ចាប់ពីឆ្នាំ២០១៥មកទល់នឹងឆ្នាំ២០១៦នេះ មានការផ្ទុះឡើងនៃរោគគ្រុនលឿងនៅប្រទេសអង់ហ្គោឡា ទ្វីបអាហ្វ្រិក ដែលបានសម្លាប់មនុស្សជាង១រយនាក់។ គ្រុនលឿងគឺជាជំងឺគ្រុនឈាមបង្កឡើងដោយវីរុស
ចាប់ពីឆ្នាំ២០១៥មកទល់នឹងឆ្នាំ២០១៦នេះ មានការផ្ទុះឡើងនៃរោគគ្រុនលឿងនៅប្រទេសអង់ហ្គោឡា ទ្វីបអាហ្វ្រិក ដែលបានសម្លាប់មនុស្សជាង១រយនាក់។ គ្រុនលឿងគឺជាជំងឺគ្រុនឈាមបង្កឡើងដោយវីរុស ហើយបានជាហៅគ្រុនលឿងដោយសារតែអ្នកកើតរោគនេះអាចនឹងវិវឌ្ឍទៅជាមានរោគសញ្ញាខាន់លឿង ។ ជំងឺនេះក៏ត្រូវបានចម្លងតាមរយៈមូសខ្លាខាំដូចគ្នាទៅនឹងជំងឺគ្រុនឈាម ហ្ស៊ីកា និងជំងឺឈីកដែរ។ ចំពោះរោគសញ្ញានៃជំងឺនេះត្រូវបានគេចែកចេញជាពីរដំណាក់កាល ៖
-ដំណាក់កាលទី១៖ ភាគច្រើននៃជំងឺនេះមានរោគសញ្ញាដូចជា គ្រុនក្តៅ ឈឺសាច់ដុំផ្នែកខ្នង ឈឺក្បាល ញាក់ញ័រ មិនឃ្លានអាហារ ចង្អោរ ក្អួត និងអាចជាដោយឯកឯងក្នុងកំឡុងពេល៣ទៅ៤ថ្ងៃ ។
-ដំណាក់កាលទី២៖ ១៥ភាគរយវិវឌ្ឍន៍ទៅជាគ្រុនក្តៅវិញ និងមានរោគសញ្ញាធ្ងន់ធ្ងរដូចជារោគខាន់លឿង និងក្អួតចង្អោរ។ បន្ទាប់មកអាចមានឈាមចេញតាមមាត់ ច្រមុះ ភ្នែក ឬក្រពះ។ ៥០ភាគរយនៃដំណាក់កាលទី២នេះអាចស្លាប់ក្នុងកំឡុងពេល១០ទៅ១៤ថ្ងៃ បើគ្មានការព្យាបាលបានត្រឹមត្រូវ ។
ជំងឺគ្រុនលឿងកើតជាប្រចាំនៅតំបន់ប្រទេសអាហ្វ្រិក និងអាមេរិកខាងត្បូង ។ ជំងឺនេះត្រូវបានរកឃើញតាំងពីសតវត្សទី១៧មកម៉្លេះ និងតែងតែរាលចូលទៅប្រទេសផ្សេងៗក្នុងពិភពលោក ហើយជំងឺនេះអាចកើតមាននៅលើមនុស្សគ្រប់វ័យ ។
បច្ចុប្បន្ននៅមិនទាន់មានថ្នាំព្យាបាលសម្លាប់វីរុសនេះនៅឡើងទេ ការព្យាបាលគឺពឹងផ្អែកតែទៅលើការព្យាបាលតាមវេជ្ជសាស្ត្រដើម្បីកាត់បន្ថយរោគសញ្ញារបស់អ្នកជំងឺ ។
វិធីបង្ការជំងឺនេះមានដូចជា៖
-ចាក់វ៉ាក់សាំងការពារ ដែលលោកអ្នកអាចរកបាននៅប៉ាស្ទ័រកម្ពុជា វ៉ាក់សាំងគឺជាការបង្ការដ៏មានប្រសិទ្ធភាព ។
-មុនពេលធ្វើដំណើរទៅប្រទេសដែលមានជំងឺប្រភេទនេះ លោកអ្នកចាំបាច់ត្រូវចាក់វ៉ាក់សាំងការពារឲ្យបាន១ខែមុនចេញដំណើរ។
-ការកម្ចាត់ដង្កូវទឹក ជម្រកមូស និងបង្ការមូសខ្លា ជាវិធានការដ៏មានសារសំខាន់បំផុតក្នុងការទប់ស្កាត់រោគលឿងខាងលើ ៕
ចែករំលែកព័តមាននេះ