ធនាគារ ANZ Royal បានប្រកាសក្នុងថ្ងៃនេះថា ខ្លួនត្រូវទទួលស្គាល់ ដោយទស្សនាវដ្តីហិរញ្ញវត្ថុអន្តរជាតិ (Global Finance) ជា «ធនាគារផ្តល់ហិរញ្ញប្បទានពាណិជ្ជកម្មល្អបំផុតប្រចាំប្រទេសកម្ពុជា (Best Trade Finance Bank)» ក្នុងឱកាសផ្តល់រង្វាន់សម្រាប់ «អ្នកផ្តល់ហិរញ្ញប្បទានពាណិជ្ជកម្មល្អបំផុតក្នុងពិភពលោកក្នុងឆ្នាំ២០១៦» ។
អគ្គនាយកប្រតិបត្តិធនាគារ ANZ Royal លោក Grant Knuckey បានមានប្រសាសន៍ថា «នេះគឺជាឆ្នាំទី២ហើយដែលធនាគារ ANZ Royal ទទួលបានពានរង្វាន់កិត្តិយសនេះ ដែលទទួលស្គាល់ភាពជំនាញរបស់ក្រុមការងាររបស់ធនាគារក្នុងការផ្តល់សេវាកម្មហិរញ្ញប្បទានពាណិជ្ជកម្ម ។ នេះក៏បានសបញ្ជាក់ឱ្យឃើញច្បាស់អំពីសេចក្តីទុកចិត្តដែលអតិថិជនរបស់យើងមានចំពោះសេវាកម្មធនាគាររបស់យើងខ្ញុំ ស្របពេលដែលយើងខ្ញុំកំពុងនឹងបន្ត និងពង្រីកសក្តានុពលក្នុងវិស័យធនាគារ ក្នុងគោលបំណងរក្សានូវកេរ្តិ៍ឈ្មោះជាធនាគារល្អសម្រាប់ជាជម្រើសដល់អតិថិជនរបស់យើង ។
លោក Kunckey បន្តមានប្រសាសន៍ថា ជាមួយបណ្តាញដ៏ធំទូលាយគ្របដណ្តប់ទីផ្សារចំនួន៣៤ប្រទេសដែលមានបណ្តាអ្នកឯកទេសពាណិជ្ជកម្ម យើងមានសមត្ថភាពគ្រប់គ្រាន់ក្នុងការផ្សាភ្ជាប់ និងពង្រឹងទំនាក់ទំនងអតិថិជនរបស់យើង ។ ដូចគ្នាផងដែរ វត្តមានដ៏ជាក់លាក់ក្នុងតំបន់អាស៊ីជាអត្ថប្រយោជន៍មួយដ៏សំខាន់ ដើម្បីអភិវឌ្ឍន៍ និងវិនិយោគសម្រាប់អនាគត ។
ឆ្នាំនេះធនាគារ ANZ នៅប្រទេសអូស្ត្រាលី នូវែលហ្សេឡង់ និងវៀតណាម ក៏បានទទួលស្គាល់ជាធនាគារផ្តល់ហិរញ្ញប្បទានពាណិជ្ជកម្មល្អបំផុតពីទស្សនាវដ្តីហិរញ្ញវត្ថុអន្តរជាតិ (Global Finance) ។
ក្រុមប្រឹក្សាត្រួតពិនិត្យនៃទស្សនាវដ្តីហិរញ្ញវត្ថុអន្តរជាតិ (Global Finance) បានជ្រើសរើសអ្នកផ្តល់ហិរញ្ញប្បទានពាណិជ្ជកម្មល្អបំផុត ដោយផ្អែកលើការចូលរួមយោបល់ពីអ្នកវិភាគក្នុងឧស្សាហកម្មថ្នាក់ដឹកនាំក្រុមហ៊ុនផ្សេងៗ និងអ្នកឯកទេសលើបច្ចេកវិទ្យា ។ លើសពីនេះទៅទៀត ក៏មានការបោះឆ្នោតជ្រើសរើសពីសំណាក់ក្រុមអ្នកអានទស្សនាវដ្តីហិរញ្ញវត្ថុអន្តរជាតិ (Global Finance) ត្រូវបានធ្វើឡើងដើម្បីបញ្ជាក់ពីភាពត្រឹមត្រូវ និងជឿជាក់ទៅលើលទ្ធផល។ កត្តាសម្រាប់ជ្រើសរើសជ័យលាភីក៏បានរួមបញ្ចូលនូវទំហំប្រតិបត្តិការ ការគ្របដណ្តប់បណ្តាញជាសកល សេវាកម្មសម្រាប់អតិថិជន តម្លៃ និងភាពច្នៃប្រឌិតផ្នែកប្រព័ន្ធបច្ចេកវិទ្យា ។ រង្វាន់នេះ បានក្លាយជាបទដ្ឋាននៃទំនុកចិត្តសម្រាប់ឧត្តមភាពនៃសហគមន៍ហិរញ្ញវត្ថុពិភពលោក ។
ធនាគារ ANZ Royal គឺជាធនាគារមួយក្នុងចំណោមធនាគារថ្នាក់អន្តរជាតិដំបូងគេ ដែលបានចាប់ផ្តើមប្រតិបត្តិការក្នុងប្រទេសកម្ពុជា ក្នុងឆ្នាំ២០០៥ ។ ស្លាកសញ្ញាអាជីវកម្ម ANZ បានផ្តល់សេវាកម្មដល់អតិថិជនបុគ្គល ឥណទានអ្នកប្រើប្រាស់ សម្ព័ន្ធអតិថិជនសាជីវកម្ម និងស្ថាប័នរដ្ឋាភិបាលផងដែរ ។
ធនាគារ ANZ Royal ក៏ធ្លាប់ទទួលបានពានរង្វាន់ជា «ធនាគារឆ្នើមប្រចាំឆ្នាំ (Bank of the year)» ដោយទស្សនាវដ្តី Banker’s Magazine ក្នុង៣ឆ្នាំផ្សេងៗគ្នា និងទទួលបានពានរង្វាន់ «ធនាគារអន្តរជាតិដែលមានការអនុវត្តលេចធ្លោជាងគេ (Most Outstanding Performing Foreign Bank)» ២ឆ្នាំជាប់ៗគ្នាពីកម្មវិធីពានរង្វាន់ធនាគារ និងស្ថាប័នម៉ាក្រូហិរញ្ញវត្ថុកម្ពុជា ។ ធនាគារ ANZ Royal ក៏ធ្លាប់បានទទួលរង្វាន់ «ពុទ្ធិហិរញ្ញវត្ថុច្នៃប្រឌិត (Financial Insights Innovation Award)» ពីវិទ្យាស្ថានពុទ្ធិហិរញ្ញវត្ថុអាស៊ីប៉ាស៊ីហ្វិក (Financial Insights Asia Pacific Group) ។
ចែករំលែកព័តមាននេះ