ខេត្តបាត់ដំបង៖ ជនទំនើងចំនួន០៤នាក់ក្នុងចំណោមជាច្រើននាក់ ត្រូវកម្លាំងសមត្ថកិច្ចឃាត់ខ្លួនជាបន្តបន្ទាប់ នៅឃុំជ្រោយ
ស្ដៅ ស្រុកថ្មគោល កាលពីព្រឹកថ្ងៃទី២០ តុលា ដោយយោងតាមដីកាបញ្ជាឲ្យចូលខ្លួនរបស់តំណាងអយ្យការអមសាលាដំបូង
ខេត្ត ដែលបានចោទប្រកាន់ក្រុមជនអន្ធពាលទាំងនេះថា ជនសង្ស័យនិងការបំភ្លេចបំផ្លាញទ្រព្យសម្បត្តិអ្នកដទៃ (គប់កញ្ចក់រថយន្តអ្នកដំណើរពេលយប់) នៅតាមដងផ្លូវ ។
របាយការណ៍របស់អធិការស្រុកថ្មគោលបានឲ្យដឹងថា ជនសង្ស័យទាំង០៤នាក់ដែលសមត្ថកិច្ចឃាត់ខ្លួនមាន ១-ឈ្មោះ ឡោ សុជាតិ ហៅបឿក អាយុ២០ឆ្នាំ ២-ឈ្មោះ សុវណ្ណ ពេជ្រ អាយុ១៧ឆ្នាំ ៣-ឈ្មោះ ជូន សុខសាន្ត ហៅម៉ៅ អាយុ១៦ឆ្នាំ និង ៤-ឈ្មោះ ចាន់ សុជា អាយុ១៩ឆ្នាំ ពួកគេរស់នៅភូមិជ្រោយស្ដៅ ឃុំជ្រោយស្ដៅ ស្រុកថ្មគោល ។ ក្រុមនេះ ត្រូវជាប់សង្ស័យថា បាននាំគ្នាជិះម៉ូតូ ឬស្ទាក់គប់ទៅលើរថយន្តអ្នកដំណើរពេលយប់ជាច្រើនលើក តាំងពីខែកញ្ញា និងខែតុលា នេះ នៅលើកំណាត់ផ្លូវជាតិលេខ៥ ក្នុងភូមិសាស្ត្រ ឃុំជ្រោយស្ដៅ ដែលបណ្ដាលឲ្យរថយន្តជាច្រើនគ្រឿងរងការខូចខាត «បែកកញ្ចក់» ដោយសារតែជនអន្តពាលទាំងនេះ ក្ដៅក្រហាយនឹងរថយន្តបើកលឿន និងបើកភ្លើងភ្លឺខ្លាំងចាំងភ្នែកពួកគេ ។
អធិការស្រុកថ្មគោល លោក សេង លុច បានឲ្យដឹងថា ក្រុមនេះ មានបក្សពួកច្រើននាក់ តែងធ្វើសកម្មភាពគប់រថយន្តអ្នកដំណើរពេលយប់លើដងផ្លូវជាតិលេខ៥ ។ លោកបានប្រាប់ថា ក្នុងខែកញ្ញា និងខែតុលា ២០២១ ក្រុមនេះ បានគប់កញ្ចក់រថយន្តអ្នក ដំណើរចំនួន០២លើកផ្ទូនៗ។ លើកទី០១ ក្រុមនេះបាននាំគ្នាជិះម៉ូតូតាមគប់រថយន្តអ្នកដំណើរនៅយប់ថ្ងៃទី ១៣ កញ្ញា កន្លងទៅនេះ បណ្ដាលឲ្យរថយន្តធុនធ្ងន់ដឹកទំនិញ១គ្រឿងបែកកញ្ចក់ ហើយម្ចាស់រថយន្តបានដាក់ពាក្យប្ដឹង។ លើកទី០២ នៅយប់ថ្ងៃទី០១ តុលា ក្រុមដដែលនេះបាននាំគ្នា តាមស្ទាក់គប់រថយន្តធុនធ្ងន់បែបនេះ បណ្ដាលឲ្យបែកកញ្ចក់ចំនួន០៣គ្រឿងទៀត។ ប៉ុន្តែលើកទី០២ លោកមិនបានទទូលបណ្ដឹងពីម្ចាស់រថយន្តទាំង០៣គ្រឿងនេះទេ គឺក្រុមជនអន្ធពាលបានសារភាពដោយខ្លួនឯង។
លោក សេង លុច បានបញ្ជាក់ថា ក្រោយពីទទូលពាក្យបណ្ដឹងពីម្ចាស់រថយន្ត ដែលកើតឡើងលើកទី១ លោកស្នងការបានបញ្ជាឲ្យមន្ត្រីជំនាញរបស់លោក ធ្វើការស្រាវរកមុខសញ្ញាក្រុមរពឹសដៃទាំងនេះ រហូតកំណត់មុខសញ្ញាបាន ទើបលោកស្នើសុំដីកាតំណាងអយ្យការអមសាលាដំបូងខេត្ត ដើម្បីនាំខ្លួនពួកគេតែម្ដង។ ក្រោយនាំខ្លួនមកដល់អធិការស្រុក ក្រុមនេះបានឆ្លើយសារភាពជាមួយនឹងហេតុផលដូចៗគ្នាថា ពួកគេពិតជាបានប្រើប្រាស់ដុំថ្មជិះម៉ូតូតាមគប់ ឬស្ទាក់គប់ទៅលើរថយន្តទាំងនោះនៅពេលយប់មែន។
ពួកគេបានបញ្ជាក់អំពីមូលហេតុដូចៗគ្នាយ៉ាងខ្លីថា «មូលហេតុដែលពួកខ្ញុំកេនគ្នាតាមគប់កញ្ចក់រថយន្តដឹកទំនិញធំៗពេលយប់ទាំងនោះ គឺដោយសារតែក្ដៅក្រហាយនឹងរថយន្តទាំងនោះ បើលលឿនៗ និងបើកភ្លើងខ្លាំងចាំងភ្នែកមើលផ្លូវមិនឃើញ»។ សូមគត់សម្កាល់ផងដែរថា កន្លងមក នៅលើបណ្ដោយផ្លូវជាតិលេខ៥ ក្នុងភូមិសាស្ត្រ ស្រុកថ្មគោល ខាងលើនេះ ធ្លាប់មានរថយន្តដឹកទំនិញដែលបើកបរពេលយប់រងការខូចខាត បែកកញ្ចក់អស់ជាច្រើនគ្រឿងមកហើយ ក្រោមស្នាដៃក្រុមជនអន្ធពាលប្រភេទនេះ ក្រោមហេតុផលដូចគ្នា។ ប៉ុន្តែក៏ត្រូវបានសមត្ថកិច្ចធ្វើការស្រាវជ្រាវតាមចាប់ខ្លួនបាន បញ្ជូនទៅតុលាការជាហូរហែផងដែរ តែនៅតែមិនចេះអស់ក្រុមជនពាលរពឹសដៃបែបនេះទេ។
ទោះយ៉ាងណា ពាក់ព័ន្ធនឹងករណីចុងក្រោយនេះ បើតាមលោក សេង លុច អធិការស្រុកថ្មគោលបានបញ្ជាក់ថា ពេលនេះយើងឃាត់ខ្លួនជាក់ស្ដែងបានចំនួន០៤នាក់ហើយ។ ពួកគេបានសារភាពទទូលខុសត្រូវ និង កំពុងរៀបចំសំណុំរឿងបញ្ជូនទៅតុលាការ។ ប៉ុន្តែនៅបក្សពួកប៉ុន្មាននាក់ទៀត មន្ត្រីជំនាញ កំពុងស្រាវជ្រាវរកសាវតា ដើម្បីចាត់ការតាមនិតិវិធី ៕
ចែករំលែកព័តមាននេះ