រាជធានីភ្នំពេញ៖ នៅទីបំផុត កម្លាំងកងរាជអាវុធហត្ថរាជធានីភ្នំពេញ ដឹកនាំដោយលោកឧត្តមសេនីយ៍ឯក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ បានតាមចាប់ក្រុមចោរប្លន់ផ្ទះឧកញ៉ា អ្នកលក់ឡេដ៏ល្បីឈ្មោះ អ៊ាន សៀវម៉ី បានហើយ នាយប់ថ្ងៃទី២០ ខែធ្នូ ឆ្នាំ២០២១។ កងរាជអាវុធហត្ថ ក៏ប្រមូលបានគ្រឿងអលង្ការពេជ្រ ត្រឡប់មកវិញផងដែរ។ តាមរូបភាព ដែលប៉េអឹមចែកចាយ គឺចាប់បានជនសង្ស័យជាច្រើននាក់ ។
នៅក្នុងប្រតិបត្តិការបង្ក្រាបនោះ កម្លាំងកងរាជអាវុធហត្ថ រាជធានីភ្នំពេញ ដកហូតបាននូវអាវុធវែងខ្លីមួយចំនួន និងគ្រឿងអលង្ការមួយចំនួន។ ការចាប់ក្រុមចោរប្លន់នោះ ធ្វើឡើង នៅក្នុងវីឡាមួយ ស្ថិតនៅក្នុងបុរី ប៉េងហួត ផ្លូវ ៦០ម៉ែត្រ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
តាមព័ត៌មានទទួលបាន គឺសមត្ថកិច្ចក្របួចបានមនុស្សស្រីប្រុសសរុប ៩ នាក់ ក្នុងនោះស្រី ៣ នាក់ ។
សូមរម្លឹកថា ក្រុមចោរ មានគ្នា ៤នាក់ បានជិះឡានទំនើបមួយគ្រឿង ចូលប្លន់ដល់ក្នុងភូមិគ្រឹះរបស់ឧកញ៉ា លក់ឡេ អ៊ាន សៀវម៉ី នៅក្នុងបុរីមូនថោន ក្នុងភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។ ហេតុការណ៍នោះ បានកើតឡើង កាលពីវេលាម៉ោង ១០ និង ៤០នាទីព្រឹក ថ្ងៃទី១៩ ខែធ្នូ ឆ្នាំ២០២១ ដោយប៉ូលិសមូលដ្ឋាន ភ្លាមៗ អះអាងប្រាប់អ្នកកាសែតថា ចោរប្លន់ប្រដាប់អាវុធ ១ក្រុមនោះ មានគ្នាប្រមាណ ៤នាក់ ជិះរថយន្តម៉ាកឡិចស៊ី GS-300 មួយគ្រឿង បានចូលទៅធ្វើសកម្មភាពប្លន់ឧកញ៉ា អ៊ាន សៀវម៉ី ដែលជាអ្នកលក់ឡេដ៏ល្បីម្នាក់ ដល់ភូមិគ្រឹះតែម្តង ដោយយកគ្រឿងអលង្ការពេជ្រ និងលុយសរុបជាង ១០លានដុល្លារ។ បន្ទាប់មក ក៏ក្រុមចោរប្លន់នោះ ក៏បានបើករថយន្តគេចខ្លួនទៅបាត់ដោយសុវត្ថិភាព។
ប៉ុន្តែនៅយប់ថ្ងៃទី១៩ ខែធ្នូ ឆ្នាំ២០២១ អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានប្រកាស តាមហ្វេសប៊ុកស្នងការដ្ឋាននគរបាលរាជធានីភ្នំពេញថា ទាក់ទងទៅនឹងជនមិនស្គាល់មុខមួយក្រុមចូលប្លន់ផ្ទះ លោកស្រី អ៊ាន សៀវម៉ី គឺមិនមានការបាត់បង់លុយរហូតដល់ ៩ ឬ ១០លានដុល្លារ ដូចសារព័ត៌មានមួយចំនួន បានចុះផ្សាយនោះទេ។
ស្នងការដ្ឋាននគរបាលរាជធានីភ្នំពេញ បានបញ្ជាក់ជូនសារធារណ:ជនទាំងអស់ ឱ្យបានជ្រាបថា នៅពេលនេះ សមត្ថកិច្ចចម្រុះ កំពុងតែធ្វើការសាកសួរ និងស្រាវជ្រាវឱ្យបានច្បាស់លាស់លើករណីនេះ។ ជាក់ស្តែង តាមចម្លើយជនរងគ្រោះ បានបញ្ជាក់យ៉ាងច្បាស់ថា មិនមានការបាត់បង់លុយឡើយ គឺបាត់តែខ្សែក ៣ខ្សែតែប៉ុណ្ណោះ៕
ចែករំលែកព័តមាននេះ