ខេត្តព្រៃវែង ៖ ទីតាំងអាជីវកម្មជីកខ្សាច់ភ្នំលក់ចំនួន២កន្លែងនៅក្បែរជើងភ្នំឈើកាច់កំពុងធ្វើអោយប្រជាពលរដ្ឋ ដែលរស់នៅក្បែរទីតាំងនោះមានការព្រួយបារម្ភជាខ្លាំង ដោយសារគេជីករណ្តៅជ្រៅៗខ្លាំងពេក ។ រណ្តៅដីទាំង២កន្លែងនោះ ទី១-មានឈ្មោះការដ្ឋានខ្សាច់ភ្នំ ស្រីពេជ្រ និងទី២-មានឈ្មោះ ការដ្ឋានខ្សាច់ភ្នំ ទៀង ឡយ ដែលការដ្ឋានទាំង២នេះ មានទីតាំងស្ថិតនៅជាប់ជើងភ្នំឈើកាច់ ក្នុងភូមិពោធ៌អណ្តោត ឃុំជើងភ្នំ ស្រុកបាភ្នំ ខេត្តព្រៃវែង។
ប្រជាពលរដ្ឋដែលរស់នៅក្បែទីតាំងរណ្តៅដីទាំង២នេះ បាននិយាយថា សព្វថ្ងៃពួកគាត់មានការព្រួយបារម្ភ ព្រោះរណ្តៅដីដែលគេជីកនៅក្នុងទីតាំងទាំង២នេះ គឺជ្រៅៗខ្លាំងណាស់ ជំរៅរហូតជាង១០ម៉ែត្រឯណោះ ហើយគេជីកត្រង់ចោទចុះទៅក្រោមតែម្តង ការជីកបែបនេះធ្វើអោយមានបញ្ហាប្រឈមខ្លាំង ទី១-គឺសត្វគោក្របីអ្នកស្រុក បើរអិលធ្លាក់ចុះទៅច្បាស់ជាងាប់អស់ ទី២-បើមានភ្លៀងធ្លាក់មក និងធ្វើអោយទឹកហូរច្រោះបាក់ដី ប៉ះពាល់ដល់ផលដំណាំអ្នកស្រុកថែមទៀត តើនរណាជាអ្នកទទួលខុសត្រូវ?
ចំពោះបញ្ហានេះ មន្ត្រីជំនាញរ៉ែនិងថាមពលខេត្តព្រៃវែង បានបញ្ជាក់ថា បានចុះទៅពិនិត្យមើលទីតាំងទាំង២ខាងលើនេះហើយ គឺឃើញថា បានជីកជ្រៅហួសពីច្បាប់ដែលបានអនុញ្ញាតពិតមែន ហើយខាងមន្ទីរក៏បានធ្វើការណែនាំដល់ម្ចាស់អាជីវកម្មទាំង២រួចហើយដែរ ដោយខាងទីតាំងឈ្មោះ ស្រី ពេជ្រ បានសន្យាថា ឈប់ជីកតទៅទៀតហើយ ដោយឡែកខាង ទៀង ឡយ ម្ចាស់សន្យាថា និងកែសម្រួល តែនៅបន្តជីកថែមដដែល ។
ចែករំលែកព័តមាននេះ