ខេត្តប៉ៃលិន ៖ ក្រុមចោរបានប្រើល្បិចថ្មី ដោយយកឈ្មោះសាលាខេត្តដើម្បីបោកប្រាស់បុរសពោះម៉ាយម្នាក់ ដោយការទាក់ទងតាមទូរស័ព្ទឱ្យអ្នកជួលតុការដឹកកៅអីចំនួន១៥០ទៅសាលាខេត្ត ។ ក្រោយមក ជនសង្ស័យក៏ជួលរថយន្ត១គ្រឿងឱ្យដឹកយកទៅខេត្តកំពង់ចាម ឯម្ចាស់កៅអីដែលជួលស្មានថា គេមកដឹកទៅសាលាខេត្ត…
ខេត្តប៉ៃលិន ៖ ក្រុមចោរបានប្រើល្បិចថ្មី ដោយយកឈ្មោះសាលាខេត្តដើម្បីបោកប្រាស់បុរសពោះម៉ាយម្នាក់ ដោយការទាក់ទងតាមទូរស័ព្ទឱ្យអ្នកជួលតុការដឹកកៅអីចំនួន១៥០ទៅសាលាខេត្ត ។ ក្រោយមក ជនសង្ស័យក៏ជួលរថយន្ត១គ្រឿងឱ្យដឹកយកទៅខេត្តកំពង់ចាម ឯម្ចាស់កៅអីដែលជួលស្មានថា គេមកដឹកទៅសាលាខេត្ត តែទីបំផុតគេដឹកកៅអីគេចខ្លួនបាត់ស្រមោលមិនដឹង ទៅណា ។
ក្រោយពេលកើតហេតុ ជនរងគ្រោះមានការសោកស្តាយជាពន់ពេក ក៏ទៅដាក់ពាក្យបណ្តឹងនៅស្នងការដ្ឋាននគរបាលខេត្តដើម្បីឱ្យជួយអន្តរាគមន៍ តែមកដល់ពេលនេះ មិនទាន់ទទួលពន្លឺអ្វីនៅឡើយទេ ។ បុរសឈ្មោះ កោះ រិទ្ធី អាយុ៤៤ឆ្នាំ រស់នៅភូមិ
វាល ឃុំសាលាក្រៅ ស្រុកសាលាក្រៅ បានរៀបរាប់ទាំងបង្ហូរទឹកភ្នែកកាលពីវេលាម៉ោងប្រមាណ២និង៣០នាទីរសៀលថ្ងៃទី២៤ ខែវិច្ឆិកា ឆ្នាំ២០២១ ថា គាត់ប្រកបរបរធ្វើចុងភៅម្ហូបការ ដើម្បីចិញ្ចឹមជីវិតអស់រយ:ពេល៧ឆ្នាំមកហើយ ដោយទិញសម្ភាររោងការ តុ កៅអី អស់ប្រាក់ជាច្រើន ។ ក្រោយពីកើតមានបញ្ហាជំងឺកូវីដ-១៩ មុខរបរនេះក៏ផ្អាកអស់រយ:ពេលជាយូរ ជាកុសលម្តាយក៏ស្លា.ប់ ក្រោយមកប្រពន្ធឈឺក៏ស្លា.ប់បន្តបន្ទាប់ទៀត ។
គាត់បន្តថា ក្រោយពីម្តាយនិងប្រពន្ធស្លា.ប់មិនទាន់បាន១ខែផង ស្របពេលរាជរដ្ឋាភិបាលបើកឱ្យដំណើរការឡើងវិញ ស្រាប់តែកាលពីរសៀលថ្ងៃទី១១ ខែវិច្ឆិកា ឆ្នាំ២០២១កន្លងទៅ មានលេខទូរស័ព្ទមួយខ្សែបានទាក់ទងមកគាត់សុំជួលកៅអីចំនួន១៥០ដោយប្រាប់ថា ជាមន្ត្រីសាលាខេត្ត គឺថ្នាក់ដឹកនាំខេត្តឱ្យជួលយកទៅប្រជុំរយ:ពេល១ព្រឹក ។ គាត់យកតម្លៃ២៥ម៉ឺនរៀល ហើយក៏ព្រមព្រៀងគ្នា ។
ពេលដឹកកៅអីទៅដល់មុខសាលាខេត្ត ខាងគាត់សុំជួបអ្នកដែលទាក់ទងនោះផ្ទាល់ តែគេប្រាប់ថា ជាប់រវល់នៅក្រៅខេត្ត ហើយប្រាប់ឱ្យជួបនគរបាលដែលយាមនៅមុខសាលាខេត្តនោះ ។ ភ្លាមៗ គេក៏រកកន្លែងឱ្យទម្លាក់កៅអីនៅក្នុងសាលាខេត្ត ត្រង់អគារដែលទើបនឹងសាងសង់ថ្មី ។ នៅពេលរួចរាល់ គាត់ក៏សុំនគរបាលដែលយាមនៅមុខសាលាខេត្តត្រឡប់ទៅផ្ទះវិញ ។ រហូតដល់
រសៀលថ្ងៃទី១២ ខែវិច្ឆិកា ស្រាប់តែទាក់ទងទៅម្ចាស់លេខទូរស័ព្ទខាងលើអត់ចូល លុះមិនអស់ចិត្ត នៅថ្ងៃទី១៣ ខែវិច្ឆិកា គាត់ប្រើកូនឲ្យទៅរកមើលនៅសាលាខេត្តអត់ឃើញកៅអីនោះទេ ហើយនៅពេលសួរនាំនគរបាលដែលយាមទីនោះគេថា យកទៅសាលាក្រុងប៉ៃលិន ព្រោះដាក់ច្រឡំកន្លែង ។
នៅពេលទៅដល់សាលាក្រុង ខាងមន្ត្រីនៅទីនោះអត់ដឹងរឿងអ្វីទាំងអស់ ទើបសួរនាំទៅមានគេប្រាប់ថា មានជនមិនស្គាល់មុខបានជួលអ្នកស៊ីឈ្នួលបើកបររថយន្តម្នាក់ឈ្មោះ សួត រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ឱ្យដឹកកៅអីទាំងនោះយកទៅខេត្តកំពង់ចាមបាត់អស់ទៅហើយ ។
លោក កោះ រិទ្ធី និយាយទាំងអួលដើមកទៀតថា គាត់មិនអស់ចិត្តឡើយ ដោយក្រុមជនខិលខូចទាំងនោះហ៊ានយកឈ្មោះសាលាខេត្តប៉ៃលិនមកបោកប្រាស់ គឺបោកគាត់គិតជាប្រាក់ចំនួន៤.៥០០ដុល្លារ ដែលជាតម្លៃគាត់ទិញកៅអី កាលពីឆ្នាំមុន ក្នុង១តម្លៃ៣០ដុល្លារ ។ គាត់បានដាក់ពាក្យបណ្តឹងនៅស្នងការដ្ឋាននគរបាលខេត្ត និងអធិការដ្ឋាននគរបាលស្រុករួចរាល់អស់ហើយ តែរហូតមកដល់ពេលនេះ មិនទាន់ដឹងយ៉ាងណានោះទេ ហើយសង្ឃឹមថា នឹងមានពន្លឺខ្លះៗ ។
ពាក់ព័ន្ធនឹងបញ្ហានេះ លោក មាឃ សារ៉ន អធិការនគរបាលស្រុកសាលាក្រៅបានឱ្យដឹងថា ខាងលោកកំពុងពិនិត្យមើលឯកសារ និងតាមស៊ើបអង្កេតរឿងចោរបោកប្រាស់យកកៅអីជនរងគ្រោះនេះហើយ ។ មន្ត្រីមួយរូបនិយាយថា សម័យបច្ចេកវិទ្យានេះ អាចរកមុខជនបោកប្រាស់នេះឃើញ តាមរយៈលេខទូរស័ព្ទដែលទាក់ទងមកម្ចាស់តុការ ដោយប្ដឹងសមត្ថកិច្ចឱ្យស្រាវជ្រាវពីទីតាំងដែលទាក់ទងមក អាចនឹងមានពន្លឺមិនខាន តែត្រូវការពេលវេលាខ្លះ ក្នុងការស្រាវជ្រាវ ៕
ចែករំលែកព័តមាននេះ