រាជធានីភ្នំពេញ ៖ បុរសម្នាក់ដែលជេរប្រមាថមើលងាយ និង ដេញវាយសមត្ថកិច្ច កំពុងអនុវត្តច្បាប់ចរាចរណ៍ផ្លូវគោក នៅចំណុចក្រោមស្ពានអាកាសស្ទឹងមានជ័យ ត្រូវបានមន្ត្រីនគរបាល សម្រេចបញ្ជូនទៅកាន់សាលាដំបូងរាជធានីភ្នំពេញហើយ ។
បើយោងតាម មន្ត្រីជំនាញ នៃស្នងការដ្ឋាននគរបាលរាជធានីភ្នំពេញ បានអោយដឹងថា ជនបង្ក ឈ្មោះ យឹង វណ្ណដា ភេទប្រុស អាយុ ២៧ ឆ្នាំ មុខរបរ ជាសន្តិសុខឯកជន ដែលបានធ្វើសកម្មភាពជេរប្រមាថមើលងាយ និង ដេញវាយសមត្ថកិច្ច កំពុងអនុវត្តច្បាប់ចរាចរណ៍ផ្លូវគោក នៅចំណុចក្រោមស្ពានអាកាសស្ទឹងមានជ័យ កាលពីល្ងាចថ្ងៃទី២៥ ខែវិច្ឆិកា ឆ្នាំ២០២១ កន្លងទៅ ត្រូវបានសមត្ថកិច្ច នៃការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញ កសាងសំណុំរឿង និងបញ្ជូនទៅតុលាការ នៅវេលាម៉ោង ១៦:០០នាទី រសៀលថ្ងៃទី២៦ ខែវិច្ឆិកា ឆ្នាំ២០២១ ដើម្បីចាត់ការតាមនិតិវិធីបន្ត ។
យុវជនទំនើងម្នាក់នេះ ត្រូវបានសមត្ថកិច្ចឃាត់ខ្លួនបានកាលពីវេលាម៉ោង ០១នាទីរសៀលថ្ងៃទី២៦ ខែវិច្ឆិកា ឆ្នាំ២០២១នេះ នៅចំណុចសាលមហោស្របចេនឡា ម្តុំផ្សារដើមគរ និងនាំខ្លួនទៅសាកសួរ នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ។
ការចាប់ឃាត់នេះ ក្រោយពីលោកនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ បានបញ្ជាតាមរយៈសារជាសំឡេង ឲ្យកម្លាំងនគរបាលរាជធានីភ្នំពេញ ចាប់ឃាត់ខ្លួនយុវជនទំនើងរូបនេះ បញ្ជូនខ្លួនទៅតុលាការ ។
សូមរម្លឹកឡើងវិញថា ជារឿងទំនើងមួយ ដែលយុវជនម្នាក់ បានជេរប្រមាថធ្ងន់ៗលើសមត្ថកិច្ចកំពុងអនុវត្តច្បាប់ ដោយគំរាមដកស័ក្តិចោល និងបម្រុងប្រើហិង្សាបន្ថែមទៀត ដោយគ្រាន់តែផ្តើមចេញពីការដែលយុវជនរូបនោះ ព្យាយាមជិះម៉ូតូត្រឡប់ក្រោយ គេចពីការគោលដៅអនុវត្តច្បាប់ចរាចរណ៍របស់សមត្ថកិច្ច ហើយបើកម៉ូតូទៅបង្កគ្រោះថ្នាក់ ដល់អ្នកដទៃទៀត ។
ហេតការណ៍នេះ បានបង្កអោយមានការភ្ញាក់ផ្អើលឡើងជាខ្លាំង កាលពីវេលាម៉ោង១៤រសៀលថ្ងៃទី២៥ ខែវិច្ឆិកា ឆ្នាំ២០២១ នៅចំណុចក្រោមស្ពានអាកាសស្ទឹងមានជ័យ ស្ថិតតាមបណ្តោយផ្លូវ២៧១ កែងនឹងផ្លូវលេខ២១៧ ក្នុងសង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។
យុវជនទំនើងរូបនោះ ជិះម៉ូតូមួយគ្រឿង ម៉ាកស្មាស់រ៉េវវូ ពណ៌ខ្មៅ ពាក់ស្លាកលេខ ភ្នំពេញ 1BG-5792 ពេលនោះ សមត្ថកិច្ចបានដើរ ទៅជួយលើកម៉ូតូ និងសាកសួរនាំ អំពីមូលហេតុ ស្រាប់តែយុវជនរូបនោះ កើតចិត្តខឹងសម្បាជាមួយសមត្ថកិច្ច នឹងបានប្រើប្រាស់សម្តីជេរដៀលប្រមាថធ្ងន់ៗ សុទ្ធតែពាក្យអសុរសអាមឹង និងបានសម្លុតគំរាមដកស័ក្តិ រួមជាបម្រុងនឹងប្រើប្រាស់ហិង្សា ទៅលើសមត្ថកិច្ចជាច្រើន លើកច្រើនសារទៀតផង បង្កអោយមានការភ្ញាក់ផ្អើលជាខ្លាំង ៕
ចែករំលែកព័តមាននេះ