យល់ដឹងពីសញ្ញាមួយចំនួនទាក់ទងនឹងរោគឆ្កួតជ្រូក
ឆ្កួតជ្រូកជាជំងឺប្រព័ន្ធប្រសាទដ៏រ៉ាំរ៉ៃមួយទាក់ទងនឹងខួរក្បាល ដែលបង្កឱ្យមានការរំខានដល់ដំណើរការធម្មតារបស់កោសិកាខួរក្បាលម្ដងហើយម្ដងទៀត និងមិនអាចស្មានបាន
ឆ្កួតជ្រូកជាជំងឺប្រព័ន្ធប្រសាទដ៏រ៉ាំរ៉ៃមួយទាក់ទងនឹងខួរក្បាល ដែលបង្កឱ្យមានការរំខានដល់ដំណើរការធម្មតារបស់កោសិកាខួរក្បាលម្ដងហើយម្ដងទៀត និងមិនអាចស្មានបាន ។ ការរំខានដល់កោសិកាខួរក្បាលអាចប៉ះពាល់ដល់សតិស្មារតីចលនារាងកាយក្នុងរយៈពេលខ្លី ឧទាហរណ៍ ដូចប្រកាច់ កន្ត្រាក់ ដួល បែកពពុះមាត់ជាដើម។ ការផ្លាស់ប្តូរនៃចលនារាងកាយនេះត្រូវបានគេហៅថា ជំងឺឆ្កួតជ្រូក ។
នៅប្រទេសកម្ពុជា អ្នកជំងឺឆ្កួតជ្រូកប្រមាណជា៦៦ភាគរយពុំបានទទួលការព្យាបាលត្រឹមត្រូវតាមវេជ្ជបញ្ជាទេ ឬពុំបានទទួលការព្យាបាលសោះ ។ សញ្ញាមួយចំនួនដែលអាចបញ្ជាក់ថា លោកអ្នកកើតមានជំងឺឆ្កួតជ្រូកដូចជា ប្រកាច់ ឬស្កន្ទ ដែលជាញឹកញាប់ពាក់ព័ន្ធនឹងសាច់ដុំកន្ទ្រាក់ភ្លាមៗដោយឯងឯង ហើយមនុស្សម្នាក់ដែលមានសញ្ញាប្រកាច់ ឬស្កន្ទអាចបែងចែកជាបួនប្រភេទដូចជា ៖
-ការប្រកាច់ ឬកន្ត្រាក់សាច់ដុំទាំងអស់នៃដងខ្លួន បែកពពុះមាត់ ភ្នែកស្លឺឡើងលើ ខាំគែមអណ្ដាត ហើយសន្លប់បាត់ស្មារតីមួយសន្ទុះ ក្រោយមកក៏ដឹងខ្លួនឡើងវិញ និងភ្លេចរឿងដែលកើតមានឡើង លក្ខណៈប្រភេទនេះ យើងតែងប្រទះឃើញញឹកញាប់ ។
-អ្នកជំងឺបាត់ស្មារតីមួយភ្លែត ភ្នែកសម្លឹងទៅលើរបស់អ្វីមួយជាប់ រាល់ការទំនាក់ទំនងជាមួយអ្នកនៅជុំវិញខ្លួនត្រូវកាត់ផ្ដាច់ដូចមនុស្សភ្លឹក ។
-អ្នកជំងឺមានអាការៈដូចជា កន្ត្រាក់ផ្នែកណាមួយនៃសាច់ដុំ ស្រវាំងភ្នែក ហ៊ឹងត្រចៀក ធុំក្លិនចម្លែក រកពាក្យនិយាយមិនឃើញ ឬពិបាក តែពុំមានបាត់បង់ស្មារតីទេ ហើយអាការៈនេះកើតមានដដែលៗ ញឹកញាប់ តែរយៈពេលខ្លីប៉ុណ្ណោះ ។
-អ្នកជំងឺមានចលនា ឬអាកប្បកិរិយាចម្លែកនៅលើផ្នែកណាមួយនៃដងខ្លួន ហើយស្មារតីគាត់អាចបាត់បង់ ។ ពេលខ្លះអ្នកជំងឺគាត់មានអារម្មណ៍ថា ដូចជាស្ថិតក្នុងភាពយល់សប្តិ គាត់មានអារម្មណ៍ថា ធ្លាប់បានជួបឬឃើញព្រឹត្តិការណ៍នឹងរួចមកហើយ តែតាមពិតគាត់មិនធ្លាប់ឃើញឬជួបទាល់តែសោះ ។
ជំងឺនេះបង្កឡើងដោយមូលហេតុច្រើនបែប ជំងឺនេះមិនមែនជាជំងឺឆ្លង តែមនុស្សមួយចំនួនតូចប៉ុណ្ណោះ ដែលអាចមានជំងឺឆ្កួតជ្រូកជាលក្ខណៈតំណពូជ ។ ភាគច្រើនជំងឺនេះបង្កឡើងដោយសារតែប៉ះពាល់ខួរក្បាល ដូចជាការរលាកសាច់ខួរក្បាល រលាកស្រោមខួរ ឬរងការប៉ះទង្គិចខួរក្បាលខ្លាំង ស្ទះឬដាច់សរសៃឈាមក្នុងខួរក្បាល ដុំសាច់ដុះក្នុងខួរក្បាល និងការលូតលាស់ខួរក្បាលមិនប្រក្រតីជាដើម ។ លោកអ្នកត្រូវចាំថា នៅពេលដែលកើតមានអាការៈជំងឺឆ្កួតជ្រូកនេះ មិនត្រូវដាក់រវត្ថុអ្វីចូលក្នុងមាត់ ឬក៏ឲ្យជនរងគ្រោះទទួលទានភេសជ្ជៈខណៈកំពុងប្រកាច់នោះទេ ៕
ចែករំលែកព័តមាននេះ