រាជធានីភ្នំពេញ ៖ ក្រុមហ៊ុន យូណាយធីត អូតូត្រេឌីង ដែលជាក្រុមហ៊ុននាំចូល និងចែកចាយរថយន្តម៉ាក Chevrolet នៅលើទីផ្សារប្រទេសកម្ពុជា បានផ្ដល់ជូនកម្មវិធីពិសេសសម្រាប់អតិថិជនដែលទិញរថយន្តChevroletយកទៅប្រើប្រាស់ ។ កម្មវិធីពិសេសនេះ អតិថិជនទិញរថយន្តម៉ាកChevroletនេះយកទៅប្រើប្រាស់ មិនបាច់ភ័យព្រួយរឿងបញ្ហានៅតាមដងផ្លូវ ដោយក្រុមហ៊ុនធានាការពារដល់ទៅ៣ឆ្នាំ ឬ១០ម៉ឺនគីឡូម៉ែត្រ ។
នៅក្នុងពិធីតាំងបង្ហាញរថយន្តស៊េរីថ្មីរបស់ Chevrolet នៅផ្សារទំនើបអីុអន កាលពីថ្ងៃទី១៩ មីនា ២០១៦ លោក ប៉ែន ពិសិដ្ឋ នាយកគ្រប់គ្រងក្រុមហ៊ុន យូណាយធីត អូតូ ត្រេឌីង បានឱ្យដឹងថា ការផ្ដល់ជូនដ៏អស្ចារ្យនេះបានបង្ហាញពីទំនុកចិត្តពេញលេញរបស់យើង ចំពោះគុណភាពជឿទុកចិត្ត និងយូរអង្វែង នៃរថយន្ត Chevrolet ។ ការការពារ ការធានារបស់កម្មវិធីនេះ បានផ្ដល់នូវការផ្លាស់ប្តូរគ្រឿងបន្លាស់ដោយឥតគិតថ្លៃ ទាំងនោះរួមបញ្ចូលដូចជា ប្រេងម៉ាស៊ីន តម្រងប្រេងម៉ាស៊ីន តម្រងខ្យល់ តម្រងប្រេង អាគុយ ផ្លិតទឹក ស្បែកហ្វ្រាំង ប្រេងប្រអប់លេខ ប្រេងសម្រាប់ប្រព័ន្ធកាពីតាស់ តម្រងម៉ាស៊ីនត្រជាក់ ថ្លៃពលកម្ម និងសេវាជំនួយតាមដងផ្លូវ២៤ម៉ោង ។
លោកបន្តថា ទាំងនេះគឺជាការងាយស្រួល និងចំណេញច្រើនសម្រាប់អតិថិជនដែលទិញរថយន្ត Chevrolet យកទៅប្រើប្រាស់ ដោយគ្រាន់តែចាក់សាំងសម្រាប់ជិះប៉ុណ្ណោះក្នុងរយៈពេលបីឆ្នាំ ឬរយៈចម្ងាយ៦ម៉ឺនគីឡូម៉ែត្រ សម្រាប់ការផ្លាស់ប្តូរគ្រឿងបន្លាស់នានា ។ ម្យ៉ាងទៀត ក្រុមហ៊ុនក៏បានសម្រួលដល់អតិថិជនដែលមានបំណងទិញរថយន្តហើយខ្វះខាតថវិកា ដោយបានផ្ដល់សេវាកម្មបង់រំលស់ដែលតម្រូវឱ្យអតិថិជនមានប្រាក់បង់ដំបូងត្រឹមតែ៥ពាន់ដុល្លារអាមេរិកប៉ុណ្ណោះ ។
លោកបន្ថែមថា ថ្វីត្បិតតែរថយន្តChevrolet ទើបតែចូលមកកាន់ទីផ្សារប្រទេសកម្ពុជា តែការលក់មានកំណើនគួរឱ្យកត់សម្គាល់ និងតម្រូវឱ្យក្រុមហ៊ុនពង្រីកទីផ្សារបន្តបន្ទាប់ទៀត ដើម្បីឱ្យអតិថិជននៅតាមខេត្តនានានៃព្រះរាជាណាចក្រកម្ពុជាងាយស្រួលស្វែងរករថយន្តChevrolet និងងាយស្រួលរកសេវាកម្មជាដើម ។
លោកបញ្ជាក់ថា Chevrolet មើលឃើញថា ទីផ្សារប្រទេសកម្ពុជានឹងកើនឡើងថែមទៀត ក្នុងវិស័យរថយន្តថ្មីៗ ដោយសារតែបច្ចុប្បន្ននេះ រថយន្តភាគច្រើនដែលចរាចរ ជារថយន្តមួយទឹក ឬរថយន្តជជុះ ដូចនេះរថយន្តថ្មីៗនឹងនៅតែមានទីផ្សារទូលាយសម្រាប់ក្រុមហ៊ុននាំចូលរថយន្តថ្មីៗមកកាន់កម្ពុជា ៕
ចែករំលែកព័តមាននេះ