ខេត្តព្រះសីហនុ ៖ មន្ទីរបរិស្ថានខេត្តបានរៀបចំសិក្ខាសាលាមួយស្តីពីការស្វែងយល់បច្ចេកទេសសម្អាតទឹកកខ្វក់ដោយធុងចម្រោះ(AQUA Septic Tank)គ្រាដែលទឹកសម្អុយជាច្រើនកំពុងត្រូវបានគេលួចបង្ហូរចូលទៅក្នុងសមុទ្របង្កឱ្យ
ខេត្តព្រះសីហនុ ៖ មន្ទីរបរិស្ថានខេត្តបានរៀបចំសិក្ខាសាលាមួយស្តីពីការស្វែងយល់បច្ចេកទេសសម្អាតទឹកកខ្វក់ដោយធុងចម្រោះ(AQUA Septic Tank)គ្រាដែលទឹកសម្អុយជាច្រើនកំពុងត្រូវបានគេលួចបង្ហូរចូលទៅក្នុងសមុទ្របង្កឱ្យមានការរិះគន់យ៉ាងខ្លាំងជុំវិញបញ្ហានេះ ។ សិក្ខាសាលានេះត្រូវបានធ្វើឡើងនាព្រឹកថ្ងៃទី២២ មីនា នៅសាលប្រជុំសាលាខេត្ត ។
លោក សមុទ្រ សុធារិទ្ធិ ប្រធានមន្ទីរបរិស្ថានខេត្តថ្លែងថា ដើម្បីឆ្លើយតបទប់ស្កាត់ការលួចបង្ហូរទឹកសម្អុយចូលសមុទ្រ បច្ចុប្បន្នមន្ទីរបរិស្ថាន បានកសាងអាងស្តុកសំណល់រាវទឹកស្អុយនៅខេត្តព្រះសីហនុពីរកន្លែង ។ អាងទាំងពីរនេះកំពុងដំណើរការបូមចេញដើម្បីបញ្ចូលក្នុងអាងប្រព្រឹត្តិកម្មរបស់ខេត្ត ព្រោះកន្លងមកតាមបណ្តាសណ្ឋាគារ ផ្ទះសំណាក់ ភោជនីយដ្ឋាន និង លំនៅឋានប្រជាពលរដ្ឋ ពុំទាន់បានបង្ហូរទឹកសម្អុយទាំងនោះចូលក្នុងអាងខាងលើនេះទេ ។
លោកបន្តថា ក្រុមការងាររបស់ លោក កំពុងបន្តការរៀបចំប្រព័ន្ធទាំងនោះ និងពិនិត្យឃើញថា តាមសណ្ឋាគារ ផ្ទះសំណាក់ ភោជនីយដ្ឋាន និងលំនៅឋាន បានបង្ហូរចូលទៅក្នុងអូរ ប្រឡាយ ហើយបានចាក់ចូលទៅក្នុងព្រែកនៅចុងអូរឈើទាល ។ ប្រភពទឹកសម្អុយនេះ បានហូរធ្លាក់ទៅព្រែកចុងអូរឈើទាលតាមប្រព័ន្ធលូដែលហូរចូលប្រឡាយនៅមុខសាលាក្រុង, ប្រព័ន្ធទឹកអូរ៣ និងបានស្តុកនៅក្រោមស្ពានគុម្ពឬស្សីក្បែរក្លិបកម្សាន្តអិលវីនិងលូបង្ហូរចូលសមុទ្ររបស់សណ្ឋាគារ Queen Co។ ទាំងអស់នេះគឺជាស្ថានភាពបំពុលបរិស្ថានដែលត្រូវកែលម្អ ពិសេសការបង្ហូរចូលសមុទ្រ ។
លោក យន្ត មីន អភិបាលខេត្ត មានប្រសាសន៍ថា បច្ចុប្បន្នខេត្តព្រះសីហនុបានកាត់បន្ថយច្រើនចំពោះការបំពុលបរិស្ថានដូចជាការបង្ហូរទឹកសម្អុយចូលសមុទ្រ ដែលកន្លងមកខេត្ត ពុំទាន់បានរៀបចំ ។ លោកអភិបាលខេត្តបានសំណូមពរដល់បងប្អូនប្រជាពលរដ្ឋក៏ដូចជាអាជីវករ ម្ចាស់ផ្ទះសំណាក់ សណ្ឋាគារ ភោជនីយដ្ឋាន សូមកុំបង្ហូរកាកសំណល់ចូលក្នុងសមុទ្រ ត្រូវបង្ហូរចូលក្នុងអាងចម្រោះ ដែលជំនាញបានខិតខំប្រឹងប្រែងធ្វើកន្លងមក ដើម្បីរក្សាការពារបរិស្ថានទាំងអស់គ្នា ។ បច្ចុប្បន្ន ខាងមន្ទីរបរិស្ថានខេត្តបាននិងកំពុងខិតខំប្រឹងប្រែងរៀបចំប្រព័ន្ធចម្រោះសំណល់រាវជាទឹកសម្អុយនៅក្នុងខេត្ត និងតាមកោះដូចជា នៅកោះរ៉ុងកំពុងរៀបចំអាងចម្រោះមួយកន្លែង ចំណែកក្រុងព្រះសីហនុក្បែរផ្លូវ៥០២ មួយកន្លែង និងចុងអូរឈើទាលមួយកន្លែង ហើយបូមចេញពីអាងទាំងនោះដើម្បីបញ្ចូលទៅក្នុងអាងប្រព្រឹត្តិកម្មដែលមន្ទីរសាធារណៈការជាអ្នកគ្រប់គ្រង ។
សូមបញ្ជាក់ថា ជុំវិញបញ្ហាទឹកសម្អុយនេះ បើយោងតាមប្រភពបណ្តាញទំនាក់ទំនងសង្គម facebook និងភ្ញៀវទេសចរជាច្រើនដែលបានមកកម្សាន្តនៅខេត្តព្រះសីហនុ បានសម្តែងទស្សនៈថា វាគួរណាស់តែដល់ពេលវេលាដែលអាជ្ញាធរ និងមន្ត្រីជំនាញពាក់ព័ន្ធក្នុងខេត្ត ចាត់វិធានការចំពោះបុគ្គលណាមួយដែលបាននិងកំពុងបំផ្លាញសង្គមជាតិ បំផ្លាញបរិស្ថាន ដោយបានបង្ហូរទឹកសម្អុយទាំងនោះចូលទៅក្នុងសមុទ្រ ។ កន្លងមក គេតែងឃើញមន្ត្រីជំនាញបានត្រឹមតែទៅឈរមើល ហើយអ្វីៗនៅដដែល ៕
ចែករំលែកព័តមាននេះ