រាជធានីភ្នំពេញ ៖ ចំណាយពេលជិត៤ឆ្នាំ ក្រោយភ្ជាប់ពាក្យ នៅ ស៊ីនឿន នៅមិនទាន់ចូលរោងការ។ ធ្វើអោយមហាជនលើកឡើងថា នៅ ស៊ីនឿន ដែលមានគូដណ្តឹងនៅអាមេរិក ប្រហែលជាមិនរៀបការនោះទេ យោងលើពេលរៀបពិធីភ្ជាប់ពាក្យ នៅ ស៊ីនឿន ធ្វើឡើងប្រហែលការដែរ។ ក្រោយមកក៏ស្ងាត់ដំណឹងជ្រើសរើសពាលាជ័យក្នុងថ្ងៃសំពះផ្ទឹមរហូតមកទល់ពេលនេះ។
ប៉ុន្តែទើបតែមានប្រភពមួយបានទម្លាយថា នៅ ស៊ីនឿន តារារូបសង្ហារប្រចាំផលិតកម្ម ហង្សមាស រូបនេះ រកបានថ្ងៃពិសេសរបស់ខ្លួនរួចហើយ នឹងប្រារព្ធឡើងនៅខែធ្នូ ឆ្នាំ២០២១ខាងមុខនេះ។ តាមប្រភពជិតដិតលើកឡើងថា នៅ ស៊ីនឿន បានសម្រេចយកថ្ងៃខួបកំណើតរបស់លោក នាខែធ្នូខាងមុខ ជាថ្ងៃសិរីសួស្តី មង្គលការ តែម្តង។
បន្ទាប់ពីរង់ចាំយ៉ាងយូរ ទុំជោរហើយនោះ គេក៏មិនរំពឹងថា នៅ ស៊ីនឿនរៀបការដែរ ដោយសារបរិយាកាសភ្ជាប់ពាក្យធ្វើឡើងធំដុំ មានញាតិមិត្តបងប្អូនដឹងឮស្រាប់។ ចុងក្រោយលោក និងគូដណ្តឹងដ៏ ស្រស់ស្អាតបានមូលមតិគ្នាប្រារព្ធពិធីមង្គលការតាមបំណងមិនខុសតម្រា។
អ្វីដែលកាន់តែពិសេសនោះ នៅ ស៊ីនឿន និងអនាគតភរិយា បានទាំងជ្រើសរើសសណ្ឋាគារ សុខាភ្នំពេញ ដែលជាកន្លែងលំដាប់ផ្កាយ៥ រៀបចំនៅទីនោះអោយសមសន្ទុះកេរ្តិ៍ឈ្មោះ។ អាចនិយាយបានថា ជាព្រឹត្តិការណ៍ពិសេសមួយទៀត សម្រាប់សង្គមសិល្បៈ ដែលនឹងកើតឡើងនៅចុងឆ្នាំ២០២១ លាចូលឆ្នាំ២០២២។
យ៉ាងណាមិញ នាប៉ុន្មានថ្ងៃមុននេះ នៅ ស៊ីនឿន និងគូដណ្តឹង បានចេញទៅថត Pre-Wedding បណ្តើរៗហើយ ដើម្បីទុកជាឯកសារ និងបង្ហាញដល់ភ្ញៀវកិត្តិយសដែលមកជូនពរជ័យ។ លោករៀបការហើយ អាចនឹងចេញទៅរស់នៅអាមេរិកច្រើនជាង។ ប៉ុន្តែពេលនេះ លោកមិនទាន់បោះបង់សិល្បៈនោះទេ ដោយថែមទាំងលេចឮថា ជិតចេញបទចម្រៀងថ្មីនាខែក្រោយនេះថែមទៀតផង។ មហាជននៅរង់ចាំតាមដានដំណឹងល្អមួយនេះ ដោយរំពឹងកូនកំលោះកូនក្រមុំពិតជាស្រស់ស្អាតមិនចាញ់គ្នាឡើយ។
ចែករំលែកព័តមាននេះ