ដឹងទាន់ ! កុំអីដឹកទៅវៀតណាមអស់បាត់
ខេត្តត្បូងឃ្មុំ ៖ គ្រាក់គ្រញូងជិត១០តោនដែលត្រូវគេលួចស្តុកទុកឃ្លាំងដោយខុសច្បាប់មួយកន្លែងនៅភូមិត្រពាំងផ្លុង ឃុំត្រពាំងផ្លុង ស្រុកពញាក្រែក ត្រៀមនាំចេញទៅប្រទេសវៀតណាម…
ខេត្តត្បូងឃ្មុំ ៖ គ្រាក់គ្រញូងជាង១៧តោនត្រូវគេលួចស្តុកទុកឃ្លាំងដោយខុសច្បាប់មួយកន្លែងនៅភូមិត្រពាំងផ្លុង ឃុំត្រពាំងផ្លុង ស្រុកពញាក្រែក ត្រៀមនាំចេញទៅប្រទេសវៀតណាម ត្រូវបានកម្លាំងសមត្ថកិច្ចបានចុះទៅបង្ក្រាបទាន់ពេលកាលពីវេលាម៉ោង១១ព្រឹក ថ្ងៃទី២៦ ខែមីនា ឆ្នាំ២០១៦ ដែលគ្រាក់គ្រញូងទាំងនេះជារបស់ឈ្មោះ ផែន ភេទប្រុស ត្រូវជាកូនប្រសាររបស់លោកមេឃុំត្រពាំងផ្លុង ហើយបានរត់គេចខ្លួនបាត់មិនដឹងជាទៅទីណានោះទេ ។
យោងតាមកំណត់ហេតុបានឲ្យដឹងថា នៅក្នុងប្រតិបត្តិការនេះគឺបានដឹកនាំដោយលោក ដេត ខេមរា ព្រះរាជអាជ្ញារងអមសាលាដំបូងខេត្ត និងលោក ប៉ោ សុកនី មន្ត្រីក្រឡាបញ្ជី ដែលមានការចូលរួមសហការដូចជា ១-លោក ឡាយ សាវង្ស រដ្ឋបាលបាលព្រៃឈើមេមត់, ២-លោក ឃឹម ប៊ុនធឿន សង្កាត់រដ្ឋបាលព្រៃឈើតំបែរ, ៣- លោក គង់ សុផា នាយការិយាល័យព្រហ្មទណ្ឌ, ៤-លោក ញឹម ស៊ីណា មេបញ្ជាការរងកងរាជអាវុធហត្ថស្រុកពញាក្រែក, ៥-លោក ថ្លាង វុឌ្ឈី នាយសេនាធិការអាវុធហត្ថត្បូងឃ្មុំ ព្រមទាំងមន្ត្រីជាច្រើនរូបទៀត ។
នៅក្នុងកំណត់ហេតុបានឲ្យដឹងទៀតថា ក្នុងពេលដែលសមត្ថកិច្ចចម្រុះចុះទៅបង្ក្រាបនោះ គេបានរកឃើញឈើគ្រាក់គ្រញូងរក្សាទុកនៅក្នុងឃ្លាំងរបស់ឈ្មោះ ផែន ភេទប្រុស ត្រូវជាកូនប្រសាររបស់លោក យៀប ជាមេឃុំត្រពាំងផ្លុង ។ ក្នុងពេលដែលចុះប្រតិបត្តិការនោះ គេឃើញមានមុខលោកមេឃុំត្រពាំងផ្លុងបានមករារាំងដល់កម្លាំងសមត្ថកិច្ចប្រហែល៣០នាទី ក្នុងនោះរួមមានទាំងកូនស្រីម្នាក់របស់មេឃុំដែលត្រូវជាប្រពន្ធរបស់ឈ្មោះ ផែន បានចេញមកអះអាងចំពោះមុខមន្ត្រីជំនាញថា ឈើគ្រាក់គ្រញូងនោះជារបស់ខ្លួន ។
លោក ហៀង សុភក្ត្រ ព្រះរាជអាជ្ញាអមសាលាដំបូងខេត្ត បានប្រាប់ឲ្យដឹងដែរថា រូបលោកបានទទួលព័ត៌មានសម្ងាត់នៅមូលដ្ឋានមកថា ទីតាំងឃ្លាំងខាងលើនេះមានលួចបង្កប់ឈើគ្រាក់គ្រញូង បន្ទាប់មកបានបញ្ជាផ្ទាល់ឲ្យព្រះរាជអាជ្ញារង និងក្រឡាបញ្ជី ចុះទៅកាន់ទីនោះជាបន្ទាន់ ដោយមានការសហការជាមួយមន្ត្រីរដ្ឋបាលព្រៃឈើ ព្រមទាំងអាវុធហត្ថ ។ ដំបូងត្រូវបានលោកមេឃុំត្រពាំងផ្លុងរារាំង ព្រមទាំងលើកហេតុផលថា ការបង្ក្រាបនេះនាំឲ្យប៉ះពាល់សន្លឹកឆ្នោតទៅវិញ តែរូបលោក (ព្រះរាជអាជ្ញាអមសាលាដំបូងខេត្ត) ដឹងថា គ្រាក់គ្រញូងដែលមានបរិមាណប្រហែលជាង១៧តោន ត្រូវបានគេចចារត្រូវជាមួយឈ្មួញវៀតណាមអស់ហើយ គឺត្រៀមនឹងដឹកចេញតែប៉ុណ្ណោះ ។ គម្រោងការនេះត្រូវបានរូបលោកដឹងទាន់ពេល ក៏បើកយុទ្ធនាការបង្ក្រាបតែម្តង ព្រមទាំងបានប្រគល់ឲ្យទៅរដ្ឋបាលព្រៃឈើដើម្បីចាត់ការបន្តតាមនីតិវីធីច្បាប់ផងដែរ ៕
ចែករំលែកព័តមាននេះ