ក្រុមហ៊ុនរថយន្ត Rolls-Royce បង្ហាញម៉ូដរថយន្តGhostតួវែង
រាជធានីភ្នំពេញ ៖ ក្រុមហ៊ុនរថយន្តRolls-Royceម៉ូដែល Ghostតួវែងស៊េរី KoChaMongkol ដែលមានតែមួយគ្រឿងគត់ក្នុងលោក និងជារថយន្តដែលច្នៃពិសេសបែប
រាជធានីភ្នំពេញ ៖ ក្រុមហ៊ុនរថយន្តRolls-Royceម៉ូដែល Ghostតួវែងស៊េរី KoChaMongkol ដែលមានតែមួយគ្រឿងគត់ក្នុងលោក និងជារថយន្តដែលច្នៃពិសេសបែប
រាជធានីភ្នំពេញ ៖ ក្រុមហ៊ុនរថយន្តRolls-Royceម៉ូដែល Ghostតួវែងស៊េរី KoChaMongkol ដែលមានតែមួយគ្រឿងគត់ក្នុងលោក និងជារថយន្តដែលច្នៃពិសេសបែប Bespoke ដំបូងគេដើម្បីជាការអបអរដល់ប្រទេសថៃ បានបង្ហាញខ្លួនក្នុងពិព័រណ៍រថយន្តអន្តរជាតិក្រុងបាងកកលើកទី៣៧ ។ តំណាងក្រុមហ៊ុនបានឲ្យដឹងថានេះក៏ជាលើកដំបូងផងដែរ សម្រាប់ការបង្ហាញជាសាធារណៈនៃរថយន្តម៉ូដែល Dawn ក្នុងប្រទេសថៃ ដែលជាប្រភេទរថយន្តបើកដំបូលមហាប្រណិតម៉ូដែលថ្មីមួយទៀតរបស់ Rolls-Royce ក្រុមហ៊ុនរថយន្ត Rolls-Royce បង្ហាញនូវកម្មវិធីច្នៃកុម្ម៉ង់រថយន្តបែប Bespoke នៅបញ្ជរតាំងពិព័រណ៍ធំបំផុតរបស់ក្រុមហ៊ុនដែលមានរថយន្ត ៧ គ្រឿង ។
ក្រុមហ៊ុនរថយន្ត Rolls-Royce បានបង្ហាញនូវរថយន្តមហាប្រណិតដែលបានរចនាឡើងយ៉ាងពិសេសគឺ រថយន្តស៊េរី KoChaMongkol នៅក្នុងកម្មវិធីពិព័រណ៍រថយន្តអន្តរជាតិក្រុងបាងកកលើកទី៣៧ ។ ការដាក់ឈ្មោះ និងការរចនានៃរថយន្តនេះ គឺដើម្បីអបអរដល់វប្បធម៌នៃប្រទេសថៃ ។ រថយន្ត Rolls-Royce ម៉ូដែល Ghost តួវែង ស៊េរី KoChaMongkol នេះគឺត្រូវបានផលិតឡើងដោយគិតដល់ សត្វដំរី ដែលជានិមិត្តរូបរបស់ប្រទេសថៃ ។ សត្វដំរី បានដើរតួនាទីយ៉ាងសំខាន់ទាំងផ្នែកសេដ្ឋកិច្ច និងសង្គមក្នុងការការពារប្រទេសជាច្រើនជំនាន់មកហើយ ។ រថយន្តពិសេសដែលមានតែមួយគ្រឿងនេះគឺផលិតឡើង ដោយចេញពីការសហការណ៍រវាងក្រុមការងារនៅឯ Goodwood ដែលជារោងចក្រផលិតរថយន្ត Rolls-Royce និងភ្នាក់ងារចែកចាយផ្លូវការរបស់រថយន្ត Rolls-Royce ប្រចាំប្រទេសថៃ គឺ Rolls-Royce Motor Cars Bangkok ក៏ដូចជាមួយនឹងនាយកដ្ឋានវិចិត្រសិល្បៈរបស់ប្រទេសថៃ ។
ដំណើរការនៃការផលិតរថយន្តនេះ គឺមានទាំងការព្រាងរូបភាពនានាដែលទាក់ទងនឹងប្រទេសថៃ ដែលត្រូវបានបញ្ជូនទៅឲ្យក្រុមការងារច្នៃកុម្ម៉ង់រថយន្តRolls-Royceនៅឯ Goodwood សម្រាប់ពិនិត្យមើល ។ ដូច្នេះរថយន្ត Rolls-Royce Ghost តួវែងដែលជារថយន្តមានការនិយមចូលចិត្តពីឥស្សរជនធុរកិច្ចរបស់ប្រទេសថៃ ក៏ត្រូវបានជ្រើសរើសសម្រាប់ការផលិតរថយន្ត KoChaMongkol ដ៏ពិសេសនេះ ។ ក្រុមការងារ Bespoke របស់រថយន្ត Rolls-Royce ក៏បានបញ្ចូលនូវរូបភាពសត្វដំរី ទាំងនៅផ្ទៃខាងក្រៅ និងផ្ទៃខាងក្នុងរបស់រថយន្តនេះ ។
នៅផ្ទៃខាងក្នុងរូបសត្វដំរី មានឆ្លាក់យ៉ាងផ្ចិតផ្ចង់នៅលើបន្ទះឈើ ចំណែកឯខ្សែឆ្នូត និងរូបសត្វដំរី ដែលមានពណ៌ទឹកក្រូចលើផ្ទៃខាងក្រៅរថយន្តវិញត្រូវបានគូសដោយជាងដ៏ល្បីឈ្មោះគឺលោក Mark Court ដែលជាធម្មតា លោកជាមនុស្សចុងក្រោយគេដែលត្រូវបញ្ចេញទឹកដៃខាងគូសខ្សែឆ្នូតលើរថយន្ត Rolls-Royce មុនពេលរថយន្តត្រូវចេញពីរោងចក្រ ។ លោក Paul Harris នាយកក្រុមហ៊ុនរថយន្ត Rolls-Royce ប្រចាំតំបន់អាស៊ីប៉ាស៊ីហ្វិក បានមានប្រសាសន៍ថា កម្មវិធីច្នៃកុម្ម៉ង់រថយន្តបែប Bespoke គឺជាការផ្ដល់ជូនលំដាប់កំពូលសម្រាប់អតិថិជនរបស់យើង ដោយបានបង្កើតនូវរថយន្តដែលមានលក្ខណៈប្លែកគ្នា ទៅតាមមនុស្សខុសៗគ្នា ។
ខ្ញុំមានក្តីរីករាយជាពន់ពេក ដែលយើងបានចូលរួមអបអរដល់វប្បធម៌នៃប្រទេសថៃតាមរយៈ រថយន្តដ៏អស្ចារ្យនេះ ហើយសត្វដំរីនេះមិនត្រឹមតែជានិមិត្តរូបនៅប្រទេសថៃនេះតែមួយនោះ ទេ ប៉ុន្តែក៏ជានិមិត្តរូបសម្រាប់បណ្ដាប្រទេសផ្សេងទៀតនៅក្នុងទ្វីបអាស៊ីនេះផងដែរ ។ចំណែកនាយករងក្រុមហ៊ុនរថយន្ត Rolls-Royce Motor Cars Bangkok លោក ឆាតវិថៃ តាន់ត្រាផន បានថ្លែងថានេះជារថយន្តមហាប្រណិតដែលមានតែមួយគ្រឿងគត់ក្នុងលោក ហើយការរចនាដូច្នេះ គឺពុំធ្លាប់មានឡើយនៅលើរថយន្តមុនៗ ។ ដូច្នេះ ក្នុងនាមជាជនជាតិថៃមួយរូប ខ្ញុំមានមោទនភាពជាពន់ពេក ដែលបានចូលរួមបង្ហាញរថយន្ត Ghost តួវែង ស៊េរី KoChaMongkol នេះនៅលើឆាកអាស៊ីអាគ្នេយ៍ ។
ទាំងឈ្មោះ ទាំងការរចនាធ្វើឲ្យរថយន្តនេះកាន់តែពិសេស ហើយផ្អែកតាមជំនឿរបស់យើង វានឹងនាំមកនូវភាពចម្រុងចម្រើន និងសុភមង្គល ។ ដូច្នេះរថយន្តនេះ គឺមានតម្លៃមែនទែន ហើយនេះជារថយន្តបែប Bespoke ដ៏លេចធ្លោជាងគេសម្រាប់យើង មកទល់នឹងបច្ចុប្បន្ននេះ ។ លោកបន្តថារថយន្ត Ghost តួវែង ស៊េរី KoChaMongkol មានម៉ាស៊ីនប្រភេទ V12 ទែរបូភ្លោះ ចំណុះ 6.6លីត្រ ហើយមានកម្លាំងរហូតដល់ទៅ 563HP និងរង្វិលជុំម៉ាស៊ីន 780NM ។ នៅក្នុងប្រទេសថៃរថយន្តម៉ូដែល Ghost ដែលលក់ដាច់ភាគច្រើន គឺប្រភេទតួវែង ។
ចំពោះម៉ូដែល Dawnថ្មី សម្រាប់ប្រទេសថៃដែលក្រុមហ៊ុនរថយន្ត Rolls-Royce បានដាក់បង្ហាញនូវរថយន្តថ្មីម៉ូដែល Dawn ជាប្រភេទរថយន្តបើកដំបូលទ្វារពីរ ដ៏មហាប្រណិត ដែលផ្ដល់នូវការបើកបរជាទីពេញចិត្តក្នុងសណ្ឋានបើកដំបូល ។ ទឹកដៃវិស្វកម្មគ្មានគូប្រៀបដែលបានអនុវត្តសម្រាប់ម៉ូដែល Dawn នេះ គឺធ្វើឲ្យរថយន្តនេះ មានសំឡេងស្ងាត់ប្រៀបបាននឹងម៉ូដែល Wraith របស់ក្រុមហ៊ុន Rolls-Royce ដែរ នៅពេលដែលរថយន្តកំពុងមានចលនា ជាមួយនឹងដំបូលបិទជិត ។
ហើយចលនាដំបូលវិញ គឺអាចបើកចំហបានដោយប្រើថេរវេលាត្រឹមតែ ២០ វិនាទីប៉ុណ្ណោះ ហើយចលនាបើកដំបូលនេះ ត្រូវបានគេប្រៀបធៀបទៅនឹង “របាំបាឡេស្ងាត់” ថែមទៀតផង ។ លោកថាម៉ូដែល Dawn ជារថយន្តបើកដំបូលដំបូងគេរបស់ក្រុមហ៊ុនRolls-Royce ក្នុងរយៈកាល ៨ ឆ្នាំមកនេះ ។ រថយន្តនេះ មានម៉ាស៊ីនប្រភេទV12 ទែរបូភ្លោះ ចំណុះ 6.6លីត្រ ហើយមានកម្លាំងរហូតដល់ទៅ 563HPនិងរង្វិលជុំម៉ាស៊ីន 780NM។
លោក Paul បានថ្លែងបញ្ជាក់ថា«ការរចនាដ៏ទាន់សម័យ និងទាក់ទាញរបស់ម៉ូដែល Dawn ជួយឲ្យយើងបើកទំព័រសករាជថ្មីសម្រាប់ប្រវត្តិសាស្ត្រដ៏ត្រចះត្រចង់របស់រថយន្ត Rolls-Royce តាមរយៈការបង្កើតនូវរថយន្តដែលមានភាពទាក់ទាញ ទំនើបទាន់សម័យ និងប្រណិត ។ រថយន្តម៉ូដែល Dawn ដែលជាប្រភេទរថយន្តទ្វារពីរកៅអីបួន ដែលមានភាពទាន់សម័យខ្ពស់ គឺជាការវិវត្តន៍ថ្មីនៃភាសាផ្នែករចនារបស់រថយន្ត Rolls-Royce ដោយមានគោលបំណងតែមួយគត់ គឺបង្កើតរថយន្តដែលស្រស់ស្អាត ទាំងពេលដំបូលបើក និងបិទ ។ នៅពេលដំបូលបើក ខ្សែបន្ទាត់គែមពីលើទ្វារមុខទៅទ្វារក្រោយ បង្ហាញខ្លួនយ៉ាងលេចធ្លោ ។ ចាប់ពីគែមកញ្ចក់មុខ ទៅក្រោយ បង្ហាញពីលំហូនៃភាពទាក់ទាញ ។ នៅជិតគែមទ្វារកៅអីខាងក្រោយ ទាំងសងខាងត្រូវបានរចនាឡើង ដើម្បីបង្កើតឲ្យមានផាសុខភាពពេលអង្គុយ ។
ចំណែកឯធ្នើខាងក្រោយខ្នងវិញ គឺបង្ហាញពីទឹកដៃឥតខ្ចោះនាសម័យថ្មីរបស់រថយន្ត Rolls-Royce ។ ធ្នើខាងក្រោយនោះត្រូវបានរចនាជារាងក្រចកសេះ ហើយផ្ទាំងឈើដែលបិទលើធ្នើនោះ ដែលប្រភេទឈើ អាចជ្រើសរើសទៅតាមការនិយមចូលចិត្តរបស់អតិថិជន ត្រូវបានរចនាក្នុងសណ្ឋានដូច “ទឹកធ្លាក់”នៅចន្លោះកៅអីក្រោយ ទាំងពីរ និងនៅតាមជញ្ជាំងទ្វារផ្នែកខាងក្នុង ដែលទាក់ទាញឲ្យម្ចាស់ ឬអ្នកធ្វើដំណើរចង់ចូល ជិះរថយន្តម៉ូដែល Dawnនេះ ។
ក្រុមហ៊ុនរថយន្ត Rolls-Royceដំឡើងរថយន្តមហាប្រណីតដែលផលិតដោយដៃនៅឯរោងចក្រ Home of Rolls-Royceដែលស្ថិតនៅឯតំបន់ Goodwood Estateក្រុង West Sussex ប្រទេសអង់គ្លេស ដោយកាលពីឆ្នាំមុន ក្រុមហ៊ុនបានលក់រថយន្តចំនួន ៣៧៨៥ គ្រឿងដល់អតិថិជនទូទាំងពិភពលោក ហើយកំណើនដែលខ្ពស់ជាងគេបំផុតគឺនៅតំបន់អាស៊ីប៉ាស៊ីហ្វិក ។ សឹងតែគ្រប់អតិថិជនទាំងអស់គឺបានជាវរថយន្តដោយបានតម្រូវឲ្យច្នៃកុម្ម៉ង់បែប Bespokeទៅតាមចំណង់ចំណូលចិត្តរបស់គាត់៕ អ៊ាង ប៊ុនរិទ្ធ
ចែករំលែកព័តមាននេះ