ភ្ជួរដីប៉ះគ្រាប់DK.82 សំណាងល្អមិនផ្ទុះ
ខេត្តកំពង់ឆ្នាំង ៖ គ្រាប់ដេកា៨២ (DK.82) ចំនួន៤គ្រាប់ ត្រូវបានអ្នកភូមិប្រទះឃើញកាលពីរសៀលថ្ងៃទី២៤ ខែមីនា ឆ្នាំ២០១៦ ស្ថិតនៅក្នុងភូមិច្រណូក ឃុំច្រណូក ស្រុកកំពង់លែង
ខេត្តកំពង់ឆ្នាំង ៖ គ្រាប់ដេកា៨២ (DK.82) ចំនួន៤គ្រាប់ ត្រូវបានអ្នកភូមិប្រទះឃើញកាលពីរសៀលថ្ងៃទី២៤ ខែមីនា ឆ្នាំ២០១៦ ស្ថិតនៅក្នុងភូមិច្រណូក ឃុំច្រណូក ស្រុកកំពង់លែង ខណៈដែលអ្នកភូមិប្រើត្រាក់ទ័រភ្ជួរស្រែលើដីគាស់រានថ្មីនៅទីនោះ ។
លោក ប៉ាល់ ជឿន អធិការនគរបាលស្រុកកំពង់លែង បានឱ្យដឹងថា មុនពេលប្រទះឃើញគ្រាប់មិនទាន់ផ្ទុះទាំងនោះ អ្នកភូមិប្រើត្រាក់ទ័រភ្ជួរស្រែដែលទើបគាស់រានដីថ្មី នៅចំណុច ត្អួ-ស មានចម្ងាយជាង២០គីឡូម៉ែត្រ ពីភូមិច្រណូក ក៏ប្រទះឃើញគ្រាប់ DK.82 ចំនួន៤គ្រាប់ ហើយក៏រាយការណ៍ប្រាប់នគរបាលប៉ុស្តិ៍ច្រណូកចុះពិនិត្យ ។
ក្រោយពេលសមត្ថកិច្ចទៅដល់បានប្រទះឃើញគ្រាប់មិនទាន់ផ្ទុះទាំង៤គ្រាប់ ដែលរបើកចេញពីដីដោយសារតែការភ្ជួរដោយត្រាក់ទ័រ រួចក៏ប្រមូលយកទៅទុកក្រោមដើមរាំងនៅក្បែរនោះ និងបានរាយការណ៍ទៅអង្គភាពកម្ចាត់មីនស៊ីម៉ាក់ ។
ប្រភពដដែលបានបន្តថា គ្រាប់DK.82 ទាំងនោះនៅមានគុណភាពប្រមាណ៧០ភាគរយ សំណាងល្អដែលគ្រាប់ទាំងនោះមិនទាន់ផ្ទុះ បើសិនជាផ្ទុះវិញពិតជាមានគ្រោះថ្នាក់ដល់មនុស្សមិនខាន ព្រោះគ្រាប់ប្រភេទនេះមានកម្លាំងខ្លាំងណាស់ ។ តាមការសន្និដ្ឋានថា គ្រាប់ទាំងនោះសង្ស័យបន្សល់ទុកពីសម័យសង្គ្រាម ៕
ចែករំលែកព័តមាននេះ