កសិករត្អូញត្អែរ ស្រូវចុះថោក ឆ្នាំនេះ
- ស្វាយរៀង
ខេត្តស្វាយរៀង៖ ឈ្មួញវៀតណាម ឆ្លងដែនចូលមកទិញស្រូវ នៅផែកាណូត «ប្រឡាយទាហាន» នៃច្រកទ្វារព្រំដែនអន្តរជាតិព្រៃវល្លិ៍ ក្នុង ១ថ្ងៃ ជាង ២…
ខេត្តស្វាយរៀង៖ ឈ្មួញវៀតណាម ឆ្លងដែនចូលមកទិញស្រូវ នៅផែកាណូត «ប្រឡាយទាហាន» នៃច្រកទ្វារព្រំដែនអន្តរជាតិព្រៃវល្លិ៍ ក្នុង ១ថ្ងៃ ជាង ២ ០០០តោន។ ក៏ប៉ុន្តែប្រជាកសិករ អ្នកផលិតត្អូញត្អែរថា ស្រូវចុះថោកជាងឆ្នាំមុន ដោយសារតែមានវិបត្តិកូវីដ-១៩។ ចំណែកអ្នកប្រមូលទិញ ជាឈ្មួញកណ្តាល គឺថាជាឱកាសល្អ។
នៅព្រឹកថ្ងៃទី២៤ ខែតុលា ឆ្នាំ២០២១ នេះ មានទូកកាណូតឈ្មួញវៀតណាមជាច្រើនគ្រឿង បានឆ្លងដែន ចូលមកទិញស្រូវ នៅច្រករបៀងផែកាណូតប្រឡាយទាហាន ជិតច្រកទ្វារព្រំដែនអន្តរជាតិព្រៃវល្លិ៍ ស្ថិតនៅភូមិព្រៃវល្លិ៍ ឃុំថ្មី ស្រុកកំពង់រោទ៍។
បុរសជាម្ចាស់ផែកាណូតម្នាក់ បានឲ្យដឹងថា តម្លៃស្រូវ អ៊ីអ៊ែរ ពូជខា ៥១ ឬខា៥៤ ដែលវៀតណាម ហៅ ហាណាំបូង គឺវៀតណាមទិញ ក្នុង ១គីឡូក្រាម តម្លៃ ៩០០រៀល។ ចំណែកអ្នកប្រមូលទិញពីប្រជាកសិករអ្នកផលិតផ្ទាល់ គឺ ១គីឡូក្រាម តម្លៃ ៨០០រៀល ទៅ ៨៥០រៀលប៉ុណ្ណោះ។ ស្រូវ សុមាលី ទិញពីកសិករ ក្នុង ១គីឡូក្រាម តម្លៃ ១០៥០រៀល លក់ចេញឲ្យវៀតណាម ក្នុង ១គីឡូក្រាម តម្លៃ ១ ១៥០រៀល។ ស្រូវស្រែ (ស្ងួត) ទិញពីប្រជាពលរដ្ឋក្នុង ១គីឡូក្រាម តម្លៃ ១ ១៥០រៀល លក់ចេញឲ្យវៀតណាម ក្នុង ១គីឡូក្រាម តម្លៃ ១ ២៥០រៀល។ ហើយបើប្រៀបធៀបទៅតម្លៃស្រូវនៅឆ្នាំ២០២០ គឺតម្លៃស្រូវអ៊ីអ៊ែរ ខា ៥៤ ក្នុង ១គីឡូក្រាម ទិញពីកសិករផ្ទាល់តម្លៃ ៩៥០រៀល ទៅ ១ ០០០រៀល លក់ចេញឲ្យទៅវៀតណាម ក្នុង ១គីឡូក្រាម តម្លៃ ១ ១៣០រៀល។ ស្រូវសុមាលី ទិញពីកសិករ ក្នុង ១គីឡូក្រាម តម្លៃ ១ ១៥០រៀល លក់ចេញ ១គីឡូក្រាម តម្លៃ ១ ២៥០រៀល ទៅ ១ ៣០០រៀល។ ស្រូវស្រែ ទិញពីកសិករក្នុង ១គីឡូក្រាម តម្លៃ ១ ២៥០រៀល លក់ចេញឲ្យវៀតណាម ក្នុង ១គីឡូក្រាម តម្លៃ ១ ៣៥០រៀល។
ប្រភពបន្តទៀតថា ការអ្នកប្រមូលទិញស្រូវពីប្រជាកសិករអ្នកផលិតឲ្យតម្លៃថោកជាងឆ្នាំ២០២០ គឺមូលហេតុ ការចំណាយសេវាច្រើន លើថ្លៃដឹកជញ្ជូន ថ្លៃកម្មករ លើកដាក់រថយន្ត លើកចុះទូក ហើយបង់ឲ្យភាគីសមត្ថកិច្ចវៀតណាម គឺក្នុងទូកកាណូត ១គ្រឿង សមត្ថកិច្ចវៀតណាមយក ១ ៥០០ ០០០ដុង ស្មើ ២៧៥ ០០០រៀល ទើបគេឲ្យទូកកាណូតចូលមកដឹកស្រូវនៅក្នុងផែខ្មែរយើង ដោយសមត្ថកិច្ចវៀតណាម គេរឹតបន្តឹងទប់ស្កាត់ការឆ្លងជំងឺកូវីដ១៩។
ប្រភពដដែល បន្តទៀតថា ទោះបីយ៉ាងណា ក៏ប្រសើដែរ ដែលអាជ្ញាធរខេត្ត បានជួយសម្របសម្រួលទំនាក់ទំនងជាមួយភាគីវៀតណាម សុំឲ្យវៀតណាម ចូលមកប្រមូលទិញស្រូវ ចូលការណូតដល់ផែ កាណូតខ្មែរយើង។ ដោយនៅក្នុងខែកញ្ញា និងខែតុលា ឆ្នាំ២០២១នេះ នៅផែកាណូតទាហាន ព្រៃវល្លិ៍ នាំស្រូវចេញទៅប្រទេសវៀតណាម ក្នុងមួយថ្ងៃ ជាមធ្យម បានជាង ២ ០០០តោន៕ វ៉ាន់ ប៊ុនធឿន
ចែករំលែកព័តមាននេះ