ភ្នំពេញ៖ នៅថ្ងៃទី១៧ ខែវិច្ឆិកានេះ មេធាវីរាជរដ្ឋាភិបាល ដែលមានលោកមេធាវី គី តិច ជាប្រធាន បានចេញសេចក្តីថ្លែងការណ៍ ចំពោះវិធានការអនុវត្តសាលក្រមសាលដីកាលើទ្រព្យសម្បត្តិរបស់ទណ្ឌិត សម រង្ស៉ី។ នោះគឺតុលាការ សម្រេចរឹបអូស និងដាក់លក់ឡៃឡុងដី និងផ្ទះ ដែលជាអតីតទីស្នាក់ការអតីតគណបក្សសង្គ្រោះជាតិ នៅផ្លូវជាតិលេខ២ ក្នុងខណ្ឌមានជ័យ រាជធានីភ្នំពេញ។
សេចក្តីថ្លែងការណ៍របស់មេធាវីរាជរដ្ឋាភិបាល បានលើកឡើងថា «កម្ពុជាគ្មានទេ អ្នកទោសនយោបាយ ប៉ុន្តែមានអ្នកនយោបាយជាប់ទោស ដោយសារប្រព្រឹត្តិល្មើសច្បាប់។ ជនដែលប្រព្រឹត្តល្មើសច្បាប់ ត្រូវទទួលទោស និងទណ្ឌកម្ម តាមការកំណត់នៃច្បាប់។ ការអនុវត្តទោសទណ្ឌតាមសេចក្តីសម្រេចរបស់តុលាការ ដែលបានឆ្លងកាត់ដំណើរការនីតិវិធីតាមផ្លូវច្បាប់ និងក្លាយជាសេចក្តីសម្រេចស្ថាពររួចហើយនោះ ជានិយាមអនុវត្តទូទៅ និងជាប្រក្រតី នៅគ្រប់បណ្តាប្រទេសដែលប្រកាន់យកនីតិរដ្ឋ»។
សេចក្តីថ្លែងការណ៍ បន្តថា «នៅពេលដែលបុគ្គលណាម្នាក់ ប្រព្រឹត្តអំពើដែលជាបទល្មើសព្រហ្មទណ្ឌ ច្បាប់ព្រហ្មទណ្ឌកម្ពុជាកំណត់ចែងនូវទោសដាក់ពន្ធនាគារ និងទោសពិន័យជាប្រាក់ ជាអាទិ៍ ដែលជាលទ្ធផលនៃបណ្តឹងអាជ្ញា និងទណ្ឌកម្មសំណងផ្នែករដ្ឋប្បវេណី ដែលជាលទ្ធផលនៃបណ្តឹងរដ្ឋប្បវេណី ដើម្បីជួសជុលការខូចខាតរបស់ជនរងគ្រោះ ដែលបណ្តាលមកពីអំពើល្មើសនោះ។ ប្រសិនបើពិរុទ្ធជន មិនអនុវត្តសងសំណងជួសជុលការខូចខាត ដល់ដើមបណ្តឹងដោយស្ម័គ្រចិត្តទេ ដើមបណ្តឹងមានសិទ្ធិសុំឱ្យតុលាការ រឹបអូសទ្រព្យសម្បត្តិរបស់ពិរុទ្ធជនយកទៅលក់ឡៃឡុង ដើម្បីយកប្រាក់មកសងសំណងទៅតាមការកំណត់នៃសាលក្រម ឬសាលដីកា ដែលបានចូលជាស្ថាពរ ឬដែលមានអានុភាពអនុវត្តដោយបង្ខំបើទោះបីជាពិរុទ្ធជនបានគេចខ្លួន មិនទាន់អាចឱ្យអាជ្ញាធរមានសមត្ថកិច្ច អនុវត្តទោសព្រហ្មទណ្ឌលើបុគ្គលនោះក្តី»។
សេចក្តីថ្លែងការណ៍ បន្ថែមថា «បុគ្គលឈ្មោះ សម រង្ស៊ី និង ជូឡុង សូមួរ៉ា បានប្រព្រឹត្តអំពើដែលច្បាប់ព្រហ្មទណ្ឌកម្ពុជាបញ្ញត្តិថា ជាបទល្មើស។ នីតិវិធីរបស់តុលាការ បានប្រព្រឹត្តទៅតាមលំដាប់លំដោយ រហូតចប់សព្វគ្រប់តាមច្បាប់ជាធរមាន ហើយបុគ្គលនេះត្រូវបានតុលាការរកឃើញមានពិរុទ្ធភាពចំពោះការប្រព្រឹត្តអំពើល្មើសនឹងច្បាប់ព្រហ្មទណ្ឌ តាមរយៈសេចក្តីសម្រេចរបស់តុលាការ ដែលបានក្លាយជាស្ថាពរ បិទផ្លូវតវ៉ា និងមានអានុភាពអនុវត្ត ដែលជាលទ្ធផលបានកំណត់ផ្ដន្ទាទោសជនល្មើសនេះពីបទព្រហ្មទណ្ឌ និងកំណត់ផ្តល់សំណងរដ្ឋប្បវេណី ជូនដើមបណ្តឹងជាជនរងគ្រោះ»។
សេចក្តីថ្លែងការណ៍ដដែល បន្ថែមថា «បច្ចុប្បន្ន បុគ្គលបំពានច្បាប់ឈ្មោះ សម រង្ស៊ី និង ជូឡុង សូមួរ៉ា ត្រូវប្រឈមនឹងអំណាចសាលក្រម សាលដីកា ដែលចូលជាស្ថាពរជាបន្តបន្ទាប់ទៀត ព្រមទាំងបណ្តឹងសុំអនុវត្តដោយបង្ខំជាបន្តបន្ទាប់ទៀតផងដែរ»។
សេចក្តីថ្លែងការណ៍ដដែល លើកឡើងថា «នីតិវិធីអនុវត្តតាមរយៈការចដេញដីកាសម្រេចចាប់ផ្តើមការលក់ដោយបង្ខំ នូវអចលនវត្ថុ ដែលជាកម្មសិទ្ធិរបស់ពិរុទ្ធជនឈ្មោះ សមរង្ស៊ី និងជូឡុង សូមូរ៉ា ដែលជាទ្រព្យឯកជនរបស់ពិរុទ្ធជននេះ ជាការប្រតិបត្តិនូវច្បាប់ និងនីតិវិធីជាធរមាន ទាំងស្រុង។ ថ្វីត្បិតតែអចលនវត្ថុនេះ ធ្លាប់ត្រូវបានប្រើប្រាស់ជាទីស្នាក់ការនៃអតីតគណបក្សនយោបាយ ប៉ុន្តែទ្រព្យនេះ ជាកម្មសិទ្ធិរបស់រូបវ័ន្តបុគ្គល ឈ្មោះ សមរង្ស៊ី និងជូឡុង សូមូរ៉ា ដែលមានកាតព្វកិច្ច ត្រូវសងសំណងរដ្ឋប្បវេណី តាមអំណាចនៃសេចក្តីសម្រេចស្ថាពររបស់តុលាការ ហើយមិនបានសងសំណងនោះដោយស្ម័គ្រចិត្ត»។
សេចក្តីថ្លែងការណ៍ ក៏បានបន្ថែមថា «នៅពេលដែលនីតិវិធីលក់ដោយបង្ខំ ត្រូវបានអនុវត្តចប់រួចរាល់លើអចលនវត្ថុនេះ អចលនវត្ថុនេះ នឹងក្លាយជាកម្មសិទ្ធិរបស់អ្នកទិញ ដែលបានដេញថ្លៃទិញពីតុលាការ ហើយបុគ្គលសមរង្ស៊ី និងជូឡុង សូមូរ៉ា ឬជនណាក៏ដោយ គ្មានសិទ្ធិទទួលបានអចលនវត្ថុនេះវិញឡើយ។ ការរឹបអូស និងដាក់លក់ទ្រព្យសម្បត្តិរបស់ពិរុទ្ធជន ឬកូនបំណុល តាមផ្លូវតុលាការ ជានីតិវិធីអនុវត្តជាប្រក្រតី លើគ្រប់បុគ្គល ដែលមានកាតព្វកិច្ចសងសំណងរដ្ឋប្បវេណី មិនមែនអនុវត្តចំពោះតែសមរង្ស៊ី និងជូឡុង សូមូរ៉ា ទេ»៕
ចែករំលែកព័តមាននេះ