដូចតទៅ ៖
ចែករំលែកព័តមាននេះ