ខេត្តកំពត ៖ ជនសង្ស័យពីរនាក់ជាក្រុមចោរលួចគោ ត្រូវបានកម្លាំងសមត្ថកិច្ចការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកំពត សហការណ៍ជាមួយកម្លាំងនគរបាលស្រុកទ្រាំង ខេត្តតាកែវ ចុះឃាត់ខ្លួនតាមដីកាលេខ១១៤ ចុះថ្ងៃទី១៨ ខែកុម្ភៈ ឆ្នាំ២០១៦ និងដីកាលេខ១១៥ ចុះថ្ងៃទី១៨ ខែកុម្ភៈ ឆ្នាំ២០១៦ របស់លោក តុប ឈុនសុង ចៅក្រមស៊ើបសួរសាលាដំបូងខេត្តកំពត។ ជនសង្ស័យទី១មានឈ្មោះ ភិន ថន ភេទប្រុស អាយុ៤០ឆ្នាំ មានស្រុកកំណើតនៅភូមិកណ្តាលទួល ឃុំព្រៃខ្លា ស្រុកកោះអណ្តែត ខេត្តតាកែវ។
ជនសង្ស័យទី២មានឈ្មោះញ៉ែត វឿន ភេទប្រុស អាយុ៥០ឆ្នាំ មានស្រុកកំណើតនៅភូមិដូនតី ឃុំខ្វាវ ស្រុកទ្រាំង ខេត្តតាកែវ។ ជនសង្ស័យទាំងពីរនាក់ត្រូវបានចោទប្រកាន់ពីបទលួច (ក្នុងថ្ងៃតែមួយជាមួយគ្នា) ដែលប្រព្រឹត្តទៅនៅភូមិដំណាក់ក្រសាំង ឃុំប្រភ្នំ ស្រុកអង្គរជ័យ ខេត្តកំពត កាលពីថ្ងៃទី១៤ ខែកុម្ភៈ ឆ្នាំ២០១៦ បទល្មើសព្រហ្មទណ្ឌដែលមានចែងក្នុងមាត្រា៣៥៣, ៣៥៦ នៃក្រមព្រហ្មទណ្ឌ ៕
ចែករំលែកព័តមាននេះ