ស្ត្រីជាម្តាយមួយចំនួនតូចតែងបែងចែកមិនដាច់ថា មួយណាជាបញ្ហាក្អែទឹកដោះ និងមួយណាជាបញ្ហាក្អួតដោយសារទឹកដោះច្រាល ។ អាការៈក្អែ និងក្អួតទឹកដោះមិនដូចគ្នាទេ ក្អួតគឺជាបាតុភូតចំនួនទឹកដោះជាច្រើនត្រូវបានហូរចេញតាមមាត់មកក្រៅ ចំណែកឯក្អែទឹកដោះគ្រាន់តែមានទឹកដោះចេញមកតាមមាត់ទារកបន្តិចបន្តួចប៉ុណ្ណោះ ។ មានមូលហេតុជាច្រើនដែលបណ្តាលឲ្យមានបញ្ហាក្អែទឹកដោះនេះកើតឡើងដូចជា៖
-ក្រពះរបស់ទារក៖ ទារកដែលនៅតូច ក្រពះរីកលូតលាស់មិនទាន់បានគ្រប់គ្រាន់ ដូច្នេះនៅពេលដែលទារកដេកត្រង់ខ្លួន អាហារដែលនៅក្នុងក្រពះតែងតែរត់បញ្ច្រាសកាត់តាមបំពង់អាហារ ហើយក៏អាចបណ្តាលឲ្យក្មេងមានអាការៈក្អែនេះកើតឡើងតែម្តង ។
-ការបំបៅដោះពុំបានត្រឹមត្រូវ៖ ទារកដែលបៅដោះឆ្អែតពេក ឬបៀមជញ្ជក់ក្បាលដោះ ទឹកដោះមិនបានចេញល្អ ដោយសារតែក្បាលដោះលឹបចូលក្នុង ធ្វើឲ្យទារកបឺតខ្យល់យ៉ាងច្រើនចូលទៅក្នុងពោះទារក ពេលនោះទឹកដោះច្រាលបញ្ច្រាសមកវិញដោយសារខ្យល់ធាក់ដោល ។
-ការរើ ឬការកម្រើកខ្លួនរបស់ទារកក៏អាចជាមូលហេតុបណ្តាលឲ្យកើតមានបញ្ហាក្អែទឹកដោះមកវិញដែរ ។
តាមការពិតក្អែទឹកដោះអាចទប់ស្កាត់បានទាំងស្រុងដោយស្ត្រីជាម្តាយគួរតែអនុវត្តតាមវិធីខាងក្រោម ៖
-នៅពេលបំបៅដោះកូន អ្នកត្រូវប្រាកដក្នុងចិត្តថា បំពង់ទឹកដោះ ទំហំរន្ធលើក្បាលដោះ ត្រូវតែសមស្របជាមួយនឹងដំណាក់កាលនៃការរីកលូតលាស់របស់ទារក ។
-ក្បាលដោះត្រូវតែមានទឹកដោះពេញ ចៀសវាងមានខ្យល់ក្នុងពេលបឺតចូលក្នុងក្រពះរបស់កូនតូច ។
-បើក្បាលដោះលឹបចូលក្នុង ត្រូវតែទាញច្បូតចេញមកវិញឲ្យទាន់ពេលវេលា និងគួរតែញាត់ក្បាលដោះចូលទៅក្នុងរង្វះមាត់ទារកឱ្យបានជ្រៅ ។
-រាល់ពេលបំបៅរួច គួរលើកកូនបីបញ្ឈរក្បាលមកដាក់ផ្តេកលើស្មារបស់ម្តាយ រួចទះគូទតិចៗដើម្បីឲ្យខ្យល់ក្នុងក្រពះភាយចេញមកក្រៅ ៕
ចែករំលែកព័តមាននេះ