រាជធានីភ្នំពេញ ៖ លោកវរសេនីយ៍ត្រី ជាគ្រូបង្ហាត់កងយោធពលខេមរភូមិន្ទម្នាក់ រួមទាំងមិត្ដភក្ដិ២នាក់ទៀតត្រូវបានកំលាំងកងរាជអាវុធហត្ថខណ្ឌ និងប៉ូលិសខណ្ឌសែនសុខ ឃាត់ខ្លួនកាលពីវេលាម៉ោង៩ និង៣០ នាទីយប់ថ្ងៃទី១៥ ឧសភា ក្រោយពីបានផ្ទុះអាវុធជាច្រើនគ្រាប់ដោយសារតែស្រវឹងធ្លាក់ភ្នែក បន្ទាប់ពីចូលរួមជប់លៀងខួបកំណើតកូនស្រីអាយុ១៥ឆ្នាំ ។ តាមប្រភពខ្លះថា ការបាញ់នេះក្រៅពីស្រវឹង ក៏បានខឹងបងថ្លៃមិនព្រមជល់កែវជាមួយផងដែរ ទើបចេញពីភោជនីយដ្ឋាន មកបាញ់អស់ចំនួន៩គ្រាប់ ។
ហេតុការណ៍ផ្ទុះអាវុធនេះបង្កឱ្យមានការភ្ញាក់ផ្អើលនៅមុខភោជនីយដ្ឋានអូប៉េរ៉ា ស្ថិតនៅតាមផ្លូវលេខ២០០៤ ទល់មុខសាលាអន្ដរជាតិក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ ។ ទោះបីជាយ៉ាងណា ការផ្ទុះអាវុធនេះពុំបង្កឱ្យមនុស្សណាម្នាក់រងរបួសឡើយ ។ ជនដែលបង្កការផ្ទុះអាវុធអនាធិបតេយ្យត្រូវសមត្ថកិច្ចឱ្យដឹងថា ១-ឈ្មោះស៊ុំ វេង ភេទប្រុស អាយុ៣៨ឆ្នាំ ឋានន្ដរស័ក្ដិវរ សេនីយ៍ត្រី (ស័ក្ដិ៤) ជាគ្រូបង្ហាត់នៅសាលា ហ្វឹកហ្វឺនមិត្ដភាពកម្ពុជា-ឥណ្ឌូណេស៊ី ក្រាំងចេក ហើយបច្ចុប្បន្នកំពុងបង្ហាត់នៅខេត្ដព្រះវិហារ ២-ឈ្មោះគង់ សុភា ជាកងអង្គរក្ស ឋានន្ដរស័ក្ដិអនុសេនីយ៍ទោ និង៣-ឈ្មោះ សុខា ភារម្យ ភេទប្រុស អាយុ២៩ឆ្នាំ មានទីលំនៅក្នុងខណ្ឌមានជ័យ។
តាមសមត្ថកិច្ចកងរាជអាវុធហត្ថខណ្ឌសែនសុខបានឱ្យដឹងថា លោកវរសេនីយ៍ត្រីស៊ុំ វេង បានបង្កផ្ទុះអាវុធចំនួន៩គ្រាប់នៅមុខភោជនីយដ្ឋានអូប៉េរ៉ា បន្ទាប់ពីផឹកស្រវឹង ព្រមទាំងតូចចិត្ដខ្លួនឯង ដែលជល់កែវជាមួយបងថ្លៃហើយ បងថ្លៃមិនជល់កែវជាមួយ ក៏បានដើរចេញពីក្នុងភោជនីយដ្ឋានបាញ់កាំភ្លើងម៉ាកឡុក CF92 ចំនួន៩គ្រាប់បុកដី និង ឡើងលើបង្កឱ្យមានការភ័យខ្លាច និងភ្ញាក់ផ្អើលតែម្ដង ។ មន្ដ្រីកងរាជអាវុធហត្ថដដែលបន្ដទៀតថា នៅមុនពេលកើតហេតុ លោកវរសេនីយ៍ ត្រីរូបនេះរួមទាំងមិត្ដភក្ដិបានចូលរួមជប់ លៀងខួបកំណើតកូនស្រីរបស់ខ្លួនឈ្មោះវេង លីមី អាយុ១៥ឆ្នាំ ដែលបានបែកគ្នាប្រមាណ ៥ឆ្នាំមកហើយ ។
តាមព័ត៌មានបន្ដទៀតថា ជនបង្កបានដកកាំភ្លើងពីចង្កេះរបស់ឈ្មោះគង់ សុធា ហើយបាញ់ឡើងលើចំនួន៨គ្រាប់ និងបាញ់១គ្រាប់ទៀតបុកដី។ បន្ទាប់ពីបង្កការផ្ទុះអាវុធរួច កាំភ្លើងខ្លីត្រូវបានមិត្ដភក្ដិចាប់ដកហូតយកទៅបាត់ ហើយលោកវរសេនីយ៍ត្រីស៊ុំ វេង បានជិះរថយន្ដម៉ាកកាមរីស៊េរី៩៣ ពណ៌ស ពាក់ស្លាកលេខភ្នំពេញ ២D ១៤២៥ គេចខ្លួនជាមួយភរិយាក្រោយរបស់ខ្លួន ។ ចំណែកឈ្មោះគង់ សុភា បានជិះម៉ូតូគេចខ្លួនជាមួយឈ្មោះសុខា ភារម្យ ហើយត្រូវកំលាំងកងរាជអាវុធហត្ថខណ្ឌសែនសុខ និងប៉ូលិសខណ្ឌសែនសុខ តាមចាប់ខ្លួនបាននៅក្នុងភូមិ ត្រញំងឈូក រួចបញ្ជូនទៅកាន់ទីបញ្ជាការកងរាជអាវុធហត្ថរាជធានីភ្នំពេញ ។នៅចំពោះមុខសមត្ថកិច្ច បន្ទាប់ពីស្វាងពី ស្រវឹង លោកវរសេនីយ៍រូបនេះបានឱ្យដឹងថា គាត់បានផ្ទុះអាវុធពិតមែន ដោយសារតែស្រវឹងស្រាបាត់បង់ស្មារតី ។
ចែករំលែកព័តមាននេះ