ការអង្កេតធ្វើឡើងដោយគណៈកម្មការមួយនៃរដ្ឋាភិបាលអង់គ្លេសផ្អែកលើលទ្ធផលនៃការសិក្សារបស់ Rand Europe និងភ្នាក់ងារពិគ្រោះយោបល់ KPMG បានរកឃើញថា រ៉េស៊ីស្តង់និងបណ្តាថ្នាំអង់ទីប៊ីយ៉ូទិច(ថ្នាំផ្សះ)
ការអង្កេតធ្វើឡើងដោយគណៈកម្មការមួយនៃរដ្ឋាភិបាលអង់គ្លេសផ្អែកលើលទ្ធផលនៃការសិក្សារបស់ Rand Europe និងភ្នាក់ងារពិគ្រោះយោបល់ KPMG បានរកឃើញថា រ៉េស៊ីស្តង់និងបណ្តាថ្នាំអង់ទីប៊ីយ៉ូទិច(ថ្នាំផ្សះ)អាចឆក់យកជីវិតមនុស្ស១០លាននាក់នៅទូទាំងពិភពលោកគិតត្រឹមឆ្នាំ២០៥០ ។ បញ្ហានេះនឹងនាំឱ្យប៉ះពាល់ផលិតផលចំណូលក្នុងស្រុករបស់បណ្តាប្រទេសក្នុងលោកពី២,០-៣,៥ភាគរយ ។
គណៈកម្មការដែលមានឈ្មោះ The Review on Antimicrobial Resistance បាននិយាយថា ការវះកាត់ដែលកំពុងរីករាលជុំវិញពិភពលោក និងពេញនិយមបំផុតចំពោះការប្រើថ្នាំអង់ទីប៊ីយ៉ូទិចអាចនឹងផ្តល់ផលគ្រោះថ្នាក់កាន់តែខ្លាំង ប្រសិនបើគ្មានចំណាត់ការបន្ទាន់មួយ ។
លទ្ធផលនៃការពិនិត្យសើរើដែលប្រកាសដោយនាយករដ្ឋមន្ត្រីអង់គ្លេសដេវីដ កាមេរ៉ុននិងដឹកនាំប្រតិបត្តិការដោយអតតីប្រធានអ្នកវិភាគសេដ្ឋកិច្ចធនាគារវិនិយោគអាមេរិក Goldman Sachs កាលពីប៉ុន្មានឆ្នាំកន្លងទៅបានរកឃើញថា តំបន់ដែលមានអត្រាស្លាប់ដោយរ៉េស៊ីស្តង់ថ្នាំអង់ទីប៊ីយ៉ូទិចខ្ពស់បំផុតគឺទ្វីបអាស៊ីមាន៤,៧លាននាក់តាមពីក្រោយដោយទ្វីបអាហ្វ្រិកដែលមានអត្រាអ្នកស្លាប់ ៤,១លាននាក់ ។ នៅទ្វីបអឺរ៉ុប អត្រាស្លាប់គឺមាន ៣៩០ពាន់នាក់ខណៈនៅសហរដ្ឋអាមេរិកអត្រាអ្នកស្លាប់មាន ៣១៧ពាន់នាក់ ។ ប្រៀបធៀបទៅនឹងលទ្ធផលនៃការពិនិត្យសើរើនេះបានប៉ាន់ប្រមាណថា ជំងឺមហារីកដែលជាឃាតករធំបំផុតលំដាប់ទី២នឹងសម្លាប់ជីវិតមនុស្ស៨,២លាននាក់ដល់ឆ្នាំ២០៥០ ។
របាយការណ៍នៃការពិនិត្យសើរើខាងដើមបានបង្ហាញទៀតថា ប្រសិទ្ធភាពបំផ្លាញរបស់រ៉េស៊ីស្តង់អង់ទីប៊ីយ៉ូទិច គឺបានបង្ហាញខ្លួនវាផ្ទាល់នៅទូទាំងពិភពលោក ។ នៅសហរដ្ឋអាមេរិក និងទ្វីបអឺរ៉ុប ការឆ្លងមេរោគបណ្តាលមកពីរ៉េស៊ីស្តង់អង់ទីប៊ីយ៉ូទិចបច្ចុប្បន្នបានឆក់យកជីវិតមនុស្សយ៉ាងតិច៥ម៉ឺននាក់ក្នុងមួយឆ្នាំ ។
វាជាការព្រមានមួយផងដែរដែលថា រ៉េស៊ីស្តង់ថ្នាំមិនមែនជាហានិភ័យពីចម្ងាយនិងអរូបីនោះទេ ។ ក្នុងបញ្ហានេះគឺតម្រូវឱ្យមានអន្តរាគមន៍ពិសេសមួយដើម្បីបញ្ចៀសអ្វីដែលជាការគំរាមកំហែងដល់ប្រព័ន្ធលំហែទាំសុខភាពពិភពលោក ៕
ចែករំលែកព័តមាននេះ