រាជធានីភ្នំពេញ ៖ មន្ត្រីជាន់ខ្ពស់គណបក្សប្រជាជនកម្ពុជា លោក ឈាង វុន បានមានប្រសាសន៍នៅប៉ុន្មាននាទីមុននេះថា ជំនួបកំពូលរវាងគណបក្សប្រជាជនកម្ពុជា (CPP) និងគណបក្សសង្គ្រោះជាតិ (CNRP)
រាជធានីភ្នំពេញ ៖ មន្ត្រីជាន់ខ្ពស់គណបក្សប្រជាជនកម្ពុជា លោក ឈាង វុន បានមានប្រសាសន៍នៅប៉ុន្មាននាទីមុននេះថា ជំនួបកំពូលរវាងគណបក្សប្រជាជនកម្ពុជា (CPP) និងគណបក្សសង្គ្រោះជាតិ (CNRP) អាចនឹងកើតមាន លុះណាតែ CNRP រៀបចំក្បាលម៉ាស៊ីនថ្នាក់ដឹកនាំឲ្យល្អ ។
ការលើកឡើងរបស់ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនានិងព័ត៌មាននៃរដ្ឋសភា ប្រាប់អ្នកសារព័ត៌មាននាព្រឹកថ្ងៃទី២៧ ឧសភា ២០១៦ធ្វើឡើងនៅក្រោយគណៈកម្មាធិការអចិន្ត្រៃយ៍រដ្ឋសភាបានបិទបញ្ចប់កិច្ចប្រជុំ នៅមុននេះបន្តិច បើទោះបីជាអវត្តមានខាង CNRP ។
ជុំវិញការលើកឡើងរបស់លោក ឈាង វុន ខាងលើនេះដែរ មិនទាន់មានប្រតិកម្មតបភ្លាមៗនៅឡើយទេពីមន្ត្រីជាន់ខ្ពស់គណបក្សសង្គ្រោះជាតិ គិតត្រឹមវេលាម៉ោង៩និង៤៥នាទីព្រឹកថ្ងៃសុក្រដដែលនេះ ប៉ុន្តែបើតាមលោក យឹម សុវណ្ណ ដែលថ្លែងប្រាប់ប្រព័ន្ឋផ្សព្វផ្សាយក្នុងស្រុកកាលពីពេលថ្មីៗនេះបានបញ្ជាក់ថា នៅពេលនេះគណបក្សសង្គ្រោះជាតិកំពុងបើកការពិភាក្សារកដំណោះស្រាយដើម្បីបញ្ចុះកម្តៅនយោបាយ ក៍ដូចជាបញ្ហាអ្នកជាប់ទោសផងដែរ ។
ដោយឡែក បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងទៀតថា កិច្ចប្រជុំគណៈកម្មាធិការអចិន្ត្រៃយ៍រដ្ឋសភាដែលធ្វើឡើងមិនដល់២០នាទីផងនោះ បានសម្រេចយកថ្ងៃទី៣០ ឧសភា ២០១៦ បើកសម័យប្រជុំពេញអង្គរដ្ឋសភាលើកទី៦ នីតិកាលទី៥ ប៉ុន្តែមិនទាន់ដឹងពីរបៀបវារៈនៅឡើយទេ៕
ចែករំលែកព័តមាននេះ