ខេត្តបាត់ដំបង ៖ ជនមិនស្គាល់មុខបានផ្លោះរបងចូលទៅលួចយកម៉ូតូចំនួន០២គ្រឿងចេញពីក្នុងបរិវេណផ្ទះ រួចជិះគេចខ្លួនដោយសុវត្ថិភាព ខណៈម្ចាស់កំពុងដេកលក់ ។ នេះបើតាមប្រភពពីសមត្ថកិច្ច។ ប្រភពបានឲ្យដឹងថា អំពើចោរកម្មនេះ ទំនងបានកើតឡើងលើសពីម៉ោង៣រំលងអធ្រាត្រ…
ខេត្តបាត់ដំបង ៖ ជនមិនស្គាល់មុខបានផ្លោះរបងចូលទៅលួចយកម៉ូតូចំនួន០២គ្រឿងចេញពីក្នុងបរិវេណផ្ទះ រួចជិះគេចខ្លួនដោយសុវត្ថិភាព ខណៈម្ចាស់កំពុងដេកលក់ ។ នេះបើតាមប្រភពពីសមត្ថកិច្ច។ ប្រភពបានឲ្យដឹងថា អំពើចោរកម្មនេះ ទំនងបានកើតឡើងលើសពីម៉ោង៣រំលងអធ្រាត្រ ថ្ងៃទី២៧ វិច្ឆិកា ស្ថិតក្នុងភូមិបែកចានថ្មី សង្កាត់ព្រែកព្រះស្ដេច ក្រុងបាត់ដំបង លុះព្រឹកឡើងពេលភ្ញាក់ពីដំណេកទើបម្ចាស់ផ្ទះដឹង។ ម្ចាស់ផ្ទះរងគ្រោះឈ្មោះ ទិត្យ សុផាត ហៅ ខ្ញី ប្រុស អាយុ៣២ឆ្នាំ រស់នៅក្នុងភូមិសង្កាត់ខាងលើ ។
បើតាមសេចក្ដីរាយការណ៍ពីសមត្ថកិច្ច ជនរងគ្រោះបានបាត់ម៉ូតូ០២គ្រឿង ខ្សែដៃអង្កាំស្រោបមាស០១ខ្សែ ប្រាក់ខ្មែរនិងប្រាក់ដុល្លារមួយចំនួនទៀត។ ម៉ូតូដែលទាំង០២គ្រឿងនោះ មាន ម៉ាក PCX ពណ៌ឈាមជ្រូក ស៊េរីឆ្នាំ២០១៨ ពាក់ស្លាកលេខ 1Y.5986 និង ម៉ាក CLick ពណ៌.ស ស៊េរីឆ្នាំ២០១៧ ពាក់ស្លាកលេខ 1AC.9558 ។ បើតាមការសន្និដ្ឋានរបស់ម្ចាស់ផ្ទះ ជនដៃដល់បានផ្លោះរបងដើរចូលទៅក្នុងផ្ទះ រួចដើររើកកាយរកសោផ្ទះ សោទ្វាររបងខាងមុខ លួចយកលុយខ្សែដៃ និង យកសោម៉ូតូដែលទុកលើតុ រួចចាក់សោម៉ូតូ និងសោរបងជិះចេញដោយសុវត្ថិភាពតែម្ដង ។
គួរគត់សម្គាល់ផងដែរថា បច្ចុប្បន្ននេះ អំពើចោរកម្មគ្រប់រូបភាព ត្រូវគេសង្កេតឃើញថា បាននិងកំពុងអង្រួនក្រុងបាត់ដំបង ស្ទើរគ្រប់ទីកន្លែង មិនថាពេលយប់ឬពេលថ្ងៃនោះទេ។ សមត្ថកិច្ចហាក់ទាល់ច្រកក្នុងការរិះរកវិធីទប់ស្កាត់ និង វិធានការបង្ក្រាប។
សមត្ថកិច្ចក៏បានកំណត់មុខសញ្ញានៃក្រុមចោរ ដែលកំពុងធ្វើសកម្មភាពយ៉ាងកក្រើកស្ទើររាល់ថ្ងៃនេះបានខ្លះៗដែរ។ សមត្ថកិច្ចបានអះអាងថា មុខសញ្ញាមួយចំនួនធំធ្លាប់ជាប់គុកស្ទើររាប់ភ្លេច មួយចំនួនទៀតទើបចាប់ផ្ដើមប្រព្រឹត្តតាមរយះគ្នីគ្នា។ ក្រុមនេះភាគច្រើនជាអ្នកប្រើប្រាសថ្នាំញៀន និងញៀនល្បែងអ៊ីនធឺណិតដែលកំពុងរីកចំរើនពេញក្រុងផងដែរ។
ទោះយ៉ាងណា ជុំវិញករណីចោរលួចម៉ូតូ០២គ្រឿងខាងលើនេះ សមត្ថកិច្ចហាក់មិនទាន់មានតម្រុយពីមុខសញ្ញាចោរនៅឡើយទេ ព្រោះកំពុងធ្វើការស្រាវជ្រាវនៅឡើយ៕
ចែករំលែកព័តមាននេះ