ភ្នំពេញ៖ នៅយប់ថ្ងៃទី២៨ ខែវិច្ឆិកានេះ គណបក្សហ៊្វុនស៊ិនប៉ិច បានចេញលិខិតជូនដំណឹងពីការយាងសោយព្រះទិវង្គតរបស់សម្តេចក្រុមព្រះ នរោត្តម រណឫទ្ធិ ព្រះប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាព្រះប្រធានគណបក្សហ៊្វុនស៊ិនប៉ិច នៅថ្ងៃទី២៨ ខែវិច្ឆិកា ឆ្នាំ២០២១ វេលាម៉ោង ៩:៤០ព្រឹក នៅប្រទេសបារាំង ត្រូវនឹងម៉ោង ៣:៤០នាទីរសៀល ម៉ោងនៅកម្ពុជា ក្នុងព្រះជន្មាយុ ៧៧ព្រះវស្សា ដោយព្រះរោគាពាធ។
គណបក្សហ៊្វុនស៊ិនប៉ិច ប្រកាសថា «ព្រះសព សម្តេចក្រុមព្រះ នរោត្តម រណឫទ្ធិ នឹងត្រូវយាងដង្ហែមកកាន់ព្រះរាជាណាចក្រកម្ពុជា ក្នុងពេលដ៏ខ្លីខាងមុខនេះ»។
សូមរម្លឹកថា ប្រសូតនៅថ្ងៃទី២ ខែមករា ឆ្នាំ១៩៤៤ សម្តេចក្រុមព្រះ នរោត្តម រណឫទ្ធិ ជាព្រះរាជបុត្រទីពីររបស់ព្រះបាទ នរោត្តម សីហនុ និងត្រូវជាព្រះរាមនៃព្រះមហាក្សត្រកម្ពុជា បច្ចុប្បន្ន គឺព្រះករុណា ព្រះបាទសម្តេចព្រះបរមនាថ នរោត្តម សីហមុនី។
សម្តេចក្រុមព្រះ នរោត្តម រណឫទ្ធិ គឺជាព្រះប្រធានគណបក្សហ្វ៊ុនស៊ិនប៉ិច ហើយបានជាប់ឆ្នោត ក្លាយជានាយករដ្ឋមន្ត្រីទីមួយ នៅឆ្នាំ១៩៩៣ រហូតដល់ឆ្នាំ១៩៩៧។ បន្ទាប់មក ព្រះអង្គ ក៏ជាព្រះប្រធានរដ្ឋសភា ចន្លោះឆ្នាំ១៩៩៨ ដល់ងឆ្នាំ២០០៦។
កាលពីថ្ងៃទី១៧ ខែមិថុនា ឆ្នាំ២០១៨ ក្បួនរថយន្តរបស់សម្តេចក្រុមព្រះ នរោត្តម រណឫទ្ធិ ជួបគ្រោះថ្នាក់ចរាចរណ៍ នៅផ្លូវជាតិលេខ៤ ក្នុងខេត្តព្រះសីហនុ ដែលជាគ្រោះថ្នាក់លើកទី២ បណ្តាលឲ្យព្រះអង្គ រងរបួសធ្ងន់ធ្ងរ ហើយអ្នកម្នាង អ៊ុក ផល្លា ទទួលមរណភាព។ ភ្លាមៗ ព្រះអង្គ ត្រូវបានគេបញ្ជូនទៅព្យាបាល នៅប្រទេសថៃ អស់ជាច្រើនខែ និងក្រោយមក សម្តេចក្រុមព្រះ ដែលគង់នៅតែលើរទេះរុញ ត្រូវបានបញ្ជូនបន្ត ទៅព្យាបាលព្រះរោគ នៅប្រទេសបារាំង រហូតដល់ថ្ងៃចូលទិវង្គតនេះ៕
ចែករំលែកព័តមាននេះ