រាជធានីភ្នំពេញ ៖ ដើម្បីដោះស្រាយបញ្ហាទីផ្សារលក់កសិផលឱ្យបានទៀងទាត់ កុំឱ្យកសិករធ្វើការដាំដុះបានហើយជួបបញ្ហាគ្មានទីផ្សារនោះ អ្នកធ្វើពាណិជកម្ម បានជំរុញឱ្យមានការអនុវត្តការធ្វើកសិកម្មតាមកិច្ចសន្យារវាងក្រុមហ៊ុន និងបណ្តុំកសិករឱ្យបាននៅទូទាំងប្រទេស និងនៅលើវិស័យដាំដុះ ដើម្បីឱ្យកសិករចៀសផុតពីការខាតបង់ប្រាក់ រឿងគ្មានទីផ្សារនេះ…
រាជធានីភ្នំពេញ ៖ ដើម្បីដោះស្រាយបញ្ហាទីផ្សារលក់កសិផលឱ្យបានទៀងទាត់ កុំឱ្យកសិករធ្វើការដាំដុះបានហើយជួបបញ្ហាគ្មានទីផ្សារនោះ អ្នកធ្វើពាណិជកម្ម បានជំរុញឱ្យមានការអនុវត្តការធ្វើកសិកម្មតាមកិច្ចសន្យារវាងក្រុមហ៊ុន និងបណ្តុំកសិករឱ្យបាននៅទូទាំងប្រទេស និងនៅលើវិស័យដាំដុះ ដើម្បីឱ្យកសិករចៀសផុតពីការខាតបង់ប្រាក់ រឿងគ្មានទីផ្សារនេះ ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា កន្លងមកពេលកសិករផលិត និងដាំដុះបានហើយ តែងតែជួបបញ្ហាទីផ្សារដោយសារតែការអនុវត្តច្បាប់ការធ្វើកសិកម្មតាមកិច្ចសន្យាមិនបានត្រឹមត្រូវ និងច្បាស់លាស់ ។ លោកបានគូសបញ្ជាក់ថា «មកដល់បច្ចុប្បន្ននេះការអនុវត្តច្បាប់កិច្ចសន្យាកសិកម្មរវាងក្រុមហ៊ុន និងកសិករ ឃើញបានអនុវត្តបានមួយចំនួនតូចនៅក្នុងវិស័យស្រូវអង្ករ ។ តែយើងចង់ធ្វើឱ្យបាននៅទូទាំងប្រទេស មិនថាតែទៅលើដំណាំស្រូវតែមួយមុខនោះទេ មានស្វាយចន្ទី ចេក និងកសិផលជាច្រើនមុខផ្សេងទៀត ហើយត្រូវអនុវត្តច្បាប់កិច្ចសន្យានេះឱ្យមានប្រសិទ្ធភាព» ។
លោករដ្ឋមន្ត្រីកសិកម្ម រុក្ខាមប្រមាញ់ និងនេសាទ ធ្លាប់បានឱ្យដឹងថា ការធ្វើកសិកម្មតាមកិច្ចសន្យានេះមានសារៈសំខាន់ចំនួន ៦ចំណុចធំៗដូចជា ៖ ការកសាងភាពជាដៃគូរវាងអ្នកផលិត និងអាជីវករ ក្នុងដំណើរផលិតមានភាពយូរអង្វែង អ្នកផលិតមានក្តីសង្ឃឹម ជឿជាក់ថា ពេលគាត់ផលិតទៅមានទីផ្សារសម្រាប់អ្នកទិញ ការបង្កើតឱ្យមានខ្សែច្រវ៉ាក់ផលិតកម្មរវាងអ្នកផលិត អ្នកប្រមូលទិញ និងអ្នកកែច្នៃ កសិករនឹងទទួលបានបច្ចេកវិទ្យាកសិកម្មថ្មីៗតាមរយៈនៃការធ្វើកសិកម្មតាមកិច្ចសន្យា កសិករទទួលបានការគាំំទ្រហិរញ្ញប្បទានពីធនាគារឯកជន និងពីដៃគូអភិវឌ្ឍន៍ បើសិនយើងធ្វើកសិកម្មតាមកិច្ចសន្យានេះបានល្អប្រសើរ និងកសិករទទួលបានប្រាក់ចំណូលល្អ ជួយឱ្យគាត់កាត់បន្ថយការធ្វើការចំណាកស្រុកជាដើម ។
លោកឧកញ៉ា លឹម ហេង បានកត់សម្គាល់ថា បើមានការអនុវត្តកិច្ចសន្យាកសិកម្មបានត្រឹមត្រូវ នោះនឹងធ្វើឱ្យក្រុមហ៊ុនគេនឹងធ្វើកិច្ចសន្យាកសិកម្មជាមួយកសិករ បង្កើតទីផ្សារឱ្យកសិករមានលំនឹង ពេលគាត់ផលិតបានហើយក្រុមហ៊ុនប្រមូលទិញអស់ដោយផ្អែកលើកិច្ចសន្យាកសិកម្មរវាងក្រុមហ៊ុន និងក្រុមអ្នកផលិត ។
តាមអនុប្រធានសភាពាណិជ្ជកម្មកម្ពុជា ដើម្បីជំរុញឱ្យមានការអនុវត្តកិច្ចសន្យាកសិកម្មនេះ មានការរីកចម្រើនជាងពេលបច្ចុប្បន្ន គឺទាមទារឱ្យស្ថាប័នដែលជាអ្នកអនុវត្តច្បាប់ ជាអ្នកគាំំទ្រ និងធ្វើជាអ្នកជំរុញទើបអាចទៅរួច ។ លោកថា នៅប្រទេសថៃ កសិផលរបស់គេដើរនៅទូទាំងពិភពលោក ដោយសារតែគេចងជាសហគមន៍ និងអនុវត្តកិច្ចសន្យាកសិកម្មបានដោយជោគជ័យ (គោរពច្បាប់) តែបើមិនដូច្នេះទេទៅមិនរួចទេ វាធ្វើឱ្យវិនិយោគិនផ្សេងៗគេមានចិត្តរារែក ៕
ចែករំលែកព័តមាននេះ