ប្រទេសថៃ ៖ កម្ចីរបស់ធនាគារពាណិជ្ជទាំងអស់បានធ្លាក់ចុះកាលពីខែមីនាជាប្រចាំខែ ប៉ុន្តែសម្រាប់ប្រចាំឆ្នាំវិញបានកើនឡើង ខណៈដែលអ្នកធ្វើជំនួញស្វែងរកកម្ចីសម្រាប់វិនិយោគ។ នេះបើតាមរបាយការណ៍របស់ធនាគារថៃ ។
ធនាគារកណ្តាលថៃបានឱ្យដឹងទៀតថា កម្ចីរបស់ធនាគារពាណិជ្ជនៅក្នុងខែមីនា មានចំនួន១៣,៥ប៊ីលានបាតដែលបានធ្លាក់ចុះ ខណៈនៅខែកុម្ភៈ ស្មើនឹង១៣,៦ប៊ីលានបាត ប៉ុន្តែបានកើនឡើង១៣ប៊ីលានបាតពីមួយឆ្នាំទៅមួយឆ្នាំ ។
របាយការណ៍បង្ហាញទៀតថា នៅត្រីមាសទី១ ឆ្នាំ២០១៦ តម្រូវការឥណទានបានកើនឡើងតិចតួចបើធៀបនឹងត្រីមាសមុន ពោលគឺដោយសារមានការកើនឡើងក្នុងតម្រូវការឥណទានសម្រាប់ទ្រព្យសកម្មដោយក្រុមហ៊ុនធំៗ និងសហគ្រាសធុនតូច និងមធ្យម ។ នៅត្រីមាសបន្ទាប់ទៀតគេរំពឹងថា តម្រូវការឥណទាននឹងមានកំណើនសម្រាប់ក្រុមហ៊ុនធំ ជាពិសេស គឺអាហារ និងភេសជ្ជៈ ។
នៅក្នុងខែមីនានេះដែរ សម្រាប់កម្ចីផ្ទាល់ខ្លួនក៏បានកើនឡើងតិចតួចដែរ ដែលមានទឹកប្រាក់៣២២ប៊ីលានបាត ខណៈកាលពីខែកុម្ភៈ ស្មើនឹង៣២១ប៊ីលានបាត រហូតដល់៣១៣ប៊ីលានបាតពីមួយឆ្នាំទៅមួយឆ្នាំ ។ ប៉ុន្តែសម្រាប់ប្រាក់កម្ចីផ្ទាល់ខ្លួននៅក្នុងខែធ្នូវិញ បានធ្លាក់ចុះ៣២៥ប៊ីលានបាត ។
តាមរបាយការណ៍បានបង្ហាញទៀតថា តម្រូវការឥណទានអ្នកប្រើប្រាស់បានធ្លាក់ចុះ បើធៀបនឹងត្រីមាសមុន ពោលគឺដោយសារតែតម្រូវការឥណទានរថយន្តធ្លាក់ចុះ និងកម្ចីផ្សេងទៀតក៏បានធ្លាក់ចុះដូចគ្នាដែរ ។
រីឯឥណទានមិនទាន់សងដែលមានរយៈពេលកំណត់ជាង៣ខែនោះ សម្រាប់ឥណទានផ្ទាល់ខ្លួនបានធ្លាក់ចុះ១១,៣ប៊ីលានបាត បើធៀបនឹងត្រីមាសមុនស្មើនឹង១៦,៨ប៊ីលានបាត ។ នេះបើតាមការបញ្ជាក់របស់ធនាគារកណ្តាល ។
ចំពោះបំណុល Credit Card មានទឹកប្រាក់ចំនួន៣០៨ប៊ីលានបាតនៅក្នុងត្រីមាសទី១ ពោលគឺបានធ្លាក់ចុះ ខណៈកាលពីត្រីមាសមុនស្មើនឹង៣៣៦ប៊ីលានបាត ៕
ចែករំលែកព័តមាននេះ